Sıə Irfon-7

Sıə Irfon-7

Iyoe ki,Bəğərə mıborəkə surə 251-ə şərifə ayə nozil bıey hikməti de ruşinə formədə  dərəsey beydə ki,Xıdovənd hamyedə:”vələov la….və ehanə Xıdovənd milləti bəzi qıləyni de coqləyni dəf kardəş nıəbe,zəmini fəsod dəqəti.əmmo,Xıdovənd bə aləmon nisbətədə lutf iyən ehsonış heste”.çın ayəku sərəse beydə ki,zəmini tohidi dini ğayim mande və Xıdo zikri bəyji mande və zəmin iyən çəy əhli fəsodi vəy qəteye.de ım şərtiye ki,Xıdovənd de muminon dasti dini deşmınon və çəvon fitnəon dəf kardedə və ım ko çı Xıdovəndi bə həmməkəson bıə fəzl iyən rəhməti nışonəonkuye.

İslom qıləy zəmon ki,bə cihodi əmr kardedə,həni bəvədə hiç qıləy həlli roy mandedəni.islom de camiyə kali fosidə uzvon çı miyoniku bardey,çı camiyə əmandə uzvon səlomətəti təzmin beydə...

Şəhodət çı insoni vey barzə hədde.islomi mədəniyyətədə məxsusən təşəyyuədə həmməysə vey erjin iyən vey boho ğeymətinə əməl,həmməysə barzə hərəbaxtəti,həmməysə barzə məğam, həmməysə dıjd və çokə feyz və bə şəhodəti feyzi rəseye.bo şəhidi həmməysə əzəmətinə vaxt,ə saate ki,bənə qıləy ğalibi de deşmıni dasti bə qıləy şərofətinə maqi nayil beydə.

Şəhid təşəyyu məktəbiku təcəssım pəydu kardə və bo həmmə bəşəriyyəti qıləy ulqu iyən meyare. Şəhid əkəse ki,deştə şinə coni fido kardey,İslomi do sirob kardedə və çı fəsodi rəğ-rişə bırniyedə. Şəhid çı camiyə mığovimət iyən dinamikəti təzmin kardedə və bə camiyə qıləy rufi zərfiyyət baxş kardedə və çəy zəyifəti iyən sıstəti çı miyoniku bardedə.həyğətədə “şəhodət tələbəti” fərhənq çı dini etığodi həmməysə barzə erje ki,çəy nəticə həm insoni kəmole və Şəhid qıləy insone ki,deştə camiyə islohi hədəfi və fəğət ıştə məbudi rizoyəti xoto,maqi de iştiyoği və şovği ğəbul kardedən…

Kərimə-Ğıron ziyodə ayəonədə muminon Xıdo royədə boştə coni  fido kardero vanq jeydə.çoko ki,Tobə mıborəkə surə 41-ə şərifə ayədə hamyedə:”və cahidu …deştə molon və coni Xıdo royədə cihodkənən və ım boşımə veyçoke,ehanə bızınon”.ruşine ki,cihod İlahi məlayikon və mığəddəsə dini mıdofiyə kardey və bə İlahi dini barzəti səbəb bıə qıləy royədə ıştə coni fido kardeye.qıləy Xıdovənd ki,çəy mol,con,fərzənd iyən xıyzonış bo insoni hozzış kardə və əy bə qırd kayinati mısəxxər və mısəllətış kardə,zıneydə ki,boçəy bandə insoni kom çi vey çoke. bəçəy xoto,məzkur iyən zikr bıə ayədə hamyedə ki,ıştə con iyən moliku dəvardey,bo insoni vey çoke……..

Xıdovənde-Aləm Kərimə-Ğıroni ziyodə ayəonədə de muminon vositə ıştə con iyən moliku dəvardey,de Xıdo koməki iyən bə ilahi əhd-peymoni bəfo kardey nom noə bıə.çoko ki,Əhzabi mıborəkə surə 23-ə şərifə ayədə omə:”minəl-mumininə….muminon miyono qıləy merdon hestin ki,bəştə de Xıdo bıə əhdi səpe sodiğonə surətədə mandən.çəvon bəzi qıləyniyon ıştə peymonışon bə oxo bardə(və çəy ro bə şəhodəti rəsən)və kali qıləyniyon intizorədən və hiçvaxti ıştə əhd-peymonədə qıləy təbdil iyən əvəzəti doəşni”.