Ilahi Rəhbəron-91

Ilahi Rəhbəron-91

İmom Əli(ə) məzlumonə surətədə bə şəhodət məğami rəsey bədiqə,çə həzrəti yolə fərzənd həzrət İmom Həsən Muştəbo(ə) çı İslomi umməti rəhbərəti iyən imoməti koş bəştə ehdəş peqəte və həmonə royədə hərəkətış karde ki,çə həzrəti buzurquvarə pı həzrət Əli(ə) həmonə roy bə həyğət rosnero ğədəmış şodəbe və ə həzrət çın royku I ləzə həm bə dumo nıpekıre.əv islomi dınyo yolə merd bıə Əmirəlmuminini(ə) de peyğombəri(s) əzizə kinə rabitə iminə səmərə be ki,Hicri-Ğəməri seminə sori Rəməzonə manqi nimədə Mədinə şəhrədə bə dınyo ərsə qəmış noe.Fatimeyi-Zəhro(s) Əli(ə) tələbış karde ki,bəy qıləy nom bıno.əmmo,həzrət Əli(ə) hamyeşe ki,mı çı Xıdo-Rəsuliku(s) bənav nidəbəşem.əvon mıntəzir mandin və çəşışon karde ta Xıdo-Rəsul(s) bəçəvon kə daxil be.ə həzrət sıftədə bəçəy rostə quşi əzon və bəçəy çəpə quşi həm iğoməş hande və bəy Həsəni nomış noe.qıləy ism və nom ki,cohiliyyəti zəmonədə məsə bıə nıbe.jıləvoni Həsən ibn Əli(ə) ki,qıləy əzəmətin iyən pokə xıyzoni nəsliku be,bə dınyo çəşış oj karde…..

Həsən ibn Əli(ə) çə həmonə sıftəku nəyinki,fəğət fəzilətin və pokə insonon bıə ıştə pı həzrət Əli(ə) iyən Fatmə(s) tərbiyəş vinde və çəvonku ziyodə bəhrəş barde,bəlkəm çı peyğombəri(s) məxsusə tərbiyə jiyədə həm perəse,ruşdış karde və çı risoləti xanedani uzvonku qıləyni be ki,çı vəhyi mərkəz iyən fəziləti bə cuş omə sərçeşmə bə hisob omeydəbe.çə həzrəti hırdənəti devronədə vavriski doə cərəğğəon mevcud be ki,çəy vəomədə bıə nuri şuaku xəbə doydəbe ki, çın xanedani əzəməti sırronku aqah nıbə kəson bə təəccıbi vodor kardedəbe.min cumlə qıləy zəmon ki,hələ hırdənəti devroni dəvodıneydəbe,bəştə buzurquvarə yolə pı bıə məclisi daxil be və çı Xıdo-Rəsuli(s) zıvoniku(s) Kərimə-Ğıroni ayəon məseydəbe və əvoni ıştə zehni şəffofə ovəynədə həkk kardedəbe və çoko ki,ıştə mehribonə mı palu omeydəbe,əvoni boəy votedəbe. həzrət Əli(ə) bə kə daxil beyədə,Fatmə(s) həmonə ayəon çoko hestebe hejo jəqo həm bo ə həzrəti nəğl kardedəbe.qıləy ruj həzrət Əmirəlmuminin(ə) həzrəte Zəhroku(s) dəparse ki,tı çokonə çın nozil bıə ayəonku aqahiş?voteşe:çəmə qədə fərzəndiku.Həsən peyğombəri(s) məhzərədə məsə ayəon həmmə bomı nəğl kardedə,votedə…

Xıdo-Rəsuli(s) bə İmom Həsəsni(ə) ziyodə məhəbbət nışon doydəbe və hamyedəbe:”Xıdolim ha! Mı əvım piyedə və tı həm əy bıpyi”.Səhih-Buxari kitobədə İbn Əbbosiku nəğl qıləy hədisədə omə ki,Rəsuli-Əkrəm(s) Həsənış bəştə duşış peqətebe.qıləy holədə ki,hərəkət kardedəbe,qıləy merdi ım səhnəş vinde və voteşe:ha qədə zoə ha! Iştı çokə mərkəbı heste.peyğombəri(s) hamyeşe:”çəy həm çokə rakibı və suvar bıə kəsış heste.Xıdo-Rəsuli(s) səhobəonku qıləyni votedə:”çı muminon qıləyni kəyədə bo xorək hardeyro dəvət kardey bıəbimon.roy nimədə vindeme ki,peyğombər(s) de Həsəni hənək kardey koy məşğul be.peyğombər(s) çı milləti çəşi mığobilədə de dastpoçəti bə tərəf-bın tərəf şeydəbe və ıştə dastonış oj karde və Həsən bın tərəf-bətərəf vitedəbe və Xıdo-Rəsul(s) həm sıreydəbe tayinki,peyğombəri(s) əvış bəştə vanqo qəte, pusəş je və peşo hamyeşe:”Həsən mıku və mı çəykum.Xıdo bıpyişe hakəs ki,Həsəni bıpo”. həmçinin rəvoyət bıə ki,peyğombər(s) çandə kərə bə İmom Həsəni(ə) xitobən hamyeşe:”tı əxloğ iyən xılğəti cəhəto bənə mış”……