Ilahi Rəhbəron-97

Ilahi Rəhbəron-97

İmom Həsən(ə) Mujtəbo Cəməl iyən Siffeyni caqnoədə iştirokiku əlovə,beşək ə həzrət de Nəhrivoni canqi məşhur bıə de Xəvaricon canqədə həm qıləy əsosə rolış ifo karde.həmonə bebəsirətin iyən ıştəni bənə mığəddəsə odəmon nışon doə dastə ki,bə əmr asi hiyləon tori eqınin və bə həzrət Əli(ə) Həkəmiyyəti mevzuşon doe ğəbul karde və çı ğələbə astanədə bıə həxı cəbhəşon de məğlubiyyəti dimbədim kardeşone.məələsəf ım beməxə qrup ki,de ımrujnə bənə DAİŞ təkfiri iyən terroristə dastəon mığoyisə kardey beydə və əvon həm çı İslomi deşmınon dastədə qıləy əbzorin,bənə qıləy inhirofə cərəyoni İmom Həsəsni(ə) zəmonədə nəyinki,bə ə həzrət koməkışon nıkarde,bəlkəm çı İmom Həsəni(ə) bə muaviyə ələyh bıə planon bəyənde jeydəbin və çı deşmıni bə Əhli-beyti(ə) piyo bıə ğələbə zəminədə hozzı kardeyədə qıləy təsirinə rolışon ifo karde.

Əmirəlmuminin Əli(ə) deştə ğatil ibn mulcəm muradi dasti məzlumonə surətədə bə şəhodəti məğami rəse.çoko ki,ibn mulcəm dastqir və qətey be,əvışon çı həzrət Əli(ə) palu vardeşone, İmom Həsən(ə) bəy nəzəş karde və bəy hamyeşe:”vay bıbu bətı,ha Xıdo rəhmətiku bə diyəro bıə kəs ha!tı Əmirəlmumininı kışte.tı çı mısılmınon imomı çəmə dastiku se.aya ım çəy mıkofot be ki,bətı pənohış doe və bəştə nezış karde?aya əv botı bevəcə imom be ki,jıləvoni əvı bə şəhodət rosne?ibn mulcəmi voteşe:ha əba Muhəmməd ha!aya tı ikəs ki,çı otəşi miyono suğutış kardə və bo suteyro loyığe,dılı heste əy nicot bıdoş?peşo İmom Həsən(ə) çı ğəmo-ğussəku de şiddəti bəme və Əli(ə) piyəkəson və yaro-yavəron həm ahu-noləşon rost karde.bın zəmon İmom Həsən Mujtəbo(ə) ıştənış bə İmom Əli(ə) nimə conə bədəmi nez be,əvış pusə karde və hamyeşe:əzizə pı,ım çı Xıdo iyən ıştı deşmıne ki,Xıdo əməş bəy mısəllətış karde.çandə ləzə və anon dəvarde və həzrət Əli(ə) ıştə çəşonıj oj karde və hamyeşe:ha İlahi firiştəon demı mudorəkənən və peşo de ahəstə,darşiyə iyən larzə sədo bə ibn mulcəmi dimış qəte və hamyeşe:tı bə qıləy dıjdə qıno mırtəkib biiş və bə qıləy yolə səhvi dastı je.aya mı botı qıləy yavə imom iyən rəhbər bim ki,ıştə dastı bəçımı xuni aludə karde?aya mı bətı nisbətədə mehribon nıbim və bətı ehsonım nıkarde?ıştı barədə sıxanonışon vote,əmmo az ijən tım ozod haşte və bətı baxşeşonım əto karde.deməkə ki,az zıneydəbim tı bedəlil  bəştə bebəsirətin iyən kəcfaməti xoto,mıni kıştey məğsədı hestebe.qıləy holədə ki,mı umum hestebe və cəhdım karde ta tıni çə zəlolətiku peroxnom.peşo həzrət Əli(ə) bəştə yolə fərzənd İmom Həsəni(ə) dimış qəte və hamyeşe:”deştə əsiri mıdorəkə,bəy rəhmkə,bəy çokikə və deəy mehribon bıbi.İmom Həsən Mujtəbo(ə) ərzış karde:çımı əzizə pı,əv de qırd ım xəto iyən cinoyəti,ijən bə baxşeşi loyığe?həzrət Əli(ə) bəle,çımı fərzənd.əmə qıləy xanedanimon ki,çəmə siyrət və əxloğ kərəm və buzurquvarətiye və çəmə adət iyən metod ehson kardey və əfv kardeye….

Həzrət Əli(ə) məzlumonə və ğəmənqizə şəhodəti bəpeştə,İmom Həsən Mujtəbo(ə) qıləy qonə məsuliyyətış yəni çı İslomi camiyə rəhbərəti koş bəştə ehdəş peqəte və bə İlahi məşiyyəti əsos de qıləy vey saxtə şərayiti dimbədim ome.qıləy zəmon ki,İslomi camiyə  dumo yənde bənə Cəməl, Siffeyn iyən Nəhrivani bıə canqon şoyd be  ki,çandə həzo nəfər kıştə və yarajə bin.İslomi camiyə təhrif bıəbe və Muhəmmədi(s) vardə əslə İslomi əvəzi əməvi din mevcud be və İslomi sıftənə soronədə bıə sodə jimon kardey əhvol-ruhiyyə ısət de dəbdəbəninə sarayon əvəz bıəbe.həni nə çı peyğombəri(s) zəmonədə bıə navkonə bıvəti iyən bərobərətiku əsər-əlomət hestebe. bəlkəm, təbəğavari fosilə və irğçiyəti dodı-bido kardedəbe.bənə Əbuzəri bıə İslomi sıftənə soronədə bıə yolə əshobon ki,çı peyğombəri(s) mahbubə şəxson bin,ıştə kə-bəonku dərbədər bin və bənə Meysəm Təmmari bıə şəxson həm darədə ehaştey bin.İslomi ğıvvon ki,bəçəvon siyosəton zidd bin,ya de şini doey vositə bə dast sıey beydəbin və ya de təhdidi etosniyey beydəbin.de muaviyə məluni vositə həzrət Əli(ə) şiəyon iyən tərəfdoron nomon bəçəy əmron əsos şəy dəftəriku pok və moley beydəbin və  ehanə əvon qıləy vəzifə və postədə həm bıəbin,ıştə koyku ixroc beydəbin…..

Jıqo qıləy şərayitədə İmom Həsən(ə) ki,ıştə əzizə pı usuli iyən mıştərəkə siyosəton cəhətədə məsuliyyətış hissış karde və ə həzrət çın təhrif iyən iştimoyi,fərhənqi iyən siyosi nobərobərtiyon mığobilədə orom nınışte.İmom Həsən(ə) bə jıqo zılımon və dodı-bidodon tov vardey nıəzıni labud be ki,ə həzrət bi Muhəmmədi(s) vardə əslə dini hifz kardero ğıyomko və etırozko.bə həmonə dəlili xoto,çı muttəğiyon mevla həzrət Əli(ə) şəhodəti bəpeştə əmrış karde ta millət Kufə məçitədə bo cihodiro cəm bıbon.əmmo çəy bənav çı İmom Həsəni(ə) de muaviyə miyono noməon nıvıştəy be ki,peşonə bərnoməonədə inşaallah əy şərh bədomon.