Ilahi Rəhbəron-51

Ilahi Rəhbəron-51

Torıxədə nəğl bıə ki,həzrəte Əli(ə) buzurquvarə inə Fatmə binti Əsəd nəv manq be ki,hamilə be və ıştə azizə hırdəni vilodəti zəmonış hiss karde.əve rəyrə bə Kəbə əzəmətinə kəy səmt hərəkətış karde və deçəy xolisonə təvofi koy məşğul be.təvof iyən Xıdo kəy qırdo qardey bədiqə ıştə ehtiyoci dastonış bə yolə Xıdo dərqo rostış karde və de ixlos iyən xuzu oxonə dərəcə de dıvo məşğul be və ıştə çəşi arsi ru kardə holədə çı Kəbə Xıdoku xahiş kardedəbe ki,çəy erjinə fərzəndi vilodəti boəy hostonko və əy bo həmməkəsi mıborəkko.bın barədə vardəşone ki,həmonə təğvanin iyən vohidə Xıdo pərəstış kardə yolə banu jıləvoni zumzumə kardedəbe:”Xıdolim ha! mı bəştı vohidəti imonım heste və bə qırd osmoniyə kitobon ki,tı deştə peyğombəron vığandə bovəm heste və bə həmmə peyğombəron ki,tı bo milləti hidoyət və nicoti xoto məbusı kardə,imonım heste.Xıdolim ha!tı bəştə peyğombəron hurməti xoto və bəştı dərqoyədə bıə mığərrəbə firiştəon xoto və bəçımı vucudədə ofəyə ım ğeymətinə hırdəni əzəməti xoto ki,ısət çəy vilodəti an və ləzəon rəsə,çımı çımı azizə hırdəni zandemon iyən vilodəti doji bomı hostonkə.....

Jıqo qıləy mənəvi fəzoədə ilahi həmməysə sırrinə hodisə bə əməl om və tohidi məbəd bıə Kəbə kanə divo əyo hozzı bıə kəson çəşi vədə poə be və çı Kəbə mevludi inə bovə nıkardə holədə bə Xıdo kə dılə daxil be.çın heyrətamizə hodisə bədiqə həmonə divo ijən bastey be,bənə ıştə sıftənə holəti be və de Xıdovəndi inoyət və koməki həmonə hırdən bə dınyo ərsə ğədəmış noe. həmməysə əcibə çi ım be ki, deməkə ki,çın sırrin iyən odəmi bə heyrət vardə hodisəku çandə əsron dəvardə,əmmo ijıən Kəbə “Mustəcar” səmtədə çəy poə be bıey əsər və riz mandə ki, hociyon bəştə səmt cəlb kardedə və Həcci qlobal konqresi bərpo kardə zəmonədə ziyodə mığdorədə bıə hociyon,təvofəkəyon iyən de ibodəti məşğul bıə kəson bın mığəddəsə məkonədə de ın hodisə sırron məşğul beydən və ıştə ğəlbi çiyon bə həyğət rəsey Xıdovəndi dərqoyədə tələb kardedən....

Həmonə əcibə hodisəku se ruj dəvarde və çın hodisə xəbəon qəv bə qəv çı Məkkə iyən çəy ətrofədə bıə vıronədə pevolo be.Fatmə binti Əsəd hələ ijən Xıdo Kə iyən Kəbədəbe və bo Kəbə Kə bə oj kardero kilidon vardey həm hiç qıləy foydəş nıbe.ğəflətən Fatmə qıləy holədə ki,ıştə hırdənış ağuşədə qətəbe,çə həmonə dəşə və poə bıə divo vırəku ijən hejo çəyu xaric be,beşe. idastə millət heyrət və niqəronəti dılədə bin,bəçəy səmt hərəkətışon karde ta ın macəra çəy ıştən zıvoniku bıməson.Fatmə binti Əsəd bəvon dimiış qəte və voteşe:”ha millət ha!Aziz iyən Yolə Xıdo ıştə ofəyə məxloği miyono mış vııjnişe ıştə dərqoyədə mış bəsə navnə jenonsə barzətiş baxş karde”.bın əzəmətinə ləzədə Əbu Tolıb bəştə buzurquvarə jimoni həmro vəy beşe və bəyış xoşə sıxan vote.çən,peşo ıştə tojə bə dınyo omə fərzəndış bəştə dastış qəte və bəştə sinə iyən dıli dəçokneşe. Səhih bın zəmon be ki,məhəbbət iyən ozodəti peyğombər(s) çı royku rəse ome və əvış bəştə vanqoş qəte və dim iyən çəkutış pusə karde və Barzə Xıdo bə ın mıborəkə mevlud iyən hırdəni xoto həmdo-sıtoyişış karde.

Demiyən Əli(ə) cımə ruji de Rəcəbə manqi senzəminə ruji mıtobiğ “Ammul-Fili” vağiyə və hodisə si sor bədiqə yəni qıləy sor ki,çı ilahi ğudrəti mığobilədə Əbrəhə ləşkəri məğlub bıə sor be.Əli(ə) bın ruji bə hestemoni aləmi ərsə poş noe və deştə vucudi nuri dınyoş ruşin karde…. Əli(ə) hejo ıştə jimoni sıftəku de peyğombəri(s) bə ico be.qıləy zəmon çı Əbu-Tolıbi jimon bə Məkkə ğəhəti iyən hışkəsori xoto de muşkilon dimbədim be və çəy məişət vey şiddətin be.Xıdo-Rəsul(s)-I təklifış doe Əbu-Tolıbi bıvon bo jimoni bo çəy duşiku sıvık kardero çəy fərzəndonku çandə qılə bəştə kəon bıbon.çən,ilahi həkimonə məşiyyət və irodə ım be ki,Əli(ə) bə peyğombəri(s) kə şe və Xıdo-Rəsuli(s) tərbiyə jiyədə ğərolış qəte.