Ilahi Rəhbəron-44
Ilahi Rəhbəron-44
Ilahi Rəhbəron-44
Həzrəte Zəhro(s) mıştərəkə jimoni barzə xıslətonku qıləyni çə həzrəti sodə jimon dəvordıney be. qıləy ruj Xıdo-Rəsul(s) bə Fatmə(s) kə daxil be və vindeşe ki,Fatmə(s)qıləy kanə olətış bəştə tan kardə və deştə daston çı osyo sığon qordıneydən və ıştə hırdənış ıştə dovnədə qətə və bəy şıt doydə.Xıdo-Rəsul(s) de ın mınzərə vindey vey norohət be və hamyeşe:çımı əzizə kinə!dınyo və çı dınyo saxti iyən norohətiyon bıçaşt ta bə axırəti şinətiyon nayil bıbuş.Fatmə(s) ərzış karde:ha Xıdo rəsul ha!bə Xıdo bəçəy neməton xoto şıkk kardedəm……
Həmçinin həzrəte Fatmə(s) islomi torıxi vey həssosə devronədə ıştə jimonış bino karde.joqo ki, hasor islomi ləşkəri de mışrik iyən yəhudiyon çandə qılə canqon kardedəbin və Əli(ə) çəvon əksərədə iştirok kardedəbe və de vey oqıniyə bədəmi bə kə oqardedəbe və həzrəte Fatmə(s) de vey mehribonəti və məhəbbəti bə ico bə Əli(ə) vəy beşeydəbe və bəçəy zəxmon mərhəm noydəbe.ə həzrət ıştə şuyə təşviğ kardedəbe iyən bəy əhsənt votedəbe və çəy mislış nıbə şucoəton tərif kardedəbe və deştə xolisonə nəvazişon bəy oroməti doydəbe.Əli(ə) bın barədə hamyedə:”ha zəmon ki,bəkə omeydəbim,bə Fatmə(s) çehrə nəzə kardedəbim,çımı qırd ğəmo-ğussəm bərtərəf beydəbe......
Həlbəttə,Əli(ə) çok-çoki zıneydəbe ki,qıləy merd ki,bə məhəbbəti ehtiyociş hestebu,hejo jəqo jeni həm bəştə kardə zəhməton xoto bə merdi tərəfiku məhəbbət iyən ğədrdonəti ehtiyociş heste. bə həmonə dəlili xoto,Əli(ə) ıştə jimoni idorə koyədə hejo bə həzrəte Zəhro(s) təşəkkur kardedəbe iyən çəyku ğədrdonəti kardedəbe.ə həzrət bəştə jimoni həmro koonədə komək nışon doydəbe və çı kəy koon kali qıləyni məsuliyyəti bəştə ehdə peqəteydəbe.bın qam iyən səmimiyə xıyzoni mərkəzədə Hicri-Ğəməri seminə sori çəvon iminə fərzənd yəni İmom Həsən(ə) bə hestemoni aləmi ərsə ğədəmış noe və Ələvi iyən Fatimi xıyzoni qamə mərkəzış ruşin karde. əmmo məələsəf həmonə sori Uhudi telə canq bə əməl ome və peyğombəri(s) bəfodorə səhabəonku 70 qıləsə həm vey ki,çəvon sədə çə həzrəti ğəhrəmonə amu seyyiduş-şuhəda Həmzə ğərolış qətəbe,bə şəhodət məğami rəsin.həzrəte Zəhro(s) de idastə jenon bə Uhudi canqi vırə şin və de yarəjə bıəkəson tədavi və mualicə koy məşğul bin və peyğombər(s) ki,bın janqədə de şiddəti zəxmin bıəbe,həzrəte Zəhro(s) bə əhəzrəti yarə və zəxmi həm damonış noe və çə həzrəti yaronış şışte……
Xıdovənde-Xalığ bə həzrəte Zəhro(s) iyən Əli(ə) Həsən(Hicrəti seminə sori Rujəmo nimədə), Huseyn(Hicrəti çominə sori Şəbanə manqədə),Zeynəb(Hicrəti pencminə sori) iyən Umm Kulsum(Hicrəti şəşminə sori) nomo çoqlə hırdənış baxş kardə.demiyən həzrəte Fatmə(s) bəpe ıştə kəy koysə əlovə,ıştə fərzəndon tərbiyə koyədə de qıləy zəhmətinə koy məşğul bıənin be. həmonə fərzəndon ki,bə ın ismətin iyən pokə xıyzoni qıləy ziynətışon baxş karde.ə fərzəndon ki, bənə Zəhro(s) iyən Əli(ə) çı qırd insoni iyən əxloği kəromət və erjon soyb bin.məxsusən həmməkəson çəşon bə ım xıyzoni xıyə bıəbe və çəvon rəftor bo qırd islomi camiyə qıləy ulqu be və çəvon rəftoron bə cokəson qıləy ilhom baxş kardedəbe.Fatimeye-Zəhro(s) ki,ıştən çı nıbuvvət iyən viloyəti mərkəzədə tərbiyəş vindəbe,çok-çoki iyən de ləyoğətinə formə deştə fərzəndon sanqinə tərbiyə koy məşğul be və bın koyədə ə həzrət səbarz beşe və fərzəndonış perosne ki, islomi torıxi həssos iyən tale həlləkə devrononədə islomi mevcudiyyət iyən umməti məsləhətonışon hifzışon karde,oqəteşone və çı camiyə imomət iyən hidoyəti mənsəbədə vey barizə rolışon bəştə ehdəşon peqətəbe….
