Ilahi Rəhbəron-62

Ilahi Rəhbəron-62

Bə mısılmınon de Ğureyşi kofiron miyono bıə “Hudeybiyyə” sulhi mığovilə əsos çəvon həxışon nıbe bə iyande ələyh hərbi hərəkəton əncom bıdon və ya ıştə muttəfiğon bəçəvon zidd rost kardey  iyən bəvon de cokəson canqonədə həm komək kardey həxışon nıbe.əmmo Ğureyşi sərdor iyən yolon deştə mıttəfiğonku qıləyni bıə Bəni Bəkr təchiz kardey iyən çəvon bə mısılmınon mıttəfiğ bıə Xuzaə həmlə kardey,komilə surətədə “Hudeybiyyə” sulhi maddəonışon darışte.zohirən Ğureyşi əyon-əşrof ıştə dumo yənde bıə məğlubiyyətışon çı viro bekardəbe və həni zıneydə nıbe Mədinə həni penc sor bənav çı mıhocir iyən ənsari mığdori kam bıə şəhr nıbe. Mədinə şəhr bə islomi hukuməti mərkəzi təbdil bıəbe ki,çı islomi jimon baxş kardə təlimon şua jiyədə de peyğombər(s)-i ağılmandə rəhbərəti əyo qıləy əsosinə təhəvvul iyən əvəzon bə vucud oməbe.jıqo qıləy şərayitədə Xıdo-Rəsul(s) çı Ğureyşi ıştə əhd-peymoni darıştey qıləy tale həlləkə ğərolış bekarde və de islomi ləşkəriku da həzo nəfəri təchiz kardey deştə şəxsən rəhbərəti bo Məkkə fəth kardeyro bə çın şəhri səmt hərəkətş karde.....

Mədinədə Ğureyşi casusonku qıləyni,İslomi ləşkəri hərəkəti vindey bədiqə,bə Ğureyşi kofirə yolon jıqo qıləy noməş nıvışte:”...Xıdo-Peyğombər(s) de bənə şəvi toykiyəti kutlə de surəti bəşmə səmt omeydə”.ın casus ıştə noməş bə qıləy jeniş doe ta ım xəbə bə Ğureyşi yolon bırosno və əvoni çı Muhəmmədi(s) ləşkəri hərəkətiku aqah və xəbədoko.peyğombər(s) deçəvon hərəkəton rəsəd və nəzorət kardey,çəvon xəyonətkorə planiku xəbədo be və Əli(ə) tələbış karde ki,nomə bə Məkkə rəsey koy mane bıbu.Əli(ə) rəyrə həmonə jenış təğib karde və çəyku tələbış karde ki,həmonə məktubi təhvil bıdo.həmonə jen sıftədə mığovimətış nışon doe,əmmo tikəy dənıvarde ki,həmonə jeni ıştə səymu miyono niyon kardə həmonə noməş bekardeşe və təhvilış doe və demiyən Ğureyşi kofiron çı İslomi ləşkəri bə Məkkə səmt bıə hərəkətiku bexəbədo mandin.nəhoyətən,Xıdo-Rəsuli(s) da həzo nəfərinə ləşkər bə Məkkə şəhri nezi omin rəsin və İslomi əzəmətinə ləşkər hiç qıləy mığovimət nıvində və xun runıkardə  holədə de qıləy əzəməti  və cəh-cəloli  bə Məkkə daxil be....

Peyğombər(s) Məkkə fəthi bədiqə de Məkkə əhali iyən de İslomi ğəddorə deşmınon nəyinki, bənə rəsmi fatehon əməlış nıkarde,bəlkəm qıləy umumi əfvış elon karde və de humanist iyən insondustə hərəkəti,çı Məkkə milləti ğəlbonış həm fəthış karde.çoko ki,peyğombər(s) bə Kəbə kəno rəse,deştə dastədə bıə dırozə çu bə Hubəl,Əsaf və Nailə bıtonış je və əvonış məhf karde. peşo Kəbə pentono bıə bıtış vinde və bə həzrət Əli(ə) hamyeşe:”mı mandəm tı pedat çımı kulisə və həmonə bıti eğand bəsə zəminisə”.demiyən Kəbə ijən sənibəton bə vohidə Xıdo pərəstəti mərkəzi təbdil be və Məkkə sakinon ıştə əsorəti jiyədə oqətə və çı nokəti amil bıə mırdolə bıtonku təmiz kardey be.....

Məkkə fəth kardey çı mışrikon dılonış lorzıne və və bəçəvon conon qıləy tarsış eğandə.liza Tayifi dıqlə muhimmə ğəbilə yəni Həvəzan iyən Səğif,de coqlə kali ğəbiləon mızokirə bədiqə bə ın nəticə rəsin ki,İslomi ləşkər bəçəvon səmt hərəkət nıkarde,de İslomi ləşkəri canq kardero hozzı bıbon.de ın hədəfi əvon qıləy dıjdə ləşkərışon cəm karde və çın ləşkəri sərkərdəti bə qıləy canqəkə iyən nıtarsə fərd bıə Malik ibn Ofv Nəsri aspardışone və de İslomi ləşkəri dimbədim omeyro bə ın ləşkəri səmt hərəkətışon karde.