Ilahi Rəhbəron-81

Ilahi Rəhbəron-81

Əli(ə) ki,çok zıneydəbe əvon həmonə millətin ki,bə Ğədiri ğəhrəmonəti etıno kardəşon ni və Səğifədə bekardə bıə ğərolışon səhih zınə,ın torıxi iyən əbədi mandə sıxanon votey bənav hamyeşe:”ehanə mı boşımə   vəzir iyən himoyədor bıbum,vey çoke ki,boşımə əmir ya hukmdor bıbum”.hətto hamyeşe:”əgər şımə ijən mıro vadoon və cokəsi bıvıjnon,de əy mıxolifət nibəkardem”.əmmo,mığdorış ziyod bıə millət beəmonə formədə tələb kardedəbin və İmomi(ə) ğərəz bəçəvon tələbon cəvob doey co çorəş nımande və xilofətış ğəbul karde.Əli(ə) ıştən bın barədə jıqo hamyedə:”şımə çımı daston oj karde və mı əvım bastıme və şımə əvın kəşeyone və az cəmım karde.peşo bənə axuron daxil bıə təşnə şatıron çımı qırdo izdihom kardeyone.joqo ki,çımı məşo çımı poku beşe və çımı əbo çımı duşiku eqıne və zəyifon po bıno mandin.milləti demı bıə beyəti şoyvonəti bəvırə rəse ki,hırdənon həm şo bin və yolə sinnədə bıə kəson həm larze-larze bəçımı səmt rəvonə bin,omin”. 

Əmmo,məələsəf de ziyodə həyəcon iyən iştiyoği bə Əli(ə) səmt omə həmonə millət,çoko ki,hissışon karde Əli(ə) fəğət həx iyən ədoləti bərpo kardey fikədəy və dılış heste çəvon çanqiku çəvon mıft bə dast vardə sərvəton xaricko və təbəğəon miyono zolımonə məsofə  bə oxo bırosno,əve əvon bəştə dini iyən siyosi bəsirəton nıbey dəlili xoto,binoşon karde de İmom(ə) mıxolifət kardey və bə ə həzrəti etıroz kardey.kali şəxson de zohirədə ıştəni bənə xeyrxahon nışon doey,həzrət Əli(ə) palu omin və təklif doydəbin ki,sıftədə de əvon həmkoətiko ta çəy hukuməti rişəon ğoym bıbu,çən peşo islomi hukmon icroko.əmmo,Əli(ə) bəçəvon zohirədə ım xeyrxohə təklifon jıqo cəvobış doe:”şımə mıku tələb kardedon ki,ğələbə de təbiz(farğ noey) iyən sıtəmkorəti bə dast biyəm?mıku piyedəyone ki,ədoləti  bə siyosəti ğıbon bıkom?bə Xıdovəndi zoti ğəssəm  çanədə dınyo dınyoe,jıqo qıləy ko nibəkardem və jıqo qıləy ko qırdo nibəqardem.mı iyən təbiz?az iyən ədoləti poymol kardey?ehanə qırd ım umumi sərvət iyən molon ki,çımı ixtiyorədə və çımı şəxsi mol bıəbe və mı piyəmbe çı milləti miyono əvoni təğsımkom,hiçvaxti təbizi rəvo nıəzınim ta çı bımando ki,ım molon çı Xıdoye və az Xıdo əmonotdorim”...

Jıləvoni həzrət Əli(ə) bə siyosi hay-huyon iyən məxfi iyən punhonə mıxolifəton nəzə nıkardə holədə,de milləti koon məşğul be və de noloyığə fərdon çı koyku bekardey və çəvon əvəzi ko bələd iyən salehə şəxson noey,ıştə usuli iyən əsosə planonı bərnoməş bino karde.bə Ələvi hukumətiqırd məsul şəxson elonış karde ki,əvon bəştə tojə məsuliyyət və vəzifəon bənə qıləy əbzori nəzə məkənən,bəlkəm əy qıləy əmonət bızınən ki,bəpe çəy mığobilədə məsuliyyət hisskon və qıləy ləyoğətinə əmonotdor bıbənən.ə həzrət həmçinin bəştə qırd karquzar və koəvonon sıfarışış karde ki,xəyonətkoron bə vəzifə nınon,sodə jimonkon,bə bo tənğıdəkəyon ojkon və  çı çaplus iyən yaltağon vəy bıqəton.əvon bəpe de umum milləti sərostə holətədə irtibatışon bıbu və şuar nıdoə holədə çəvon muşkilaton həlkon.bəpe məzlumon həxon mıdofiyəkon və bə zolım iyən sıtəmkoron ələyh beşon.bəpe de milləti miyono təfrığə eğandə kəson şiddətinə rəftor bıbu və çı İslomi camiyə vohidəti və ibemoni hifzkənən,oqətənən.qırd ğəzovət iyən mıhokimə koonədə ədoləti usul iyən prinsipon nəzədə bıqətənən və hiç qıləy farğ nınoə holədə məhkəməon bərpokənən.həxı mıdofiyəkən.daxili iyən xarici deşmınon canq icod kardə zəmonədə de təcavuzkoron cohodkənən,canqi meydoniku fərol məkənən.səbarzəti zəmonədə de əsiron humansitə formədə rəftorkon və məğlub iyən zəxmin bıə kəson təğib  nıkon,canqi sıftə binoəkə nıbon və çı ədoləti marz və dayirəku xaric nıbon...