Təkfiri cərəyonon

Təkfiri cərəyonon

DAİŞ iyən deəvon həmfik bıə co təkfiri qrupon təxrib kardə məkononku qıləyni ğəbıston iyən məzoronin. ım qıləy holədəy ki,əhlı-sınnəti kitob iyən mənbəonədə əhli-ğuburu ziyorət kardey mıstəhəb bıey barədə ziyodə hədison omə və mevcude.ziyorətqohonədə huzur pəydu kardey iyən torıx ofəyə və məşhurə şəxson ğəbon ziyorət kardey,çəvon nomon zehnonədə bəyji kardedə və insoni bə dırıstəti,ədolət tələbəti iyən bə mənəvi kəmolaton səmt sovğ doydə.de ın ğəbon mışohidə kardey insoni zehni bə jimoni oxo iyən axırəti səfə dəğandedə.çoko ki,İbn Macə Sunənədə peyğombəre-əkrəmiku(s) nəğl bıə:”Zuurul ğubur fəinnəha tuzəkkirukumul axirə.ğəbon ziyorətkənən ki,axırəti bəşmə yod dənoydə”.de ın tərtibi peyğombəri(s) bə ğəbon ziyorət kardey bıə tevsiyə ki,bo insoni veyə təsirış heste,de bənə DAİŞ təkfiri iyən terroristə dastəon təxrib kardə çiyon ziddiyyət təşkil doydə.

DAİŞ terroristə qrup ıştə rəsmi nəşriyyə bıə Dabiğədə de”Ğıyoməti ruji bənav nokəçəti bəyji kardey” nomo qıləy məğalədə bə İraği Səncar şəhrədə bıə İzədiyon jen iyən hırdənon nokə kardey koy de iftixori sənədi və çı islomi çı viro beşə baxşi bəyji kardey nomi elon kardedə.bın məğalədə omə:”islomi devlət de ın əməli islomi şəryəti bə inhirofi səmt kəşə bıə qıləy cəhətış bə qıləy səhih iyən dırıstə mənoş varde....mışrikə xıyzoni nokə kardey hevujə mığyosədə,çı islomi şəryəti ğanuni tərk kardey bədiqə ehtımolən iminə kərəy ki,icro kardey beydə.ımon kamə məğdorədə bıə bıtpərəstonin ki,bə şəytoni ibodət kardedən”.məğalə dəvomədə omə:”çən,İzədi jenon deçəvon fərzəndon bə ico qətey və bə şəryəti əsos çı Səncər şəhrədə de İzədiyon canq kardə islomi devləti(DAİŞ) mıborizon miyono təğsim kardey və çəvon pencədə i hissə de xomsi nomi bə islomi devləti təhvil doey be”.

İMT nımoyəndə Zeynəb Bancura çı de DAİŞ terroristə qrupon vositə nokə kardey bıə jenon yavə vəzyətiku ıştə hisobotədə ,çı jenon həxədə dəhşətinə hoziyətiş de miyonə əsri hoziyəton bərobərış zınə.əv çı DAİŞ-i bokirə jenon ixtiyorədə ğərol doey həxədə vədəonış çın terroristə dastə xarici kişvəronku mıcohidon cəlb kardero bıə şivəonku hisobış kardə.DAİŞ ım jenonış çı Nikah cihodi çərçivədə de 500 ila 2000 dollar ğeyməti həvatəşone.nokə kardey bıə jenon və bə kardə bıə təzavuzon həxədə vey telə hisoboton doey bıə ki,har qıləy ozodi tələb kardə insoni ruf iyən coni lorzıneydə və norohət kardedə”....

Faciyə iyoe ki,DAİŞ qırd ım cinoyəton yəni jen iyən kinon əsir qətey və bəvon təcavuz kardey de islomi nomi və çı yodo bekardey bıə islomi şəryəti bəyji kardey hisob kardedən.ım qıləy holədəy ki,İslom hiçvaxti nokəçətiş təsis kardəni və çım koy binovrəş noəni və adət de islomi zuhuri bə bəşəri camiyə daxil bıəni.İslomi zuhuri çandə həzo sor bənav nokəçəti bəşəri camiyədə rəvocış pəydu kardəş be və de bənə qıləy merısi nomi çın nəsliku bə omə co nəsli irs mandedəbe.nokəçəti qıləy metode ni ki,islomi əvış bekardəşe ta boçəy dəvomiro isror bıko.çı peyğombəri(s) iyən çı islomi iminə dərəcədə bıə şəxsiyyətonku bo nokəçəti pevolo kardero hiç qıləy cəhd bıəni.liza holı-hozırədə nokəçəti bəyji kardey iddio kardə DAİŞ terroristə dastə,əslədə islomi çəy rəğ-rişə bırniye dumo bıə və ısət həm ləğv bıə ım adəti bəyji kardey dumoye. İslom çı ozodəti iyən hurriyyəti dine və bandəçəti fəğət çı Xıdovəndi mığobilədə rəvo zıneyydə. qıləy din ki,fəğət çı fərdon barzəti meyari fəğət ubudiyyət,bandəçəti iyən Xıdovəndi təğva sayədə zıneydə və qıləy fərdi co qıləy insoni boştə nokə ğərol doey ğəbul kardedəni.bəçəy xoto,islomədə qıləy co insoni ozodəti çəy dastiku sıey qıləy baxşə nıbə qıno bə hisob omeydə.Xıdo-Rəsul(s) hamyedə: ”həmməysə yavə insonon əvonin ki,çəvon ko insonon hıriye və həvateye”.və həmçinin hamyedə: ”Xıdovənd har qıləy qıno bəbaxşe illa (seqlə qıno).ikəs ki,ıştə jimoni həmro mehriyyə inkorko ya qıləy koəkə həxı ğəsbko və ya qıləy ozodə insoni bəhvato”.bə ın hədisi əsos jenon iyən koəkəyon həxı ğəsb kardey və çı qıləy insoni ozoədəti çəy dastiku sıey islomədə seqlə əfv iyən baxşey nıbə qıno hisobışon kardə....