Ilahi Rəhbəron-47

Ilahi Rəhbəron-47

Fatmə(s),çə həzrəti jimoni həmro iyən fərzəndon nəyinki,addiyə şərayitədə,bəlkəm vey saxtə şərayitədə həm cokəson bəsə ıştəsə bənav zıneydəbin və ıştə əsosə ehtiyoconku dəvardedəbin.İbn Əbbos votedə: ”Həsən(ə) iyən Huseyn(ə) noxəş bin.Peyğombər(s) deştə çandə nəfər səhobə bəçəvon iyodəti şin və bəvon osəşon ğande və bə Əli(ə)-i hamyeşe:ha Əbul-Həsən ha!boştə fərzəndon  şiforo qıləy nəzrkə. Əli(ə) ,Fatmə(s) və bə kali rəvoyəton əsos Həsən iyən Huseyn(ə) həm voteşone ki,əmə nəzr kardedəmon iyən rujə bəqətemon.qıləy kamə zəmon dəvarde ki,əvon şifoşon pəydu karde.Fatmə(s)  i mığdor cəvə nunış bo iftori pateşe.iftori vaxti qıləy sayil iyən peçınə şəxs bəçəvon kə ome və voteşe:bə peyğombəri xıyzoni uzvon Xıdo səlom bıbu.az vəşyanim.bəmı tikəy xorək bıdənən.əvon həmmə həmonə miskinə sayilışon bəsə ıştəsə bənav qəteşone və ıştə nuni səhmışon bəy doşone və de təyliyə ovi iftroşon karde.dıminə ruji bəştə nəzri əsos rujəşon qəte və boştə iftoriro hozzı kardə nunışon bəçəvon kə omə və çəvonku komək tələb kardə qıləy yətimi doşone.ım dəfə həm əvon isarışon karde və ıştə coniku dəvardin və ijən de ovi iftorışon karde.seminə ruji həşi ğurubi zəmonədə əvon iftor kardeyışon piyedəbe,qıləy əsir ome,çəvon bəş kuye və çəvonku koməkış tələb karde.deməkə ki,əvon vey vəşyan iyən ləvəşon təy be, əmmo ijən ıştə cəvə nunışon bə həmonə əsirişon doe,çəy ehtiyocışon təmin karde və ıştən de ovi iftorışon karde.əvon qıləy holədə ki,se ruj be dumo yənde xorəkışon hardə nıbe və cokəsonışon bəsə ıştə conisə bənav qəteşone.bın zəmon Cəbrəyil bə Peyğombəri(s) nozil be və “Hələta” ya İnsani mıborəkə surə və bə qıləy nəğli əsos çın surə 1ayəku de tosə 8-ə ayəon bo ə həzrəti ğiroətış karde və voteşe: Xıdovənd de jıqo qıləy xıyzoni bətı təhniyyət və təbrik votedə.bın macəradə misoli şoyd və nımunə çın surə 7-9 şərifə ayəonədə ki,hamyedə:”əvon bəştə nəzri bəfo kardedən və qıləy ruj ki,çəy şər və əzob həmmə kəsi dəbəqəte, tarseydən və (ıştə)xorəki bəy ehtiyoc bıə holədə bə miskin,yətim iyən əsiri doydən və votedən:əmə bəşmə Xıdo xoto itam kardedəmon(xorək doydəmon) və şıməku həni hiç qıləy mıkofot iyən təşəkkur çəş kardedənimon”.....

Fatimeye-Zəhro(s) islomi toıxədə min cumlə jenonkuye ki,ziyodə fəzilət iyən kəromətonış bıə.çə həzrəti barzə xısusiyyətonku qıləyni ım be ki,Peyğombəri(s) de şiddəti bə həzrəti ehtırom və məhəbbətış hestebe və bın zəminədə şiyə iyən sınni metəbərə mənbəonədə ziyodə rəvoyəton nəğl bıə.Xıdo-Rəsuli(s) bə Fatmə(s) bıə məhəbbəti əndozə ioyən mığdor bə həddədə be ki,havaxti dılış hestebe səfəko iyən bə qıləy vırə bışon,çə həzrəti sıftənə vindəkəs və osə ğandə kəs həzrəte Fatmə(s) be və har qıləy zəmon ki, səfəku oqardeydəbe çə həzrəti iminə vindemon de həzrəte Fatmə(s) be.çın şiddətinə ehtırom iyən məhəbbəti əsliyə sırr ım be ki,çun Zəhro(s) çı qırd imon iyən əməli komilə ovəynə və məzhər be və mehribonə Xıdo çı Fatmə(s) məhəbbətış çı Xıdo-Rəsuli(s) con,ruf iyən ğəlbədə jıləvoni ğərolış doəbe.çoko ki,Kərimə-Ğıron hamyedə:”həyğətən,imon vardə iyən çok və ləyoğətinə koon əncom doə şəxson,rəyrə mehribonə  Xıdo çəvon eşğ və məhəbbəti dılonədə ğərol bədoye və əvoni mahbub bəkarde”...