Ilahi Rəhbəron-42

Ilahi Rəhbəron-42

De həzrəte Zəhro(s) bə Mədinə şəhri varid bıey,çə həzrəti jimoni həssosə ləzəon bino be.həzrəte Fatmə(s) jimoni muhimmə hodisəon iminə qılə Mədinədə çə həzrəti de Həzrət Əli(ə)-I mələkutiyə rabitəbe ki,ım məsələ de Hicri-Ğəməri dıminə sori yolə Bədri cani bə I zəmon bə əməl ome.ım məsələ bə Mədinə şəhri qıləy məxsusə həyəconış varde və islomi camiyəş zumand karde. Bın zəmon həmonə rujon məşhurə şəxsonku kali qıləyni çı əxloği kəromət iyən insoni fəziləton soyb bıə bo həzrəte Zəhro(s) daynəti və tələb kardero bə həzrəte peyğombər(s)-I huzur rəsəbin.əmmo,ə həzrəti çəvon tələbonış ğəbul nıkarde və həzrəte Zəhroş(s) bəvonnıdoe.əvon hiç qıləy norohət və rəncidə nıbə holədə çok-çoki hissışon karde ki,Xıdo-Rəsul(s) meylış heste ki, həzrəte Fatmə(s) de həzrəte Əli(ə)-I izdivoc və vəyəko.bə həmonə dəlili xoto,Əli(ə) tərğib iyən təşviğ bıbu ta bo həzrəte Fatmə(s) tələb kardeyro bə peyğombəri(s) huzur bırəso….

Əli(ə) itərəfo bə ixtisodi fəğrəti dəlili xoto və co tərəfiku həm çəy vucudi dəqətə bəştə həyo xoto, qıləy ğərol bekardeyro bə ziyodə fik-fam və təfəkkuri ehtiyociş hestebe.əmmo,çı yolon isror boyis be ta nəhoyətən,Əli(ə) bə həzrəte Peyğombər(s)-I huzuri şərəfyob bıbu,bırəso və ərzış karde:”Ha Xıdo-Rəsul ha!çımı pı-mo bətı fido!mı şımə kədə yol bıəm və şımə lutfonku bəhrəm bardə.az şımə tərbiyə jiyədə perəsəm,ədəbım vində və deşmə vucudi bərəkəti hidoyətım vində.bə Xıdo ğəssəm ki,şımə çımı dınyo iyən axırəti bəhrəyon. Isət çəy zəmon rəsə ki,mı boştə qıləy jimoni həmro bıvıjnom və qıləy xıyzon təşkil bıdom ta deəy mənus bıbum və ıştə norohətçətiyonku bəkamkom.ehanə şımə məsləhət bızınon,ıştə kinə Fatmə(s) demı əğd bıbırno və izdivacko.bın surətədə bəmı qıləy dıjdə hərəbaxtəti nəsib bəbe”….

Peşo Xıdo-Rəsul(s) bə Biloli əmrış karde ki,bə Mıhocir iyən Ənsari xəbə bıdo ta əvon həmmə məçit cəm bıbon.çoko ki,əvon bə məçit cəm bin peyğombər(s) bəsə minbərisə pedate və Xıdovəndi həmdo-səno kardey bədiqə,hamyeşe:ha millət ha!aqah bıbən ki,Cəbrəyil nozil be və Xıdo tərəfikuqıləy xəbəş varde ki,Əli de Fatmə əğdi mərosimi bərpokə.peşo bə Əli(ə)-i əmrış karde ki,bəsə poysə beheşto və əğdi xutbə handey bıbu.əğdi xutbə handey bədiqə əyo bıə həmmə kəson ıştə dastonışon bo dıvoro rostışon karde və voteşone:Xıdovədn ım izdivoci boşımə mıborəkko iyən şımə miyono dustəti və məhəbbət bərpoko.çın mərosimi bədiqə Xıdo-Rəsul(s) bəştə kə oqarde və bəştə jenon əmrış karde bo Fatmə(s) vəyə və şoyvonəti mərosimon bərpokon. peyğombər(s) Əli(ə)-ış ıştə palu vanqış karde və ıştə rostə səmtədə nıştovneşe. Fatmə(s) həm  ıştə çəpə tərəfədə nıştovneşe.peşo çəvon har dıqləyni çəkut və təviliş pusə karde və ıştə dastonış bə osmoni səmt rostış karde və jıləvoni dıvoş karde:Xıdovənda! Im vəyə və izdivaci mıborəkkə və çəvonku pok iyən pokizə nəsl bə vucud biyə!...

De ın tərtibi həzrəte Zəhro(s) de Əli(ə)-i mıştərəkə jimon bino be.Xıdo-Rəsul(s) ki,bəştə kinə ziyodə məhəbbətış hestebe və həzrəte Xədicə(s) mələkutiyə rehləti bədiqə deəy munis bıəbe, çandə ruj dumo yənde bo həzrəte Zəhro(s) vindero bəçəvon kə şeydəbe.rujon qıləyniyədə çəyku dəparseşe:ıştə jimoni həmro çokonə vinde?Fatmə(s) ərzış karde:əzizə pı! Xıdovəndi həmməysə çokə merdış bəmı nəsibış kardə,əmmo Ğureyşi jenon ki,çımı palu omeydən,bəmı təbrik votey əvəzi,bəmı voteydən ki,deməkə ki,sərvətin iyən ərbobə merdon tınışon piyedəbe,əmmo ıştı pı tınış bə qıləy fəğır iyən beçizə insoniş doə və bəçəy kəbinış vardə.Xıdo-Rəsul(s) bə həzrəte Zəhro(s) dılvandiş doe və hamyeşe:çımı çəşi ruşnə,ıştı pı iyən şuyə fəğır ni.bə Xıdo ğəssəm  zəmini xəzinəşon bəmı nışon doe,əmmo az uxrəvi nemətonım bəsə dınyo zər-zibo iyən sərvətonsə tərcih və bəpem qəte.çımı əzizə balə,mı botı qıləy şəxsiyyətım vıjniyə ki,bəsə həmməysə bənav islomış ğəbul kardə və elm və zıney,helm iyən ağli cəhəto bəsə həmmə merdonsə barz və bəpeye.peşo Əli(ə) vanqış je və hamyeşe:deştə jimoni həmro mıdoro iyən mehribonətikə.bızın ki,Fatmə(s) çımı bədəmi poəy və hakəs bəy əziyyətko mınış əziyyət kardə  və hakəs əy xoşholko mınış şo və xoşholış kardə......