Ilahi Rəhbəron-54
Ilahi Rəhbəron-54
İslomi Azizə Rəsul(s) bə Ğureyşi əyan-əşrafə hakimiyyət iyən cohiliyyəti əsri toykiyyəti,ixtisodi fəğrəti iyən fərhənqi,əxloği iyən iştimoyi suğuti və bə bıtpərəstəti dəlili xoto,bo islomi dini təblığiro qıləy çokə şərayit mevcud nıbe.bə həmonə dəlili xoto,peyğombər(s) bə risoləti məbus bıey bədiqə Xıdovəndi tərəfiku bəy əmr be ki,se sori mıddətədə məxfiyonə ıştə nezə odəmon bə islomi səmt dəvətko.bın zəminədə vəhyi firiştə və mələk bəy ibloğış karde,rosneşe:”və ənzir əşirətəkəl əğrəbin….ıştə nezə odəmon bıtorson”.(Şuəra-214) çın ayə bədiqə peyğombər(s) bə Əli(ə) hamyeşe:”Xıdo bəmı əmrış kardə ki,ıştə nezə odəmon bəçəy bandəçəti iyən pərəstışi səmt dəvətkə.qıləy pəs zibhkə və I mığdor nun və şıt həm hozzıkə.Əli(ə) de peyğombəri(s)əmri çıl ıştə nezə odəmonku dəvətış karde ki,əvon həmmə Xıdo-Rəsuli(s) ziyofəti sufrədə huzurışon pəydu karde və de ləyoğətinə tərzi ğəbul kardey bin.çoko ki,Rəsuli-Əkrəm(s) ıştə sıxanış bino kardeyış piye,Əbuləhəbi voteşe:əv şıməş sehr-coduş kardə və şıməni şımə əbo-əjdodi məsir iyən royku bə diyəro kardeyış piyedə.deçəy ım sıxanon məclis aşuftə be və bəyənde qıniye və Xıdo-Rəsuli(s) ıştə nəzə və tələbış bə həyğət rosne nızneşe.çən,peşo ijənıştə xışavənd iyən nezə odəmonış dəvətış karde və əvon ijən bə Xıdo-Rəsuli(s) məhzəri şərəfyob bin……
Bın torıxi ruj iyən ləzədə Əli(ə) bə Xıdo-Rəsuli(s) canişinəti iyən vəsiy məğami mənsub be və ım tale həlləkə imtiyoz fəğət bo ə həzrəti ğeyd bıə.həyğətədə peyğombər(s) de qıləy navi vindey və bə qıləy plani əsos,bın fikədə be ki,de zəmoni dəvarde iyən iştimoyi fiki hozzı kardey bo Xıdovəndi tərəfiku bıə nıbuvvəti roy dəvom pəydu kardey iyən İmom Əli(ə)-I imoməti lozım bıə zəminə hozzı kardey ,dılış hestebe ki,islomi umməti ayəndə iyən vəomədə bo bəhonə dumo bıə kəson qıləy vırə nımando.co tərəfiku həm Əli(ə) ki,həmonə hırdənəti devroniku çı Xıdo-Rəsuli(s) kənoyədə tərbiyəş vindəbe,perəsəbe ,təbiiyə formədə bə ə həzrəti qıləy məxsusə eşğ və məhəbbətış hestebe.co tərəfiku həm çun mışohidə kardedəbe ki,çəy azizə pı Əbu Talıb çokonə peyğombəri(s) nığo doydəbe iyən mıhofizə kardedəbe və norohət be ki,məbodə çı deşmınon tərəfiku bəy qıləy zərəlo-ziyon bırəso.əve ə həzrət deştə buzurquvar iyən azizə pı bə ico dayima bənə qıləy hıvoskə və muhafizi çı peyğombəri(s) kənoyədə be və ə həzrəti muhafizə kardedəbe….
Besətiku se sor bədiqə Xıdo-Rəsul(s) de ilahi fərmoni tohidi dəvət iyən osmoniyə risolətış oşko karde və həmmə kəsonış bə islomi dini səmt iyən boəy ğəbul kardero dəvətış karde.çın ləzəku Ğureyşi əyon-əşraf iyən şırk və kufri yolon bə peyğombəri(s) təzyiğ və təhdidon şiddətin be. Əli(ə) qırd bın saxtə ləzəonədə hejo de peyğombəri(s) bə ico be ta yinki, Xıdo-Rəsul(s) de ilahi vəhyi roy vositə aqahətiş pəydu karde ki,çəy saxtə deşmınon qıləy şurədə bə ğərol omin ki,ə həzrəti bə ğətl bırosnon və bə həmonə dəlili xoto,de ilahi fərmoni peyğombəri(s) bəşəvnəy Məkkəku bə Mədinə hicrətış karde ta de deşmınon məkrinə planon və hiyləon vəy qətey bə ico,bəştə risoləti dəvom bıdo və çı islomi pevolo bıey zəminə hozzıko……
