Ilahi Rəhbəron-45

Ilahi Rəhbəron-45

Xıdovənde-Xalığ bə həzrəte Zəhro(s) iyən Əli(ə) Həsən(Hicrəti seminə sori Rujəmo nimədə), Huseyn(Hicrəti çominə sori Şəbanə manqədə),Zeynəb(Hicrəti pencminə sori) iyən Umm Kulsum(Hicrəti şəşminə sori) nomo çoqlə hırdənış baxş kardə.demiyən həzrəte Fatmə(s) bəpe ıştə kəy koysə əlovə,ıştə fərzəndon tərbiyə koyədə de qıləy zəhmətinə koy məşğul bıənin be. həmonə fərzəndon ki,bə ın ismətin iyən pokə xıyzoni qıləy ziynətışon baxş karde.ə fərzəndon ki, bənə Zəhro(s) iyən Əli(ə) çı qırd insoni iyən əxloği kəromət və erjon soyb bin.məxsusən həmməkəson çəşon bə ım xıyzoni xıyə bıəbe və çəvon rəftor bo qırd islomi camiyə qıləy ulqu be və çəvon rəftoron bə cokəson qıləy ilhom baxş kardedəbe.Fatimeye-Zəhro(s) ki,ıştən çı nıbuvvət iyən viloyəti mərkəzədə tərbiyəş vindəbe,çok-çoki iyən de ləyoğətinə formə deştə fərzəndon sanqinə tərbiyə koy məşğul be və bın koyədə ə həzrət səbarz beşe və fərzəndonış perosne ki, islomi torıxi həssos iyən tale həlləkə devrononədə islomi mevcudiyyət iyən umməti məsləhətonışon hifzışon karde,oqəteşone və çı camiyə imomət iyən hidoyəti mənsəbədə vey barizə rolışon bəştə ehdəşon peqətəbe….

Həzrəte Zəhro(s) iyən Əli(ə)-I mıştərəkə jimoni məxsusə  xıslətonku qıləyni,çəvon pokəti be ki,de ilahi irodə bə əməl oməbe.İbn Əbbos votedə:qıləy ruj Əli,Fatmə,Həsən iiyən Huseyn peyğombər(s)-I məhzərədə bin və peyğombər(s)-I hamyeşe:”Xıdolim ha! tı zıneydəş ımon Əhli-Beytin və  milləti miyono həmməysə əzizin.deçəvon duston dustəti və deçəvon deşmıni deşmınətikə.bəvon komək əkəyon həm koməkkə,əvoni qırd notəmizətiyonku pokkə və çı həmmə qınonku hifzkə,oqət.de Ruhul-Ğudusi(Cəbrəyil) vositə əvoni təyid və təsdığkə”.de ın tərtibi bə Fatimə(s) xıyzoni bıə ilahi xassə inoyət və lutf boyis be çəvon qırd jimon  ilahu bu və ranq bəştə bıqəto və çəvon de etat-petati pur bıə qırd jimon,çəvon fəryod iyən sukut,çəvon sulh iyən canq,çəvon ğıyom iyən ğuud və xulosə çəvon qırd fərdi iyən iştimoyi mevğıyyət  xolisonə niyyətiku sərçəşməş peqətəbe və çəvon kardə qırd koon bə Xıdo xoto be.əvon fəğət bə royədə qəm şoydəbin ki,bəvədə fəğət ilahi rizoyət və xoşnudəti bıbu.bə həmonə dəlili xoto,bə Fatmə(s) xitobən hamyeşe:”Xıdo bətı dığğətış karde və mış bəsə qırd millətisə bəpeş qəte.peşo ıştı jimoni həmro Əli(ə)-ış bəsə cokəsonsə barzış qəte.peşo tış bəsə aləmi co jenonsə tərcih və bəpeş qəte və nıəhoyətən Həsən iyən Huseynış bəsə vəhışti  əhli cıvononsə imtiyozış doe(barzış zıne)”…

Həzrəte Zəhroye-Əthor(s) ıştən həm ilahi nuri cilvəonku qıləyniy be.bə həmonə dəlili xoto,qıləy zəmon ki,İmom Bağır(ə)-iku sıvol be ki,çıro bə Fatmə(s) Zəhro votedən? İmomi hamyeşe:zira Xıdovəndi əvış ıştə əzəməti nuriku ofəyəşe.de həmonə yolə banu nuri vositə osmon iyən zəmin ruşin be.joqo ki,ilahi firiştəonçəy nuri şua jiyədə ğərol qəteydən və bo Xıdo xoto bə səjdə eqıneydən və xəbə seydən:Xıdolim ha! ım nur çiçe?hamyeşe:qıləy nure ki,əvım ıştə əzəməti nuriku ofəyəme və osmononədə ğərolım doə. əvım çı peyğombəron həmməysə çokə qıləyni sulbədə bə vucudım vardə və çın nuriku dini rəhbər və navəjənon xəlğ bəkardem ta milləti bə həxı səmt hidoyətko.əvon çı vıjniyə peyğombəron canişinon bəbeyn……

Jenı-merdi bəştə duş iyən ehdə peqətə muhimmə məsələonku qıləyni,məxsusən ım sanqinə məsuliyyət ki,bə inəon duşe,xıyzoni mərkəzədə qıləy mənəvi fəzo iyən sfera icod kardeye.yəni inson bəpe bə cismi təğziyə iyən xorəki paralel,bəştə fərzəndon ehtiyoci mənəvi təmini həm bəpe ciddiyə surətədə dığğətko. bın zəminədə həmməysə muhimmə metodonku qıləyni ki,qıləy təyinəkə rolış heste,Xıdovənde-Aləmi dərqoyədə ibodət kardeye.bə həmonə dəlili xoto,Həzrəte Zəhroye-Əthor(s) çı peyğombər(s) iyən Əli(ə) şəvi nimədə aşığonə iyən arifonə nımojon şoyd be,həmməysə bənav bə ibodəti əhəmiyyət doydəbe. Xido-Rəsul(s) ıştə əzizə kinə ım xısləti həxədə hamyedə:”bə Xıdo imon Zəhro(s) con iyən dılijıqo nufuzış kardə be ki,bo Xıdo ibdoətiro ıştəş çı həmməkəsiku fariğ(coş)kardəbe”.