Ilahi Rəhbəron-46

Ilahi Rəhbəron-46

Jenı-merdi bəştə duş iyən ehdə peqətə muhimmə məsələonku qıləyni,məxsusən ım sanqinə məsuliyyət ki,bə inəon duşe,xıyzoni mərkəzədə qıləy mənəvi fəzo iyən sfera icod kardeye.yəni inson bəpe bə cismi təğziyə iyən xorəki paralel,bəştə fərzəndon ehtiyoci mənəvi təmini həm bəpe ciddiyə surətədə dığğətko. bın zəminədə həmməysə muhimmə metodonku qıləyni ki,qıləy təyinəkə rolış heste,Xıdovənde-Aləmi dərqoyədə ibodət kardeye.bə həmonə dəlili xoto,Həzrəte Zəhroye-Əthor(s) çı peyğombər(s) iyən Əli(ə) şəvi nimədə aşığonə iyən arifonə nımojon şoyd be,həmməysə bənav bə ibodəti əhəmiyyət doydəbe. Xido-Rəsul(s) ıştə əzizə kinə ım xısləti həxədə hamyedə:”bə Xıdo imon bə Zəhro(s) con iyən dıli jıqo nufuzış kardə be ki,bo Xıdo ibodətiro ıştəş çı həmmə kəsiku fariğ(coş)kardəbe”.islomi peyğombər(s) ki,zıneydəbe Zəhro(s) çanədə bə ilahi mığəddəsə zoti eşğış heste,əve hamyedə:”çımı kinə Fatmə(s) dınyo həmməysə çokə jene.çımı bədəmi poə,çımı dıli miyvə və  ruf və rəvone.əv insoni cismədə qıləy huriye. Çoko ki,əv ibodəti mehrobədə mandedə,çəy vucudi nur bo osmoni məlayikon dəvəşeydə iyən vavriski doydə. Xıdovənd bəvon xitob kardedə:çımı bandə bıvindənən ki,çımı mığobilədə bə nımoj mandə və çəy bədəm çımı əzəmətiku larzeydə və əv bə ibodəti ğərğ bıə.şoyd bıbənən ki,Fatmə(s) rostə tərəfdoron cəhəndımi əzobiku əmonədə ğərolım doe”....

Həzrət Muhəmməd(s)-i vardə əslə islomi fərhənqədə ki,Fatməye-Zəhro(s) əyo tərbiyəş vindəbe,harçənd de hestemoni aləmi Xalıği irtibat və rabitə çı qıləy məxsus iyən erjinə məğamikuye.əmmo,çoko ki,bə kəmol rəseydə və bəçəy əhəmiyyəti əlovə beydə ki,deəy paralel bəştə məxloği dığğət çı yodo benışo. Ğasbu həm bəçəy xotoye ki,Kərimə-Ğıronədə nımoj,zəkot və ya nımoj iyən infoğ iyande kəno zikr bıə. həzrət Fatmə(s) jıqo qıləy məktəbiku perəsəbe və deməkə ki,çə həzrəti jimon vey sodə be və qahi vaxti ixtisodi cəhəto vey yavə şərayitədə jimon kardedəbe,hiçvaxti ehtiyocinə fərdon iyən vəşyanə odəmonku ğafil nıbin və hejo bəçəvon koməki səmt şeydəbin.Cabir ibn Əbdulla Ənsari  votedə:”rujon qıləyniyədə əsri nımoji bədiqə qıləy zəyifə cussəninə piyəmerd de kanə oləti ome bə məçit daxil be.Xıdo-Rəsul(s) bəy dimış qəte və çəy holiku xəbəş se.ərzış karde ki,ləvəm təye və az vəşyanim,çımı luzi sikə. ehtiyocım heste.qıləy ço bəmı ətokə və mı bə qıləy oləti həm ehtiyocim heste.Peyğombər(s)bə Bilali hamyeşe ki,əy bəçımı kinə Fatmə(s) kə bobə ta çəy ehtiyocon bərtərəfko.əvon ivrədə bə həzrəti kə səmt hərəkət kardeşone.həmonə piyəmerd ıştə qırd ehtiyoconku sehbət kardeşe və bəhs kardeşe.həzrəte Fatmə(s) çəy amuyəkinə bəy hədiyyə kardə qıyozəş bəy baxşeşe və hamyeşe:”əy bəhvat və ıştə ehtiyocon bərtərəfkə.ın macəra məsey bədiqə Əmmar Yasir rəyrə de qıləy çokə ğeyməti çəykuş hıriye və çəy qırd ehtiyoconış bərtərəfış karde.həmonə merd ijən bə Xıdo-Rəsuli(s) xıdmət oqarde.həzrəti çəyku dəparseşe ki,aya ıştı ehtiyocon bərtərəf be? ərzış karde ki,de Fatmə(s) əto kardə çi bərəkəti ısət az be ehtiyoc bim.Xıdoku piyedəme ki,bə Fatmə(s) qıləy çi ətokəy ki,nə çəşi vindəşe və nə qıləy quşi əvış məsə. Xıdo-Rəsuli(s) bəştə əshobi hamyeşe:”Xıdo həmonə bın dınyoədə jıqo qıləy çi bə Fatmə(s) ətoş kardə.zira bənə mı qıləy pı,bənə Əli(ə) qıləy jimoni həmro və bənə Həsən iyən Hueyni fərzəndonış bəy ətoş kardə”.....

Fatmə(s),çə həzrəti jimoni həmro iyən fərzəndon nəyinki,addiyə şərayitədə,bəlkəm vey saxtə şərayitədə həm cokəson bəsə ıştəsə bənav zıneydəbin və ıştə əsosə ehtiyoconku dəvardedəbin.İbn Əbbos votedə: ”Həsən(ə) iyən Huseyn(ə) noxəş bin.Peyğombər(s) deştə çandə nəfər səhobə bəçəvon iyodəti şin və bəvon osəşon ğande və bə Əli(ə)-i hamyeşe:ha Əbul-Həsən ha!boştə fərzəndon  şiforo qıləy nəzrkə. Əli(ə) ,Fatmə(s) və bə kali rəvoyəton əsos Həsən iyən Huseyn(ə) həm voteşone ki,əmə nəzr kardedəmon iyən rujə bəqətemon.qıləy kamə zəmon dəvarde ki,əvon şifoşon pəydu karde.Fatmə(s)  i mığdor cəvə nunış bo iftori pateşe.iftori vaxti qıləy sayil iyən peçınə şəxs bəçəvon kə ome və voteşe:bə peyğombəri xıyzoni uzvon Xıdo səlom bıbu.az vəşyanim.bəmı tikəy xorək bıdənən.əvon həmmə həmonə miskinə sayilışon bəsə ıştəsə bənav qəteşone və ıştə nuni səhmışon bəy doşone və de təyliyə ovi iftroşon karde.dıminə ruji bəştə nəzri əsos rujəşon qəte və boştə iftoriro hozzı kardə nunışon bəçəvon kə omə və çəvonku komək tələb kardə qıləy yətimi doşone.ım dəfə həm əvon isarışon karde və ıştə coniku dəvardin və ijən de ovi iftorışon karde...