Ilahi Rəhbəron-87

Ilahi Rəhbəron-87

Çın ləzəku dıqlə ləşkəri miyono canq bino be.qahi idastə odəmon formədə,qıləy zəmon həm təkbətək bə iyande həmləonışon karde.canq Hicri-Ğəməri sıvi şəşminə sori Zilhiccə manqi bino be.çokonə ki,manq bə oxo rəse və Məhərrəmə manq bino be,canq bə bə çın manqi hərom bıey xoto,əve bın manqədə canq kardey oqətey be.əmmo imanqnə zəmon bə canqi sənibəton bino bıey mane nıbe və Səfə manqi ijən canqi otəş şuləvər be.həzrət Əli(ə) dahiyonə iyən mudəbbironə rəhbərəti jiyədə iyən de ə həzrəti bəfodorə yaro-yavəron ıştə coniku dəvardey, tədricən həzrət Əli(ə) səbarzəti nışonəon oşko be və muaviyə ləşkər çı məğlubiyyəti astanədə ğərolış qəte.bın həssos iyən tale həlləkə ləzədə əmr as ki.qıləy hiyləgərə odəm be,bo muaviyə ləşkəri dəboxtey vəy qəteyro,qıləy məkrinə planış one və əmrış karde ki,ləşkəri odəmon çı Kərimə-Ğıroni vərəğəon bə nizə səy bıjənon və iddiokon ki,əmə bə Ğıroni tabemon.bın zəmon həzrət Əli(ə) ləşkəri miyono qıləy şəkko-tərdid icod bəbe və çı həzrət Əli(ə) ləşkəri ğələbə və səbarzəti vəy qətey bəbe......

Məələsəf ım şəytoniyə plani qətışe və həzrət Əli(ə) ləşkərədə i dastə bebəsirət iyən sodəlovhə odəmon bəsə ə həzrətisə hucum vardeşone və voteşone ki,əmə həni canq nibəkardemon.Əli(ə) çanədə bəvon hamyeşe ki,natiğ Ğıron azim və çəvon bəsə nizəonsə ejə çi qıləy vərəğisə co çi ni, əmmo əvon ımışon ğəbul nıkarde və ə həzrətışon təhdid kardeşone ki,ehanə tı çı muaviyə xeymə kəno bıə bə Malik Əştəri canqi oqətey iyən oqardey əmri nıdoş,əmə tıni həm bənə osmani bəkıştemon.həzrət Əli(ə) noçor mande inəfərış vığande ta çəy bə Malik Əştəri canqi oqətey iyən oqardey əmri bırosnoy.Maliki bə həmonə nımoyəndə voteşe:tı vindedəş ki,az çı ğələbə və səbarzəti astanədəm.həmonə şəxsi voteşe ki,tı dılı heste səbarz bıbuş və Əmirəl-Muminin kıştey ya əsir bıbu? Malik noçor mande canqış notəmomış haşte və dumo oqarde.əv çoko ki,bə həmonə ıştəni zohirədə bənə mığəddəsə odəmon nışon doə bebəsirətinə rəseyədə voteşe:”ha İraği millət ha! Ha ə millət ki.xar və zılləton ğəbul karde.eya kaş bəmı tikəy mehləton doəbe ta mı səbarz əbim.ha şımə çəkuton pinə bastə kəson ha!az qımon kardedəbim şımə təvilədə ım səjdə əsəron bo Xıdo xotoye,əmmo ısət vindedəm ki,ımon bo dınyo xotoye”.(Təbəri,6-ə cild,səyfə 3332)....

