Təkfiri cərəyanon

Təkfiri cərəyanon

Cihodi nikohi de terroristə təkfiriyon dastə bə Suriyə otəş jıey bədiqə,bə meydon beşe.kali vəhhabi muftiyon bo mısılmonə kinə iyən jenon cəzb kardero və bəvon təcavuz kardeyro, cihodi kəlməşon bo təkfiri terroriston cinsi tələbon təmin kardey xoto,sadir kardeşone ki,ımon bə islom təlim iyən hukmon əks qıləy fətvoonin.DAİŞ təkfiri iyən terroristə qrupon çəvon şəytoniyə tələbon mığobilədə mığovimət nışon doə har qıləy jeni qərdəni jeydəbin və əvoni edom kardedəbin.çandə da qılə mısılmon iyən ğeyri-mısılmonə kinə iyən jenonış de ın tərtibi bə ğətl rosnəşone.bə təkfiriyon ğeyri-əğlani iyən nodırıstə nəzəon əks,islomi bə jenon bıə nəzə,komilən lətif iyən insoni qıləy nəzəy.de islomi dəvəşə həşi pemey,ım humanistə din de cohiliyyə zəmonədə çı jenon barədə bıə qırd adət və ğanunon mıborizə bardedə.qıləy zəmon ki,bə dınyo omə kinə toyfəon bəyji-bəyji bə qur kardedəbin  və jenon bənə qıləy inso i ne,bəlkəm əvoni bəsə har qıləy məxloğatonsə həm saru qəteydəbin və əvoni təhğır kardedəbin.islomi jenış bənə qıləy govhəri insonış hisob karde və əvış de merdon i səviyyədə qətışe.Kərimə-Ğıron bə jeni de merdi insoni cəhəti mısovi bıey işorə kardə holədə Nisa mıborəkə surə 1-ə şərifə ayədə hamyedə:”ya əyyuhəl....ha məxloğ ha! Iştə pərvərdıqoriku bıtarsənən,əkəs ki,şıməş iqlə nəfsiku(coniku)ofəyəşe və şımə jimoni həmroonış həm şımə(cinsiku) ofəyəşe və çə dıqləku ziyodə merdon iyən jenonş mıntəşir iyən pevolo kardəşe”....

Həzrəte Muhəmməd(s) çı jenon həxon həxədə de cohiliyyə fikon de şiddəti mıborizə bardedəbe.bə həmonə dəlili xoto,ıştə əzizə kinə həzrəte Fatmə(s) məğam iyən vırə bəpe bardedəbe və əy əziz qəteydəbe.peyğombər(s) bə ə həzrəti ziyodə ehtırom noydəbe və votedəbe ki,çəy pı bəy fido bıbu. həzrəte peyğombəri(s) ım rəftor cohiliyyə adət-ənənon darıştey və hırd kardey mənoədə be.Buxari ıştə Səhihədə vardəşe ki,Peyğombəre-Əkrəmi(s) hamyəşe:”fatmə çımı bədəmi ipoəy.hakəs əy ğəzəbinko, həyğətədə mınış ğəzəbinış kardə”.

İslom hejo və həmmə holonədə  çı jeni vırə və məğamış əziz qətə və bəy qıləy erjış doə.həzrət Əmirəl-Muminin(ə) jeni məğami tevsifədə əy bə qıləy lətif və zərifə jeni təşbihış kardə və hamyedə:”innəl mər`ə....  jen qıləy(lətif və zərifə)vıle və nəyinki,(pəhləvon və)ğəhrəmon”.həzrət ıştə bın sıxanədə bə jeni rufi lətofət iyən zərofəti işorə kardedə.təbiiye ki,de jeni bəpe mıloyim iyən deçəy lətifəti və zərifəti mınosib hərəkət kardey bıbu.çəvon ğudrətiku xaric bıə sanqin iyən hoziyə koon bəçəvon ehdə noey lozım ni.qıləy camiyədə ki,bə kinə fərzəndi soyb bıey  ar və ayb zıney beydəbe və kinə toyfəon bəyji-bəyji qurədə dəkandey beydəbin,peyğombər(s) çın cohili nəzəon mığobilədə mande və hamyeşe: ”xəyru....şımə fərzəndon həmməysə çokə qıləyni,şımə kinonin”.

Imruj ehanə ğərbədə de jeni mısovi iyən bərobər qətey nomi,çı bəşəri jimoni həmmə cəhətonədə əvoni bənə qıləy məsrəf bıə məhsuli reklam kardedən və pornoqrafiyə iyən kino sənayeədə çəvonku de bənə qıləy əmtəə cinsi suyi-istifodə kardedən.aləmi bın tərəfədə de İslomi nomi və İslomi qırd təlimaton əks de jeni jıqo rəftor kardedən ki,hiç de heyvonaton həm jəqo rəftoron kardedənin.çı təkfiri qrupon bə jeni bıə nəzə kifoyət kardedə ta  çın anti-islom iyən anti-bəşəri cərəyoni həyğiyə mohiyyət oşko və məlum bıbu.təkfiri dastəon məxsusən çı DAİŞ-i çı jenon barədə bə İslomi zidd və yavə hərəkətonku qıləyni həm cihodi nikohe.Cihodi nikoh inev fətvoy ki,iminə kərə 2013-ə milodi sori Suriyə canqi zəmonədə interneti sosyal  şəbəkəonədə iyən virtual aləmədə  pevolo be.Məhəmməd Ələrifi nomo qıləy vəhhabiyə ruhani ım fətvoş ıştə tvitter səyfədəş sadir karde.tıbğe ım fətvo çı jen iyən kinonku tələb bıə ta əvon bışon Suriyədə çı “mıcohidon” cinsi tələbon bə vırə bırosnon.əvon bo Suriyədə bə Bəşəri Əsədi ələyh de silohi canq kardə kəson komək kardeyro bəpe əyo bışon və deəvon çandə saat izdivoc iyən vəyə bıjon ta çı vəhışti roon boştə həmokon”.