Ilahi Rəhbəron-48

Ilahi Rəhbəron-48

Fatimeye-Zəhro(s) islomi toıxədə min cumlə jenonkuye ki,ziyodə fəzilət iyən kəromətonış bıə.çə həzrəti barzə xısusiyyətonku qıləyni ım be ki,Peyğombəri(s) de şiddəti bə həzrəti ehtırom və məhəbbətış hestebe və bın zəminədə şiyə iyən sınni metəbərə mənbəonədə ziyodə rəvoyəton nəğl bıə.Xıdo-Rəsuli(s) bə Fatmə(s) bıə məhəbbəti əndozə iyən mığdor bə həddədə be ki,havaxti dılış hestebe səfəko iyən bə qıləy vırə bışon,çə həzrəti sıftənə vindəkəs və osə ğandə kəs həzrəte Fatmə(s) be və har qıləy zəmon ki, səfəku oqardeydəbe çə həzrəti iminə vindemon de həzrəte Fatmə(s) be.çın şiddətinə ehtırom iyən məhəbbəti əsliyə sırr ım be ki,çun Zəhro(s) çı qırd imon iyən əməli komilə ovəynə və məzhər be və mehribonə Xıdo çı Fatmə(s) məhəbbətış çı Xıdo-Rəsuli(s) con,ruf iyən ğəlbədə jıləvoni ğərolış doəbe.çoko ki,Kərimə-Ğıron hamyedə:”həyğətən,imon vardə iyən çok və ləyoğətinə koon əncom doə şəxson,rəyrə mehribonə  Xıdo çəvon eşğ və məhəbbəti dılonədə ğərol bədoye və əvoni mahbub bəkarde”...

Həmçinin Yolə Xıdo çı qırd peyğombəron miyono fəğət islomi azizə Rəsulış(s) mıstəğim iyən sərostə formədə və hiç qıləy vositə nıbə holədə hamyedə:”vuji şıməku boştə(risolətiro) ğərəz çımı nezə odəmon barədə dustəti (həni)hiç qıləy əcr və mıkofatım piyedəni”.bın ayədə çun ilahi fərmon və əmr miyonədəy, bə Zəhroye-Əthor(s) ki,Əhli-Beyt(ə)-i barizə nımunoənkuye məhəbbət,bə həmməkəsi,məxsusən bə islomi umməti vocibe.həlbəttə,mehribonə Xıdo ıştə çın koyku hədəfış de qıləy co fərmoni ruşin və oşkoş kardə.çun bə peyğombər(s)-i hamyedə:”bıvot:mı boştə (rislolətiro) şıməku hiççim piyedəni illa ikəs ki,bəştə pərvərdıqori səmt qıləy roy bıvıjno”.yəni bə Xıdo-Rəsuli(s) Əhli-Beyt(ə) bıə eşğ iyən məhəbbəti nəticə,ilahi məsir iyən royədə qəm və ğədəm şodeye”.dırıst bə həmonə dəlili xotoye ki,rujon qıləyniyədə Xıdo-Rəsuli(s) həzrəte Fatmə(s) dastış qəte və hamyeşe:”hakəs ki,əy zıneydə və hakəs ki,zıneydəni,ım Muhəmmədi(s) kinə  Fatmə(s) və çımı bədəmi ipoə iyən çımı ğəlb iyən rufe.hakəs bəy əziyyətko mınış əziyyət kardə və hakəs bəmı əziyyətko Xıdoş əziyyət kardə”.coqləyni vırədə bə həzrəte Fatmə(s)xitob kardə holədə hamyedə:”Ha Fatmə ha! Xıdo deştı xoşnudətirozi iyən deştı xışm iyən ğəzəbi ğəzəbnok beydə”........

Coqləyni macəra nışon doydə ki,Xıdo-Rəsuli(s) ıştə Əhli-Beyt(ə) barədə bıə mevğıyyət,aitifi iyən hissi rabitəonsə əlovə,qıləy əğedəvi mevğıyyətış hestebe və həzrət har qıləy hərəkət ki,de ilahi əmr iyən fərmoni bə əməl omeydəbe,Xıdo-Rəsuli(s) de Nəcrani məsihi iyən xristiyanon dini rəhbəron Mıbohilə cərəyon be.əvon de peyğombər(s)-i mınozirə iyən mıbohisə kardey bədiqə,deməkə ki,ə həzrət bəçəvon qırd şubhə və sıvolon cəvobış doe,əmmo ijən əvon ğane nıbin.əmmo Xıdo-Rəsuli(s) ki,bəştə rioləti həxəti qıləy ğoymə imonış hestebe,əve bəvon təklifış doe ta boənən iyande mıbohilə və nifinkəmon.bın tale həlləkə ləzədə Xıdo bəştə Rəsuli jıqo hamyeşe: “vuji boənən əmə və şıməku har qıləyni ıştə fərzəndon, ıştə jenon iyən  əkəson ki,çəmə coni mislədən,vanq bıjənəmon.peşo iyande nifinkəmon və duyəvıjon bə Xıdovəndi nəhləti ğərol bıdəmon”.təyin bıə rujədə qıləy zəmon məsihiyon heyəti mışohidə kardeşone ki,islomi giromiyə peyğombər(s) ıştə fərzəndon miyono Həsən(ə) iyən Huseyn(ə) və jenon miyono həzrəte Fatmə(s) və merdon miyono Əliş(ə) vardə,əvon de şiddəti təəəccıbi dılədə bin və əvon de tars və larzi mıbohilə səhnəşon tərk kardeşone.ım ko oşkoə formədə ımi bəyon kardedə ki,Xıdo-Rəsuli(s) bə Əhli-Beyt(ə) bıə eşğ iyən məhəbbət  məxsusən bə həzrəte Fatmə(s) bıə məhəbbət,bə ilahi iyən osmoni usulon əsos be....