Ilahi Rəhbəron-52

Ilahi Rəhbəron-52

Əli(ə) hejo ıştə jimoni sıftəku de peyğombəri(s) bə ico be.qıləy zəmon çı Əbu-Tolıbi jimon bə Məkkə ğəhəti iyən hışkəsori xoto de muşkilon dimbədim be və çəy məişət vey şiddətin be.Xıdo-Rəsul(s)-I təklifış doe Əbu-Tolıbi bıvon bo jimoni bo çəy duşiku sıvık kardero çəy fərzəndonku çandə qılə bəştə kəon bıbon.çən,ilahi həkimonə məşiyyət və irodə ım be ki,Əli(ə) bə peyğombəri(s) kə şe və Xıdo-Rəsuli(s) tərbiyə jiyədə ğərolış qəte.

Peyğombəri(s) çı həzrət Əli(ə) ruşd iyən tərbiyədə çəy jimoni həssosə devronədə qıləy məxsusə rolış bıə və çı Xıdo-Rəsuli(s) bə həzrəti bıə məhəbbəti ibzor kardeyış,ə həzrət ıştən ıştə əzəmətinə “Ğasiyə” xutbədə elonış karddə:”şımə çımı çı peyğombəri(s)palu mevğıyyət iyən məğami bəçımı bəy nez iyən məxsusə mənziləti xoto zıneydon.hırdənəti zəmonədə ə həzrət mıni bəştə vanqo qəteydəbe və bəştə sinə dəçokneydəbe və ıştə vırədə hıtovneydəbe.joqo ki,çəy xoşə bu hiss kardey beydəbe.əv xorəki cuyedəbe və loğmə-loğmə bəçımı qəv dənoydəbe.mıku duyə qıləy sıxanon nıməse və nə qıləy xəto iyən səhfə koon vinde.mı hejo çəy dumo bim.bənə qıləy ıştə mo şıtiku co kardey bıə şaturi hırdəni ki,çəy dumo vitedəbim,deəy bə ico bim.har ruj çı peyğombəri(s) əxloği məkarimiku bəhrə bardedəbim.tıbğe çə həzrəti fərmoni və dayima bəy pemandedəbim”…..

Im mislış nıbə tərbiyəvi ro Əmirəlmuminini(ə) yolə rufədə vey zumand iyən vey çokə təsirış noe və mislış nıbə osmoniyə muəllimi elmi sayədə bə ruşd iyən kəmoli mərhələon rəse.ım tale həlləkə iyən əzəmətinə devron dəvarde tayinki,Xıdo-Rəsul(s) Hira bandədə  de İlahi mığərrəbə firiştə Cəbrəyili nozil bıey bə nıbuvvəti məğami məbus be.Əli(ə)  həmonə muhim iyən osmoniyə hodisə bardə jıqo hamyedə:”ğərəz Xıdo-Rəsuli(s) iyən Xədicə kə hiç qıləy kədə islomi roş pəydu kardəş nıbe.mı çəvon seminə qıləyni bim və vəhyi ruşinəti vindedəbim iyən nıbuvvəti mələkutiyə ətri bu hiss kardedəbim”.(Xutbə-192)…

Bəle Əli(ə)  bın həssos iyən torıxi ləzədə həmməkəsisə bənav dəşe iyən iminə merd be ki,islomış ğəbul karde.ə həzrət bın barədə hamyedə:”mı iminə kəs bim ki,de peyğombəri(s) bə ico islomım varde.(İbn Əbil Hədid,3,253.)və ya hamyedə:”az iminə kəsim ki,de Xıdo peyğombəri(s) bə ico nımojım votə”.(İstiab,2,458).və həmçinin qıləy şeyri ğolibədə hamyedə:”bə zəmon ki,millət şırk iyən exrocəti zəloləti nığılətiyədə  əsir bin.mı bə peyğombər(s) iyən bəçəy osmoniyə dəvəti imon vardeme və əvım təsdığ kardeme”.(Mətalibus-Sual,11).

Xıdo-Rəsul(s) həzrət Əli(ə) ın yolə iftixori isbot kardə holədə hamyedə:”əv iminə kəse ki,bəçımı risolət iyən dəvəti imon vardeşe və iminə şəxse ki,ğıyoməti ruji deəy dimbədim bomem və ıştə dasti çəy dasti sape bənom.əv “Sıddığe-Əkbər” ya həmməysə yolə rostəvıjə şəxse ki,bə islomi imonış vardə”.(Mustədrəke- Hakim,3,136)…..