Ilahi Rəhbəron-67

Ilahi Rəhbəron-67

Xıdo-Rəsul(s) deştə nezə odəmon bo mıbohilə kardero bə mıəyyən bıə məkoni səmt hərəkətışon karde.ə həzrət Huseynış(ə) ıştə vanqoyədə və Həsəni(ə) dastış həm qətəbe navədə şeydəbe və həzrəte Fatmə(s) iyən Əli(ə) Xıdo-Rəsuli(s) peştono hərəkət kardedəbin.Nəcrani ğəbilə yolon çı mıbohilə bənav bə iyande voteşone ki,ehanə Muhəmməd(s) de maddi əzəmət iyən zohiri ğudrəti ome,çəy nıbuvvət iyən həxətiyədə şəkkənən.əmmo,əgər mışohidəyon karde ki,çı harcurnə cəh-cəloliku bə diyəro və sodə şikilədə ome,şək məkənən ki,əv çı Xıdo peyğombəre. məsihi iyən xrisytiyanə alimon  hələ ıştə sıxanışon oroxnəşon nıbe,ğəflətən peyğombəri(s) nuroniyə çehrəşon mışohidıə karde ki,deştə çoqlə nezə odəmon omeydən.Nəcrani heyəti yolon çı təəccıbi dılədə mandəbin və  de çoçinəti bə iyande erəxeydəbin.əvon vindeşone ki,ə həzrət deştə iqlə azizə kinə və deştə məsumə fərzəndon və həmçinin Əli(ə) həm çəvon palu bo mıbohilə kardero omən.həmmə kəs həm zıneydəbe ki,ə həzrət bə həzrəti Əli(ə) çokonə məhəbbətış hestebe.Nəcrani heyəti yoli ıştə daston bə ğıç qətəd holədə voteşe:mı qıləy çehrəon vindedəm ki,ehanə əvon dast bo dıvo kardero bə osmon rost koon,mumkine əmə həmmə məhf bıbəmon bışəmon.vey çoke ki,əmə mıbohilə koyku dast bıkəşəmon və ım ko məkəmon.əvon bə ğərol bekardeşone və ıştə təklifonışon bə peyğombəri(s) elon kardeşone və ə həzrəti həm çəvon təklifonış ğəbul karde.

Mıbohilə daston və bın barədə nozil bıə qıləy ayə torıxi dırozi bo şiyə dınyo vey fəzilətin iyən iftixor ofəyə qıləy sənəde.zira ayə ləfz iyən mufrədat ımi bəyon kardedə ki,de peyğombəri(s) bə ico bıə kəson çı fəziləti kom dərəcədə və mərtəbədə ğərolışon qətə.bın ayədə çı peyğombər(s) kinə həzrəte Fatmə(s) fərzəndon Həsən(ə) iyən Huseyniku(ə) əlovə,Əli(ə) de “Ənfusəna” yəni de peyğombəri coni nomi təbir bıə.çımisə vey yolə fəzilət nibəbe ki,isnon mənəviyyat iyən fəzilət cəhəto bə qıləy barzə məğami bırəso ki,Yolə Xıdo əy de peyğombəri con iyən rufi nomi təbirko……

İslomi har ruj ziyod bıə nufuz,ım fırsətış icod kardeşe ki,peyğombəri(s) islomi ğudrəti şuaş hevuj karde və çı islomi tohidi inğılobış bə co kişvəron sadirış karde.peyğombər(s) de ın məğsədi ıştə Məaz ibn Cəbəl nomo səhobəonku qıləyniş bə Yəmənış vığande ta çı tohidi nido və sədo və islomi dini usulon bo çə sərzəmini milləti təbyin və izohko.Məazi bo çə vırə milləti bə islomi səmt cəzb kardeyro ziyodə cəhdonış karde,əmmo bın koyədə qıləy ovandətiş pəydu nıkarde və bə Mədinə oqarde.peşo peyğombəri(s) xalid ibn validış bo islomi təblığiro bə həmonə məntəğə vığandeşe.əv həm şəş manq bədiqə bo milləti bə islomi səmt dəvət kardey koyədə mıvəffəğ nıbe və bə Mədinə oqarde.nəhoyətən,islomi-peyğombər(s) de həzrəte Əli(ə) dəvardə torıxiku aqah bıey,ə həzrətış vanq je və dıvo kardey bədiqə,hamyeşe:”cəhd bıkə çı məntıği ğıvvə iyən deştə husni rəftori milləti bə rostə roy səmt hidoyətkə”....

Əli(ə) çoko ki,bə Yəməni marzi noxtə  ome rəse,islomi ləşkəri səfış  bə səmonış dənoe və sıbhi nımojış deəvon bə ico iğoməş karde,voteşe.peşo çı Yəməni hıəmməysə dıjdə ğəbilə bıə Həmdani ğəbilə qırd fərdonış bo peyğombəri(s) məktubi məsero cəmış karde və de bə tohidi ayini səmt dəvəti məzmuniku iborət  bıə ın noməş boəvon handeşe.ə həzrət İlahi həmdo-səno bəpeştə ıştə sıxanış bino karde vəjıqo qıləy cəzbəkə,məntıği iyən usuli surətədə islomış boəvon izoh və bəyonış karde ki,əvon həmmə bə ə həzrəti kəlomi təsiri ji dəşin və qırd əvon i ruji mıddətədə islomışon varde və mısılmon bin.Əli(ə) ım cərəyonış de qıləy nomə vositə bə peyğombəri(s) xıdmət rosneşe və Xıdo-Rəsul(s) vey xoşhol iyən şo be,ıştə səş bəsə səjdə noe və ilahi şukrış bə vırə rosne.

Həzrət Əli(ə) çım de səbarzəti pur bıə məmuriyyət və vəzifə əhəmiyyəti həxədə ım vəs kardedə ki,Yəməni millət de komilə ozodəti islomi dinışon ıştə rəsmi dinışon ğəbul karde və mısılmon bin....