Ilahi Rəhbəron-94

Ilahi Rəhbəron-94

Bəle,joqo Xıdo pəsənd kardə ləyoğətinə əməlon və bə ehtiyocinə fərdon tələbon mısbətə cəvob doey çı qıləy əxloği mesaji rosneysə həm əlovə,ımi bəyon kardedə ki,bə Ğıroni təbiri əsos çı infoğ iyən ehsoni zəmonədə  nəyinki bəpe ım de əzob-əziyyət iyən mınnəti bə ico nıbu,bəlkəm bəpe həmonə çokiyətiyədə çəvon insoni kəromət və şəxsiyyət oqətey bıbu ta əvon hiççurnə zıllət və xarətəi hiss nıkon.qıləy co ruji İmom Həsən(ə)  bə məçit daxil be və vindeşe ki,iqlə ehtiyocinə fərd deştə zohiri bru oqətə holədə bə İlahi dərqo dastış dıroz kardə və votedə:Xıdolim ha! Boştə ehtiyocon bərtərəf kardero bəmı da həzo dirhəm nəsibkə!.İmom Həsən(ə) həmonə kəsi nızınə və xəbəş nıbə holədə çı məçitiku xaric be və bo həmonə ehtiyocinə şəxsi şəxsiyyəti nıdarışteyro,çəy ehtiyociş bıə mığdori həcmədə pulış de cokəsi vositə boəy vığandeşe.çə həzrəti ıştə dasto omə komək və baxşeşi ruhiyyə mığdorədə ım vəs kardedə ki,İslomi metəbər mənbəonədə omə ki, İmom Həsən(ə) ıştə qırd sərvət və molonış se kərə bə dıqlə niməş təğsım kardəşe və Xıdo royədə iyən fəğət boçəy rizoyəti cəlb kardero infoğ və baxş kardəşe…..

İmom Həsəni(ə)  coqlə barzə əxloği fəzilət və xısləton ziyode və nəğlışon kardə ki,qıləy ruj bə bəni-uməyyə yavə təbliğoti xoto dılış de bə peyğombəri(s) xanedani deşmınəti iyən kin-kudurəti pur bıə qıləy Şamıjə merd de ə həzrəti dimbədim be və binoş karde bo bə ə həzrəti yavə sıxan və do-dojmon doey.İmom Həsəni(ə) de komilə səbr iyən mətonəti  bəy hamyeşe:az qımon kardedəm ki,tı bın şəhrədə coyli və ğəribiş.ehanə ıştı qıləy ehtiyocı hestebu.bıdə az bəy vırə bırosnom. əgər tı bə qıləy rahnuma və ro nışon doey ehtiyoci hestebu,bıdə mı tıni irşod və hidoyətkom.ehanə tı vəşyanişbu,bıdə az ıştı luz-ləvə sikom və əgər ıştə kə-bəku avarə və dərbdərişbu,bıdə mı bətı pənoh bıdəm.ehanə ıştı qıləy tələbı hestebu və bə qıləy mərkəbi ehtiyoci hestebu,bıdə ıştı ixtiyorədə ğərol bıdom.bə duyə təbliğaton bovə kardə həmonə sodə inson çı İmom Həsəni(ə) ım kərimonə rəftori mışohidə kardey bədiqə,ıştə kardə yavə koyku peşmon be və qıləy holədə ki,bəmeydəbe,voteşe:şoydəti kardedəm ki,həyğətən tı zəmini dimisə çı Xıdo xəlifəş və Xıdovənd həmməysə çok zıneydə ki,ıştə vıjniyə risoləti kon vırə ğərol bıdoş.de tobə ısət tı iyən ıştı pı çımı palu həmməysə bevəcə deşımınon biyon,əmmo çın ləzəku jəqoşə çımı nəzdədə şımə Xıdo məxloğati həmməysə mahbubə qıləyniyon….

İmom Həsəni(ə)  cıvonəti devron de İmom Əli(ə) xilofət və hukuməti zəmoni təsoduf kardedə.ə həzrət Əli(ə) nəyinki,bənə qıləy pı,bəlkəm bənə qıləy imom iyən rəhbəri bəy pemandedəbe və çə həzrəti rostə tərəfdoronku be.co tərəfiku həm həzrət Əli(ə) ki,de ləyoğəti iyən ğudrəti ıştə fərzəndi İmom Həsəni(ə) zıneydəbe.Cəməli canqi cərəyonədə ə həzrət de Əmmar Yasiri bə ico qıləy noməş bə Kufə milləti nıvışteşe,vığandeşe ta əvoni bo İmom Əli(ə) beyət sıeyro himoyə cəlbko.ə həzrət çoko ki,bə Kufə daxil be,millət de surəti çəvon palu omin.bın zəmon İmom Həsən(ə) ıştə vırəku rost be və de İlahi dərqo şık kardey iyən bə İslomi əzizə peyğombəri(s) səlom vığandey,milləti bə meydoni səmt vanq jeydəbe. ….

İmom Həsən(ə)  jıqoş hamye:ha millət ha! əmə oməmon ta şıməni bə Xıdo iyən kitobi səmt iyən bəçəy peyğombəri(s) sınnəti həmməysə əzınə şəxs,həmməysə ədolətin,həmməysə əziz və ləyoğətinə şəxsi beyət kardero dəvətkəmon.ikəs ki,Ğıroni əvış tarif kardə və bə Xıdo-Rəsuli(s) pemandeyədə hiç kəs çəyku bənav dəşəni.ikəs ki,I tərəfiku de Xıdo-Rəsuli(s) bıvəti əğdış bastəbe və co tərəfiku həm de ə həzrəti ğohıməti rabitəş heste.əv bəsə qırd məxloğatisə çokə sıfət və xıslətonku bənave.ikəs ki,həmmə kəsisə vey bə peyğombəri(s) nez be.qıləy holədə ki,cokəson  çə həzrətiku bə diyəro mandəbin,Əli(ə) hejo çı sıftəku de peyğombəri(s) bə ico be.