Əli(ə) noçor mande canqi bə oxo rosneyış elon karde və Əli(ə) bəçəy meyli əks bo xəlifə təyin kardero dıqlə ləşkəriku hakimon təyin kardey be ta de hakimiyyəti koy məşğul bıbon.deməkə ki, həzrət Əli(ə) səy kardedəbe Əbdullah ibn Əbbos ya Malik Əştəri bo hakimətiro bıvıjno.əmmo hejo çə usyon əkə odəmon veyni,de ın odəmon ıştə mıxolifətışon nışon doe və navko de həzrət Əli(ə) mıxolifət kardə əbu musa əşərişon səçın karde.muaviyə tərəfiku həm əmr as vıjniyə be ki, əv vey siyosətboz iyən hiyləgərə odəm be.həmonə fərd ki,deştə hiyləgərə plani muaviyə ləşkəri dəboxtey iyən məğlub bıey vəyış qəte.ım dı nəfər çandə manq mızokirəon bədiqə əvoni çəş kardə milləti mığobilədə zohir bin və əbu mosə çı əmr asi hiyləku xəbə nıbey voteşe:çoko ki,az ıştə anqıştə bınə ıştə dastiku bekardedəm,Əli(ə) həm xəlifə məğamiku bekardedəm.peşo əmr as həm bə əbu mosə əşəri doə vədəon əks voteşe:çoko ki,əbu mosə Əliş(ə) xilofəti məğamiku bekardşe,az həm əy bekardeəm və çoko ki,ıştə anqıştə bınə bəştə dast dənoydəm,muaviyə həm bə xilofəti məğami səçın kardedəm....

Bın zəmon qıləy dastə ki,peşo de Xəvarici nomi məşhur bin,demi ıştə mıxolifətışon nışon doe və voteşone:”La hukmə illəlllah2 yəni hakimiyyət və hukm doey fəğət bə Xıdo məxsuse.əvon bəsə həzrəti Əli(ə) –sə hucum vardeşone,bə ın macəra ıştə etırozışon karde və çın koyku tobə kardeşone və çə həzrətiku həm tələb kardeşone ki,əv həm tobəko.ehanə jıqo nıko,bəvədə əvon əy kofir hisob bəkardeyn.həzrət Əli(ə) hamyede:”mı qıləy qınom kardə ni ki,tobəkom.ım şımə biyon ki,bə hiylə eqıniyon və çı həxə cəbhə ğətiyə ğələbə vəyon qəte”.

Çın zəmoni bədqiə Xəvaric bə həzrət Əli(ə) zidd ıştə nuyə hərəkətonışon bino karde.əvon hukmışon de ki,həzrət Əli(ə) mıdofiyə kardə həmmə kəson kofire və əvon binoşon karde boçəvon ğətliro hərəkət kardey.qıləy holədə ki,həzrət Əli(ə) de camaat nımoji bərpo kardey koy məşöul be, əvon bə Kufə məçiti daxil beydəbin və de Kərimə-Ğıroni kali ayəon handey,ə həzrəti bənə kofiri təğdım kardedəbin.nəhoyətən həzrət Əli(ə) təğribən donzə həzo nəfər bıə ım nodononış cəm karde,deəvon sıxanış karde və çəvonku təğribən həşt həzo nəfər ıştə kuyə xusumət və deşmınətiku dastışon kəşe.əmmo,ço həzo nəfər ijən ıştə nohəxə royədə mandin və bə həzrəte Əli(ə) ələyh canqışon elon karde.ım muharibə Nəhrəvoni məkonədə bə əməl omey xoto, hejo de həmonə nomi  məşhur be və əyo təğribən Xəvarici əksəriyyət kıştə bin.çın canqi bədiqə həzrət Əli(ə) bə Kufə oqarde ta de qıləy zumandə ləşkəri hozzı kardey çı muaviyə koy həm bə oxo bırosno.əmmo çand zəmon bədiqə çıxəvariciku mandə se nəfər bə qıləy plani əsos,bo həzrət Əli(ə),Muaviyə iyən əmr asi bə ğətl rosnero hərəkətışon karde.çın se nəfəriku fəğət ibn mulcəm məlun kardeyış zıne bəştə yavə hədəfi bırəso və Hicri-Ğəməri 40-ə sori Rəməzonə manqi nonzəminə şəvi Kufə məçitədə nımoj votə zəmonədə həzrət Əli(ə)-ış de qıləy şımşi zərbə qonə zəxminış karde  ki,se ruji bəpeştə həm çı bəşəriyyəti dınyo ım yolə merd bə şəhodət məğami rəse...