Ilahi Rəhbəron-49

Ilahi Rəhbəron-49

Coqləyni macəra nışon doydə ki,Xıdo-Rəsuli(s) ıştə Əhli-Beyt(ə) barədə bıə mevğıyyət,aitifi iyən hissi rabitəonsə əlovə,qıləy əğedəvi mevğıyyətış hestebe və həzrət har qıləy hərəkət ki,de ilahi əmr iyən fərmoni bə əməl omeydəbe,Xıdo-Rəsuli(s) de Nəcrani məsihi iyən xristiyanon dini rəhbəron Mıbohilə cərəyon be.əvon de peyğombər(s)-i mınozirə iyən mıbohisə kardey bədiqə,deməkə ki,ə həzrət bəçəvon qırd şubhə və sıvolon cəvobış doe,əmmo ijən əvon ğane nıbin.əmmo Xıdo-Rəsuli(s) ki,bəştə rioləti həxəti qıləy ğoymə imonış hestebe,əve bəvon təklifış doe ta boənən iyande mıbohilə və nifinkəmon.bın tale həlləkə ləzədə Xıdo bəştə Rəsuli jıqo hamyeşe: “vuji boənən əmə və şıməku har qıləyni ıştə fərzəndon, ıştə jenon iyən  əkəson ki,çəmə coni mislədən,vanq bıjənəmon.peşo iyande nifinkəmon və duyəvıjon bə Xıdovəndi nəhləti ğərol bıdəmon”.təyin bıə rujədə qıləy zəmon məsihiyon heyəti mışohidə kardeşone ki,islomi giromiyə peyğombər(s) ıştə fərzəndon miyono Həsən(ə) iyən Huseyn(ə) və jenon miyono həzrəte Fatmə(s) və merdon miyono Əliş(ə) vardə,əvon de şiddəti təəəccıbi dılədə bin və əvon de tars və larzi mıbohilə səhnəşon tərk kardeşone.ım ko oşkoə formədə ımi bəyon kardedə ki,Xıdo-Rəsuli(s) bə Əhli-Beyt(ə) bıə eşğ iyən məhəbbət  məxsusən bə həzrəte Fatmə(s) bıə məhəbbət,bə ilahi iyən osmoni usulon əsos be....

Harçənd həzrəte Zəhro(s) ıştə hırdənəti zəmoniku de tosə ıştə kırtə umri devroni çı Xıdo-Rəsul(s) iyən Əli(ə)-i jimoni tel iyən şinə ləzəon və həmmə etat-petatonədə iştirokış hestebe,əmmo Əli(ə)-i Ğədiri-Xumədə de Xıdovəndi əmri və de Xıdo-Rəsuli(s) vositə bə imomət iyən xilofəti mənsəb və məğami vıjniyə zəmoniku,Fatmə(s) çın ləzə və aniku qıləy sanqin iyən nuyə məsuliyyətış ıştədə ehtədə hissış karde. Həzrəte Zəhro(s)  çın ləzəku Əli(ə)-i ıştə jimoni həmroku əlovə,həmçinin ıştə imom iyən rəhbər həm hisob kardedəbe ki,bəpe qırd iştimoyi,mədəni,siyosi,ixtisodi iyən ciohodi ərsəonədə bəy tabe bıənin iyən pemandənin be və çı həzrət Əli(ə) hərəkət kardə məsir iyən royədə qəm iyən ğədəm şodənin be.......

Həzrəte Zəhro(s) bəştə nığılə əndişə iyən bəsirəti əsos,deştə vində  dəlilon çımiku norohət be ki, novbənobı islomi ummət deməkə ki,Ğədiri-Xumədə de Əli(ə)-i beyətışon kardəbe,bəştə əhd-peymoni bəfoşon nıkarde və Əli(ə)-şon coyli haşte və çı dini kəmol iyən ilahi nemətonku iborət bıə imomətio ro bə inhirofi səmt bışıkırnon.məələsəf çı həzrəte Zəhro(s) ım norohətçəti jəqo həm dıroz nıdəkəşe.məxsusən çə zəmoniku ki,Xıdo-Rəsuli(s) noxəşə yonquyədə be və rujbəruj çə həzrəti vəzyət bevəc beydəbe tayinki,ə həzrəti bə İlahi dəvəti ləbbəykış vote və ıştə dınyoş əvəz karde.joqo ki,çə həzrəti rehləti zəmondə fəğət bənə Əli(ə),Səlman,Mığdad iyən Əbuzəri bıə çı peyğombəri(s) çandə qılə səhobəon çə həzrəti əmandə səhobəon həmmə de Ğədiri-Xumi torıxi ğəhrəmonəti çı viro bekardey,peyğombəri(s) mıborəkə bədəmışon vadoe və bə Xıdo iyən çəy rəsuli əmr iyən fərmoni nıpemandin və bo islomi camiyə qıləy co xəlifəşon təyin karde.....

Bo həzrəte Zəhro(s)bə jıqo qıləy şərayiti təhəmmul kardey iyən tov vardey jıqo sanqin iyən qon be ki, oxoyədə ə həzrət noxəşbe və bə yonqu eqıniye.əmmo,məsuliyyəti hiss kardey əvış orom iyən sakitış nıkarde və bo umumi fikon vəzyəti ruşin kardero de Bəni-Haşımi jenonku idastə ki,çə həzrəti kənoyədə bin və ə həzrəti əhotə kardə holədə bə məçit daxil bin.bo ə həzrəti qıləy pardəşon ehaşte və qıləy holədə ki,peyğombər(s)-i firoğ iyən coəti əvış betov iyən behol kardəşbe və beixtiyor ıştə çəşi arsi rukardedəbe və bəmedəbe,ıştə sıxanış bino karde  və hamyeşe:”Xıdovəndi Muhəmmədış(s) məbusış karde ta çəy əmri bə oxo bırosno və çəy hukmış bə icroş varde və çəy hədəfış əməli surətədəş karde.millət ıştə dinədə pərokəndə bin və çı kufr iyən cəholəti dılədə suteydəbin.əvon bıton pərəstış kardedəbin iyən bə pərvərdıqori təlimoton qıləy dığğət kardedənıbin.çən,de Muhəmmədi(s) vucudi bərəkəti toykiyətiyon ruşin iyən cəholət iyən nodonətiyon bərtərəf be.çı gicəti iyən səhfi pardəon çəvon çəşon vəyku peqətey be.çımı pı bo milləti hidoyəti xoto ğıyomış karde və kuyədılon çəşonış oj karde və bə islomi dini səmt və bə rostə roon tərəf hidoyətış karde.peşo Xıdovəndi ıştə peyğombəri barz iyən pokə rufış de qıləy mehribonəti iyən ixtiyor və rəğbəti bə aliyə mələkuti bardeşe.ısət  çımı pı çın dınyo bədbəxtiyonku asayişədəy və axırəti dınyoədə de məlayikon mənuse və qıləy holədə ki,çəy əbaxşə Xıdo əvış ıştə rizvani məğamədə ğərolış doə,əv ilahi ğurbədə jimon kardedə”.....