Ilahi Rəhbəron-41

Ilahi Rəhbəron-41

Jıqo qıləy tov vardənin iyən saxtə şəraiyətədə Zəhroye-Əthar(s) qıləy şıtəhə tifl be ki,ıştə buzurquvarə inə həzrəte Xədicə(s)  ağuş və dovnədə perəseydəbe.çın se sori mıdddətədə ə həzrət ruşdış pəydu karde və ozavziye.qıləy holədəki,ə həzrət çı neziku çı mısılmınon bə rujonədə bıə əzob-əziyyəton şoyd be və jıqo bızın ilahi təğdır ım be ki,ə həzrət hejo ıştə hırdənəti zəmoniku de məşəğğət iyən əziyyəti yol bıbu ta bo jimoni etat-petaton tov vardey xoto hozzı bıbu. nəhoyətən,ixtisodi mıhosirə bə peyğombər(s) iyən muminon hiç qıləy təsir nınoə holədə,bə oxo rəse.əmmo hələ çandə zəmon dəvardənıbe ki,islomi ım fədokorə banu  yəni həzrəte Xədicə(s)  bə həxı dəvəti ləbbeykış vote və ıştə conış bə con ofəyə Xıdo təslimış karde və bə həzrəte Zəhro(s) pokə çehrə çı yətiməti xok nışte.

Səhih həmonə de təəssıfi pur bıə və ğəmənqizə ləzonədə ki,Əbu-Tolıb həm həxı dəvətış ğəbul karde və qıləy vey həssosə zəmonədə Xıdo-Rəsulış(s) coyli haşte.ım dıqlə bə xoş nıomə hodisə jıqo bə peyğombəri(s) bevəcış təsir karde tayinki,ə həzrəti həmonə sorış “ammul-huzn” ya çı huzn iyən ğəmi sorış elon karde.Məkkə mışrikon həm çın fırsətiku okoşon doe və çanədə zuşon vışkiye bə ə həzrəti əzob-əziyyətışon karde.nəhoyətən çı Məkkə mışrikon iyən bıtpərəston qırd ım təzyiğ iyən təhdidon bəvrə rəse ki,Xıdo-Rəsul(s) bə ğərol ome ki,bə Mədinə hicrətko.çın zəmoniku qıləy nuyə devrə çı həzrəte Fatimə(s) jimonədə bino be.

De həzrəte Zəhro(s) bə Mədinə şəhri varid bıey,çə həzrəti jimoni həssosə ləzəon bino be.həzrəte Fatmə(s) jimoni muhimmə hodisəon iminə qılə Mədinədə çə həzrəti de Həzrət Əli(ə)-I mələkutiyə rabitəbe ki,ım məsələ de Hicri-Ğəməri dıminə sori yolə Bədri cani bə I zəmon bə əməl ome.ım məsələ bə Mədinə şəhri qıləy məxsusə həyəconış varde və islomi camiyəş zumand karde. Bın zəmon həmonə rujon məşhurə şəxsonku kali qıləyni çı əxloği kəromət iyən insoni fəziləton soyb bıə bo həzrəte Zəhro(s) daynəti və tələb kardero bə həzrəte peyğombər(s)-I huzur rəsəbin.əmmo,ə həzrəti çəvon tələbonış ğəbul nıkarde və həzrəte Zəhroş(s) bəvonnıdoe.əvon hiç qıləy norohət və rəncidə nıbə holədə çok-çoki hissışon karde ki,Xıdo-Rəsul(s) meylış heste ki, həzrəte Fatmə(s) de həzrəte Əli(ə)-I izdivoc və vəyəko.bə həmonə dəlili xoto,Əli(ə) tərğib iyən təşviğ bıbu ta bo həzrəte Fatmə(s) tələb kardeyro bə peyğombəri(s) huzur bırəso….

Əli(ə) itərəfo bə ixtisodi fəğrəti dəlili xoto və co tərəfiku həm çəy vucudi dəqətə bəştə həyo xoto, qıləy ğərol bekardeyro bə ziyodə fik-fam və təfəkkuri ehtiyociş hestebe.əmmo,çı yolon isror boyis be ta nəhoyətən,Əli(ə) bə həzrəte Peyğombər(s)-I huzuri şərəfyob bıbu,bırəso və ərzış karde:”Ha Xıdo-Rəsul ha!çımı pı-mo bətı fido!mı şımə kədə yol bıəm və şımə lutfonku bəhrəm bardə.az şımə tərbiyə jiyədə perəsəm,ədəbım vində və deşmə vucudi bərəkəti hidoyətım vində.bə Xıdo ğəssəm ki,şımə çımı dınyo iyən axırəti bəhrəyon. Isət çəy zəmon rəsə ki,mı boştə qıləy jimoni həmro bıvıjnom və qıləy xıyzon təşkil bıdom ta deəy mənus bıbum və ıştə norohətçətiyonku bəkamkom.ehanə şımə məsləhət bızınon,ıştə kinə Fatmə(s) demı əğd bıbırno və izdivacko.bın surətədə bəmı qıləy dıjdə hərəbaxtəti nəsib bəbe”….