Ilahi Rəhbəron-76

Ilahi Rəhbəron-76

Əli(ə) ki,çandə soron canqi meydonədə ıştə conış bəştə dastış qətəbe və bo islom iyən Ğıroni hukmon təsbitiro anədə fədokorətiş karde ta hozzı beydə nıbe de sadə formə ilahu hukm təhrif bıbu və dıminə fərzədə de bənə Əbbos iyən əbu sufyani bıə fərdon beyəti,Əli(ə) xəlifə bıəbe,islomi xilofət həmonə ranqi bəştə peqəti ki,de əbu bəkri bə xilofət rəsey bəştəş peqəte. Zira,çı əbu bəkri həmməysə səmimi iyən nezə dust dıminə xəlifə umər be ki,çandə mıddət bəpeştə çı əbu bəkri intixob iyən vıjnemonış bə yod dənoe və jıqoş vote:”kanət...əbu bəkri bo hakimiyyəti səçın kardey əculonə və təcili be ki,Xıdovəndi çəy şərrış oqəte”....

Bilaxirin Səğifə ğovğa xəlifə vıjniye koyədə bə oxo rəse və əbu bəkr xilofəti hukumətış bə dast qəte.Əli(ə) deştə bəfodorə duston çı hukuməti səhnəku kənoyədə mandin.əmmo,bo vəhdəti oqətey və umum milləti zehni aqah kardero,həni de hukuməti mıxolifətış nıkarde və de mədəni iyən fərhənqi koon məşğul be.Kərimə-Ğıronış təfsir karde və lozım bıə vıronədə ki,cokəson kardey zıneydə nıbin və umdətən iştimoyi muşkilaton  bənə fərdon miyono hukm doey koy məşğul bin.joqo ki,fərdon ıştən çı heyrəti dılədə iyən mot mandedəbin və ə həzrət qahi vaxti bə co dinon alimon şubhəon cəvob doydəbin və ya elmi muşkilaton beyədə bə meydon daxil beydəbe və çı İslomi mığəddəsə hərim iyən Ğıroni hukmon mıdofiyə kardedəbe və de ın tərtibi bəştə fərdi iyən iştimoyi xıdməton dəvom doydəbe.....

İmom(ə) çı mısılmınon miyono qıləy məxsusə imtiyozış hestebe.həm bə peyğombəri(s) intisobi nəzəku və həmən Xıdo-Rəsuli(s) mıxtəlifə vıronədə çə həzrəti fəziləton həxədə hamyə sıxanon milləti məsəşonbin və həmən çə həzrəti bə Ğıron,Hədisi iyən co osmoniyə kitobon bıə bemislə elmi  ğudrət və sayirə...

Bın miyono çə həzrəti coqlə imtiyozış həm hestebe ki,ayəndə soronədə bo xilofəti sarayi işkal icodəkəy və əv həm ixtisodi ğudrət iyən dəroməd be ki,de Fədəki roy vositə bə ə həzrəti rəseydəbe.bın cəhəto xilofəti aparat məsləhət doydə ki,ım ğudrət İmom Əli(ə) dastiku xaric bıbu.zira,ım imtiyoz bənə qıləy elmi iyən imoni imtiyozi nıbe ki,əy çı İmomi(ə) dastiku xaric kardey bıbu.....

Fədək qıləy obod iyən munbitə sərzəmin be ki,çəy de Mədinə bıə fosilə təğribən 140 kilometre.Fədək Ərəbıstonədə sakin bıə yəhudiyon mərkəzonku qıləyni be.çın məntəğə yəhudiyon Xeybəri canqi bəpeştə ğəbulışon karde ki,əvon bəpe kaştemoni sahəon məhsulon nimə ha sor çı peyğombəri(s) ixtiyorədə ğərol bıdon və əvon həm bənə mısılmınon çı İslomi hukuməti himoyə jiyədə jimon bəkardeyn və bəpe bə mısılmınon zidd hiç qıləy hərəkət nıkon.Vağiyə mıborəkə surə bədiqə İsra mıborəkə surə 26-ə şərifə ayə nozil be ki,jıqo hamyedə:”ıştə nezə odəmon,miskinon iyən Xıdo royədə mandə kəson həxon pərdaxtkə, bıdə.peyğombər(s) həm ıştə kinə həzrəte Fatməş(s) vanqış karde ta Fədəki bəy bıbaxşo.əmmo,de əbu bəkri xilofəti bə dast sıey,Fədək çı Əli(ə) jimoni həmro və Xıdo-Rəsuli(s) kinə dastiku sıey be.....