Ilahi Rəhbəron-100
Ilahi Rəhbəron-100
Ilahi Rəhbəron-100
Məələsəf məçitədə hozzı bıə kəson de betafutinə holi sukutışon ixtiyor karde və bə İmom Həsən Mujtəbo(ə) hiç qıləy cəvobışon nıdoe.Udey ibn Hatəm bəsə səpoysə əhışte və de şiddətinə norohətçəti ıştə dimış qəte bə milləti və voteşe:”bə Xıdo pənoh bardedəm şımə çı vey yavə rəftoron heste.aya həxı tələb kardey və bəştə imom iyən rəhbəri komək kardey nido və sədoon nıməse?şımə çı ilahi ğeyz və ğəzəbiku tarseydəniyon?”peşo bə İmomi(ə) dimış qəte və voteşe:”əmə şımə sıxanımon məse və ıştı əçmri çəş kardedəmon və bəştı nəzə əsos bıə bə har qıləy əmri pemandedəmon.az ısət hozzım ta bə ləşkəri səmt hərəkətkom.çən,hakəsi dılış heste, demı bə ico hərəkətko”.peşo əv çı məçitiku xaric be və bə Kufə nezi iyən bə Şami roy səmt bıə Nuxeylə tərəf hərəkətış karde.çəy bəpeştə çandə nəfər ıştə vırəku əyşte və millətışon mızəmmət kardeşone və əvonış bo Xıdo royədə cihod kardero təşviğış karde.əmmo,çun kamə insonon bə İmom Həsən Mujtəbo(ə) dəvəti ləbbeykışon vote,ə həzrət noçor mande se ruj ıştə hərəkəti bə təxir eğando və de co qıləy xutbə handey millətiku tələbış karde ta əvon ıştəku sıstəti nışon nıdon və bo de muaviyə canq kardero hozzı bıbon.əmmo,İmom (ə) qırd ım səyon jəqo həm muvəffəğamiz nıbe.çıro ki,əvon həmonə kəson bin ki,Xıdo-Rəsuli(s) bəfoti bəpeştə çoqlə xəlifəşon vindəbe və ısət pencminə xəlifə hukuməti zəmonədə jimon kardedəbin.həmonə camaat ki,ıştədə curət və cəsorətışon pəydi kardəbe ta çə navnə çoqlə xəlifə seqlə bıkışton.əvon harçənd zohirədə de İmomi(ə) beyətışon kardəbe,əmmo həssos iyən təhlukəninə zəmonədə deştə zevğ iyən fiki hərəkət kardedəbin....
İmom Həsən Mujtəbo(ə) bə milləti be dığğətəti rəğmən,Ubeydullah ibn Əbbosış vanq je və bəy hamyeşe:”ha çımı amuyə zo,mı idastə ərəbi suvariyonku detı vığandedəm.çən,de ın dastə hərəkətkə.deəvon namə rəftorkə,ojədim bıbu,ıştə təvozukoronə kəşi çəvon sape ojkə və çoko de muaviyə dimbədim omiş,deəy canqədə bənav dəməşi və bəhaşt,bıdə əv canqi binoko və bın surətədə deəy muharibəkə.mı həm coqlə qılə dastə cəm kardey bədiqə,bomem bətı mulhəğ bəbem”.əmmo dıroz nidəkəşe ki,bə İmomi(ə) məlumot doşone ki,Ubeydullah çı muaviyəku de I milyon dirhəmi ğəbul kardey,bəy umuj qıniyə və bəçəy tərəf ovaştə.muaviyə de Ubeydullah hıriye iyn bəy şini doey iktifoş nıkarde.əy bo İmom Həsəni(ə) ləşkəri miyono ixtilof iyn şayiə icod kardey xoto,ıştə dasto omə har qıləy koş karde və çı İmom Həsən Mujtəbo(ə) co dıqlə fərmondə və sərkərdəş həm de tətmi` iyən şini doey vositə hıryeşe…….
De qırd ımon bə ico,İmom(ə) deştə nizom-intizomış bəyənde qıniyə ləşkəri hərəkətış karde və Mədayini şəhri kəno Bisabat nomo qıləy məntəğədə mandin və şəvışon əyo dəvordıne.çun zəmon ome rəse,həzrəte İmom Həsəni(ə) bə ğərol ome ta təğribən ço həzo mığdorədə bıə ıştə əmandə ləşkərış qırdəko və ıştə həyğiyə duston iyən çəvon bəfodorəti məlumko.de ın məğsədi ə həzrəti qıləy xutbəş hande və hamyeşe:”şık bə Xıdo,çoko ki,şukrəkəyon çəy dərqoyədə şık kardedən.şoydəti doydəm ki,ğərəz Xıdovəndi co qıləy pərvərdıqor ni.şoydəti kardedəm ki, Muhəmməd(s) Xıdo bandə və vığandə peyğombəre ki,əvış de həxə ayini bə risolətış məbus karde və ıştə vəhyi əminış ğərol doe.əmmo,bəəd,bə Yolə Xıdo ğəssəm,az hejo umudəvom Ğadir, Mutəalə Xıdo sıtoyişkom və Xıdovəndi boçəy bandəon həmməysə xeyrxahə bandə bıbum.az hiçvaxti ıştə dılədə qıləy mısılmoni kin-kudurətım perosnəmni və hiçvaxti bo hiçkəsi bədi iyən fitnəm piyəmni.aqah bıbənən ki,ibemon iyən vohidəti,çı təfrığə iyən coətiku vey çoke.mı şımə xeyrım şımə fik kardə çiysə vey,nəzədəm heste və binobərin bə çımı fərmoni pemandənən. vohidə Xıdo mı iyən şıməni bəştə lutf iyən baxşeşi şomilko və əməni bəştə piyə çiyon və roziyəti tərəf hidoyətko və ro nışon bıdo.çoko ki,İmom Həsəni(ə) həkimonə iyən dıləsutə sıxanon bə oxo rəse,əyo hozzı bıə kəson bə iyande diyəşon karde və çı iyandeyku dəparseydəbin ki,çəy məğsəd çiçe?çəvonku kali qıləyni voteşone:bə Xıdo ğəssəm, əmə qımon kardemone ki,əv de muaviyə sazışko iyən hukuməti bəy təslim kardey fikədəy.peşo vanqışon je ki,ım merd səfi bıə.ım dastə həmonə bebəsirətin iyən ıştəni bənə mığəddəsə odəmon nışon doə kəson bin ki,Siffeyni canqədə Həkəmiyyətışon dezzu bə həzrət Əli(ə) ğəbul kardeyışon doe və çəy bədiqə sərəsin ki,deşmınon əvonışon bə dast dənoə,əmmo ijən çı Məsumə İmomi(ə) kufri hukmışon sadir karde……
