Ilahi Rəhbəron-43

Ilahi Rəhbəron-43

 De ın tərtibi həzrəte Zəhro(s) de Əli(ə)-i mıştərəkə jimon bino be.Xıdo-Rəsul(s) ki,bəştə kinə ziyodə məhəbbətış hestebe və həzrəte Xədicə(s) mələkutiyə rehləti bədiqə deəy munis bıəbe, çandə ruj dumo yənde bo həzrəte Zəhro(s) vindero bəçəvon kə şeydəbe.rujon qıləyniyədə çəyku dəparseşe:ıştə jimoni həmro çokonə vinde?Fatmə(s) ərzış karde:əzizə pı! Xıdovəndi həmməysə çokə merdış bəmı nəsibış kardə,əmmo Ğureyşi jenon ki,çımı palu omeydən,bəmı təbrik votey əvəzi,bəmı voteydən ki,deməkə ki,sərvətin iyən ərbobə merdon tınışon piyedəbe,əmmo ıştı pı tınış bə qıləy fəğır iyən beçizə insoniş doə və bəçəy kəbinış vardə.Xıdo-Rəsul(s) bə həzrəte Zəhro(s) dılvandiş doe və hamyeşe:çımı çəşi ruşnə,ıştı pı iyən şuyə fəğır ni.bə Xıdo ğəssəm zəmini xəzinəşon bəmı nışon doe,əmmo az uxrəvi nemətonım bəsə dınyo zər-zibo iyən sərvətonsə tərcih və bəpem qəte.çımı əzizə balə,mı botı qıləy şəxsiyyətım vıjniyə ki,bəsə həmməysə bənav islomış ğəbul kardə və elm və zıney,helm iyən ağli cəhəto bəsə həmmə merdonsə barz və bəpeye.peşo Əli(ə) vanqış je və hamyeşe:deştə jimoni həmro mıdoro iyən mehribonətikə.bızın ki,Fatmə(s) çımı bədəmi poəy və hakəs bəy əziyyətko mınış əziyyət kardə və hakəs əy xoşholko mınış şo və xoşholış kardə...... 

Yeqanə kə ki,çəy dıqlə əsosə uzv,yəni jenı-merd har dıqləyni çı xəto iyən qınoko məsumin və de əxloği iyən insoni fəziləton dərostəşonbe,həmonə kə həzrəte Əli(ə) iyən Fatmə(s) mıştərəkə kə be.Əli(ə) çı qıləy insoni nımunə be və həzrəte Fatmə(s) həm çı qıləy islomi komilə banu məzhər və simvolbe.Əli(ə) hırdənəti zəmoniku çı Xıdo-Rəsul(s)-i kəno və çə həzrəti mıstəğim iyən sərostə formədə çə həzrəti tərbiyə jiyədə ğərolış qəte və ilahi baxş kardə çı vey çokə insoni iyən əxloği fəziləton barzə qıləyniyon soyb be.Zəhro(s) həm ıştə buzurquvarə pı ağuş və vanqoyədə tərbiyəş vindəbe və yol bıəbe və Xıdo doə kəroməton çə həzrəti qırd vucudış dəqətəbe.çəvon coni quşi hejo hırdənətiku de Kərimə-Ğıroni mələkuti sədo munis be.həzrəte Əli(ə) iyən Fatmə(s) mıştərək və de səfo bə ico bıə qamə jimon çın ayə barizə nımunə be ki,hamyedə:”və çəy(Xıdo)nımunəonku əme ki,boşımə(şımə cinsiku) jimoni həmroş ofəyə ta çəy kənoyədə oroməti pəydukon”.....

Həzrəte Zəhro(s) mıştərəkə jimoni barzə xıslətonku qıləyni çə həzrəti sodə jimon dəvordıney be. qıləy ruj Xıdo-Rəsul(s) bə Fatmə(s) kə daxil be və vindeşe ki,Fatmə(s)qıləy kanə olətış bəştə tan kardə və deştə daston çı osyo sığon qordıneydən və ıştə hırdənış ıştə dovnədə qətə və bəy şıt doydə.Xıdo-Rəsul(s) de ın mınzərə vindey vey norohət be və hamyeşe:çımı əzizə kinə!dınyo çı dınyo saxti iyən norohətiyon bıçaşt ta bə axırəti şinətiyon nayil bıbuş.Fatmə(s) ərzış karde:ha Xıdo rəsul ha!bə Xıdo bəçəy neməton xoto şıkk kardedəm……

Həmçinin həzrəte Fatmə(s) islomi torıxi vey həssosə devronədə ıştə jimonış bino karde.joqo ki, hasor islomi ləşkəri de mışrik iyən yəhudiyon çandə qılə canqon kardedəbin və Əli(ə) çəvon əksərədə iştirok kardedəbe və de vey oqıniyə bədəmi bə kə oqardedəbe və həzrəte Fatmə(s) de vey mehribonəti və məhəbbəti bə ico bə Əli(ə) vəy beşeydəbe və bəçəy zəxmon mərhəm noydəbe.ə həzrət ıştə şuyə təşviğ kardedəbe iyən bəy əhsənt votedəbe və çəy mislış nıbə şucoəton tərif kardedəbe və deştə xolisonə nəvazişon bəy oroməti doydəbe.Əli(ə) bın barədə hamyedə:”ha zəmon ki,bəkə omeydəbim,bə Fatmə(s) çehrə nəzə kardedəbim,çımı qırd ğəmo-ğussəm bərtərəf beydəbe......