Sıə Irfon-8

Sıə Irfon-8

Xıdovəndi royədə muminon con doey,bənə qıləy nəzri ədo kardeye ki,bo Xıdovəndi nəzədəşon qətə.bın ayədə işorə bıə çı muminon vədə və nəzr,Xıdo royədə şəhid bıeyku qıləy kinayəy. demiyən Xıdo royədə ıştə coni fido kardey,ıştə əhdi piyo sədoğət nışon doeye ki,muminon de Xıdo iyən deçəy rəsuli  əjhd bastey koyədə,bo Xıdo din iyən çəy rəsuli mıdofiyə kardeyro, hiçvaxti ıştə peşti bə deşmıni qordıneydənin.bəçəy xoto,ım şərifə ayəku dərəsey beydə ki,Xıdo royədə şəhodət bə dini hifz kardey və bə ilahi əhdi bəfo kardey boyis beydə ,de veyçokə formə mumkin beydə və Subhonə Xıdo əy tarif,təmcid iyən təhsin  kardeydən….

İslomi torıx ıştən çı qırd ım mıcohidət iyən fədokorətiyon nışon doə ovəynəy və “leylətul-Məbit” çın vağiyə və hodisəonku qıləyniye.torıxi mənbəonədə omə:”de peyğombəri(s) milləti bə İslomi səmt dəvəti bəştə barzə həddi rəsey,Ğureyşi kofiron çı Əbu Tolıb(ə) maqi bədiqə,binoşon karde bə mısılmınon əzob-əziyyət kardey və əvoni məcbur kardedəbin ki,ta çı islomiku dast bıkəşon. peyğombər(s) ki,vindeş çı mısılmınon con təhlukədəy,de Yəsribi əhli əhd-peymon bastey bədiqə, əmrış karde ta mısılmınon bə həmonə diyori hicrətkon.əvon de çandə qılə qədə dastəon fomə, mərhələ bə mərhələ və məxfiyə formədə çı Ğureyşi çəşiku bə diyəro,bə Yəsrib hərəkətışon karde.Ğureyşi kofiron bə peyğombəri(s) dəvəti ələyh bıə ıştə oxonə çorə roy pəydu kardey koyədə bə ğərol omin ki,ə həzrəti bə ğətl bırosnon.

Xıdovənde-Xalığ ğeybi royku bə peyğombəri(s) çı mışrikon yavə planiku xəbəş doe və bə həzrəti əmrış karde ki,bə Yəsrib hicrətko.Xıdo-Rəsul(s) ıştə hicrəti bənav ım mevzuş bə Əli(ə) voteşe və Əliku(ə) tələbış karde ki,çə həzrəti vırədə bıhıto.Əmirəl-Muminin Əli(ə) həm ıştən Nəbəvi məktəbədə tərbiyəş vində iyən perəsə şəxs be,de ojə ağuşi ım koş ğəbul karde….

Mışrikon ım məkrinə planon bədiqə,ıştə həmləşon bino karde.əmmo,əvon Əlişon(ə) çə həzrəti vırədə pəyduşon karde və dərəsin ki,Xıdo-Rəsul(s) bəşəvnəy nəyinki,ıştə kə,bəlkəm həm Məkkə şəhrış tərk kardə.İmom Əli(ə) bın cərəyonədə bıə con-foəşonəti  anəndə yolə həddədə be ki, Xıdovənde-Aləm Bəğərə mıborəkə surə 207-ə şərifə ayədə çə həzrəti ım fidokorəti təmcid və tarif kardedə və hamyedə:”və minənasi…millətiku bəziyon ıştə coni bo Xıdo roziyəti xoto həvatedən və Xıdovənd bəştə bandəon nisbtədə mehribone”.