Ilahi Rəhbəron-57

Ilahi Rəhbəron-57

Peyğombər(s) ki,çı deşmıni bo ə həzrəti bə ğətl rosnero bıə planiku xəbədo be və zıneydəbe ki,əvon çəy ratədən və bəçəvon hərəkəton nəzorət kardedəbe,noçor mande ki,ıştə nezə odəmonku idastə min cumlə Fatmeyi-Zəhro(ə) Məkkədə bıhaşto və ə həzrət ıştən bə Mədinə hicrətko.həlbəttə,ıştə hicrəti kəno bə Əli(ə) qıləy məxsusə məmuriyyət ış asparde və çəyku tələbış karde ki,çəy palu bıə əmonəton bəçəy soybon oqordıno və deçəy nezə odəmon bə ico bə Mədinə boon və bə Xıdo-Rəsuli(s) mulhəğ bıbon.bə həmonə əmri əsos,Əli(ə) de Peyğombəri(s) əhli-beytiku idastə həzrəte Zəhro(s) və çə həzrəti moə Fatmə binti Əsəd çəvon cəmədə be,de idastə de tos ısət hicrət kardey nızınə co mısılmınon bə ico,şəvi nimədə bə Mədinə səmt hərəkətışon karde….

Co tərəfiku həm Ğureyşi casuson de Əli(ə)-i sərdorəti bıə mıhociron kərvoni hicrətiku aqah bin və deçəvon təğibi koy məşğul bin.əvon bə həmonə mıhociron rəsey bədiqə çəvon de Əli(ə) miyono qıləy tınd iyən təhdidamizə sıxanon bə miyon ome və nəticədə bə əməl omə yavə vəzyəti nəticədə Əli(ə)-i hissış karde ki,çəy ğərəz islom iyən mısılmınon namuson həddiku mıdofiyə kardey həni co ro mandəni və bə həmonə dəlili xoto,bə həmonə casuson və deəvon bə ico bıə kəson dimış qəte və voteşe ki,ehanə şımə ıştə coniku si bıəyon,bəvədə boənən bənav.əvon çoko ki,ğəzəb və ğeyz Əli(ə)-i simadə vindeşone ,ıştə mevğıyyətiku bə dumo pekırin və hiç qıləy canq və dave nıkardə holədə bə omə roy səmt oqardin.....

Peyğombəri(s) bə Mədinə daxil bıey bədiqə çə ə həzrəti iminə torıxi ğədəm,Ğoba məçiti soxtey be ki,ə həzrət ıştən de mısılmınon bə ico çəy soxtey iyən bə ərsə vardeyədə cəhdış karde.ım məçit Ğoba məntəğədə çı Mədinə şəhri neziyədə soxtey be.Peyğombəri(s) de əzəməti bə Mədinə şəhri daxil bıey,de ə həzrəti əmri Mədinədə de Məscidun-Nəbiyy nomi məşhur bıə qıləy məçitış soxteşone və təsis kardeşone ki,çın məçiti koy oxoyədə ə həzrəti iyən mıhocironku i dastə boştə çı məçiti kəno otağonışon soxte və ıştə har qıləy otağiku bə məçiti səmt qıləy bəş oj karde ki,nımoj iyən zəruri vaxtonədə şıey-omeykon.çən,de I mıddət zəmoni dəvardey,Xıdo-Rəsuli(s) tərəfiku əmr ome ki,ğərəz Əli(ə)-I otaği bə məçiti səmt oj bıə qırd bəon bastey bıbon.çə həzrəti əshob deməkə ki, zıneydəbin ki,ilahi əmr nıbə holədə hiç qıləy koy əncom nibədoe və bə vırə nibərosne,əmmo ijən de etırozi zıvoni voteşone ki,çıro bəmə əmr karde ki,ıştə otağon bəon dəvastənən,əmmo çı Əli(ə) kəybə ojı haşte?. Peyğombər(s) çəvon cəvobədə hamyeşe:”mı ıştəku qıləy kom nıkarde ki,şımə kəon bəon dəvastom və Əli(ə) kəybə ojkom.bəlkəm,ım çı Həx-Təala nəzə be ki,Əli(ə) kəybə oj bımando və şımə kəybəon bastey bıbu”….

Peyğombəri(s) stratejikə siyosətonku qıləyni çı mısılmınon miyono rabitəon mehkəm kardey be ta çı qıləy mıştərəkə etığodi,əxloği,mədəni iyən ixtisodi cəhəton şua jiyədə qıləy zumand iyən vohidə camiyə bə əməl biyo.jıqo ki,əvon çı iyande mığobilədə məsuliyyət hisskon və çı jimoni qırd etat-petatonədə bə iyande komək və peşt bıbon.boçımi əsos İslomi azizə Rəsul(s) əmrış karde ta çı har dı qılə Mıhocir iyən Ənsaron miyono uxuvvət iyən bıvəti rabitə bərğərolko.ım əhd-peymon   rəsmi iyən səthi nıbe,bəlkəm qıləy məsuliyyət ofəyə və təəhud vardə mığovilə be və bəpe bəçəy əsos qırd zəminədə bə iyande koməkkon və iyande ğəm iyən şoyvonəti zəmonədə şərik bıbon.de Peyğombəri(s) ım erjinə hərəkəti ğəflətən Əli(ə) de bəmə çəşon bə Xıdo-Rəsuli(s) ərzış karde ki,ıştə əshobı de iyande bıvə karde və çımı de cokəson miyono hiç qıləy bıvəti və boəti əhd-peymonı nıdəbaste və mını bəçımı ıştən holi vadoe.bın ləzədə Peyğombəri(s) bə Əli(ə) dimış qəte və hamyeşe:”tı çımı dınyo iyən axırəti bıvəş”.