Sıə Irfon-2

Sıə Irfon-2

Şəhodət İslomi dini fərhənqədə həm umumi və həmənxısusi mənoədə oko doey beydə.Şəhodət xısusi mənoədə Xıdo royədə canqi kıştə bıey ki,çəy həm İslomi fiğhədə qıləy məxsusə hukmonış heste. məsələn,şəhidi bə ğosl iyən kəfəni ehtiyociş ni,bəlkəm de həmonə xunə oləti dəfn beydə.Şəhodət umumi mənoədə bə qıləy insoni kıştə bıey votedən ki,ilahi vəzifə bə vırə rosnə royədə bıə.bəçəy xotoye ki,islomi rəvoyətonədə  omə ki,çandə qılə dastə şəhid çı dınyoku şeydə və bə şəhidi məğami rəseydə.əvvəl,ikəs ki,  elmi omutey royədə çı dınyoku bışo,dıminə kəs ə kəse ki,noxəşə holədə çı dınyoku bışo,həlbəttə,de ın şərti ki,bə aləmon pərvərdıqor,peyğombəre-əkrəm(s) və çə həzrəti əhli-beyti(s) qıləy mərıfətış bıbu və seminə kəs ə kəse ki,boştə moli mıdofiyə kardero çı mıhocim iyən hucuməkəyon mığobilədə mandedə və peso kıştey beydə….

Şəhodəti məğami bəyonədə və İslomi nəzəku şəhid məğami,İmomonku(ə) nəğl bıə rəvoyəton həm ziyodə əhəmiyyətış heste və şəhidi nımunə umumi mənoədə vey ruşin kardedə.çoko ki,bə kali maqon həm şəhodət şomil beydə və harçənd həyğiyə şəhodət Xıdo royədə kıştey mənoədəy,əmmo co maqon həm mevcude ki,de qıləy şərayiti şəhodəti hukmədə bıey bəzıne.məsələn,Xıdo-Rəsuliku(s) rəvoyət bıə ki, hamyəşe:”ikəs ki,boştə xıyzoni mıdofiyə kardero məzlumonə formədə kıştey bıbu,şəhide və ikəs ki,boştə molon hifz kardey xoto məzlumonə surətədə kıştey bıbu,şəhide və ikəs ki.boştə hamsuyə mıdofiyəro məzlumonə surətədə kıştey bıbu,şəhide…və ikəs ki,bo ıştəni mıdifyə kardey xoto,kıştey bıbu,şəhide”…….

Çın rəvoyətiku jıqo dərəsey beydə ki,ziyodə fərdon şəhodəti məğamədə şərikin.həlbəttə,Xıdovəndi palu har qıləy şəhidi tafutinə məğam və dərəcəş heste.zira,bə həmonə dərəcə rəsey yeqanə ro,Xıdo royədə kıştey ni,bəlkəm Cihode-Əkbərədə mıcohidət kardeye ki,əv həm ıştə əmmorə nəfsi etosney mənoədəy. Cihode-Əkbər ki,ilahi evliya və məsumə imomon(ə) rəvoyətonədə de əmmorə nəfsi mıcohidət kardey mənoədə bə hisob omeydə,qıləy barzə dərəcəş hesteki,mumkine ım dərəcə bəsə Xıdo royədə kıştey bıə cihode-əsğəri dərəcəsə həm barz və bəpe bıbu.Xıdo royədə kıştə bıə şəhidon ıştən həm dərəcə və məğamon həm farğ kardedə və əvon həm iqlə rutbə və dərəcədə nin və ın dərəcəon co kardə çi,çəvon Cihode-Əkbərədə bıə təzkiyə nəfs və botıni təhorət və pokətiye…..