Ilahi rəhbəron-155

Ilahi rəhbəron-155

Ğamusul-Əlam kitobi mıəllif Xeyruddin Əzzirikli İmom Sadıği(ə) barzə şəxsiyyəti həxədə votedə ki,elm iyən fəzilətədə ıştə zəmonə yeqanə şəxs və çəy dərsi məclisonədə imom əbu hənifə bəsə zonusə nışteydəbe və çəy zohiri iyən botıni elmonku bəhrə bardedəbe.İmom Sadığ(ə) cəbr,kimya və coqlə elmonədə məhorətış hestebe.min cumlə çəy məhzərədə elm kəsb kardə kəsonku kimya elmi sahədə barzə şəxsiyyət bıə  bə vey məşhurə alim Cabir ibn Həyyani işorə karde bəbe.

İmom Sadığ(ə) elmi barzə şəxsiyyəti soyb bıeysə əlovə,zuhd iyən təğvadə iyən sodə jimon və çokə muaşirətədə həm qıləy bemislə şəxs be və bın sahədə həm ziyodə ləyoğətış hestebe və bəçəy əxloği fəziləton xoto bə həzrəti Sadığ və rostəvıj ləğəbışon noəbe və ə həzrət de ın ləğəbi məşhur be.Misrıjə qıləy ənıvışt doktor Əhməd Əmin  jıqo votedə:İmom Sadığ(ə) Şiyə fiğhi iyən huğuği həmməysə yolə şəxsiyyət, bəlkəm İslomi mıxtəllifə əsronədə və peşonə devronədə həmməysə yolə elmi şəxse.Dayirətul-Maarif Ğarnul-İşrin məşhurə kitobi mıəllif Fərdi Vəjdihəm jıqo votedə: Cəfər ibn Muhəmməd Əssadıği(ə) elm iyən zıney mərkəz  har ruj de dıjdə alimon pur be.ə alimon ki,de hədison,təfsi,fəlsəfə iyən kəlami elmon  oşno bıeyışon piyedəbe,əve əvon çə həzrəti dərsi məclisonədə iştirok kardedəbin.əksər vaxtonədə dı həzo və qahi zəmon həm ço həzo nəfər məşhurə alimon bın elmi məclisonədə iştirok kardedəbin....

İmom Sadıği(ə) qıləy barzə səviyyədə  fiğh iyən elmi barzə şəxsiyyətış hestebe və çə həzrəti insonon bəştə səmt cəzb kardə qıləy cozibəş hestebe ki,nəyinki,fəğət Əhli-Byeti(ə) aşığon,bəlkəm çı əhlı-sınnəti dini rəhbəron,sufiyon,elmi muhəğğiğon,fəğihon,ədibon iyən hətto dəhri-məzhəbon yəni məbdə iyən miadi inkor kardə kəson həm cəfəri məktəbədə işrirok kardey dumo bin ta çə həzrəti elmi xəməniku qıləy huşə bıçınon və ıştə təşnə rufi  çı İmomi(ə) oxoş nıbə elmi dıyoku sirob bıbon.

İmom Sadığ(ə) bo İslomi dınyo qıləy boho ğeymətinə irsonış noə.Misri məşhurə şayir,ənıvışt və ədib Əbdurr-Rəhmon Əşşarğavi çı İmom Sadıği(ə) həxədə jıqo nıvıştedə:çə həzrəti əsri millət bə İmom Sadıği(ə) nisbətədə bıə dustəti iyən məhəbbətədə qıləy vohidə nəzəşon hestebe.zira çəy fiki ufuğ hevuj, çəy zehn ruşin,çəy ğəlb dıjd.çəy çehrəş sırədiyən və xoşsehbət və xoşə rəftorış hestebe və xeyə koonədə həmmə kəsonku bənav dəşeydəbe.de qırd təzyiğ iyən məhdudiyyəton bə ico,ə həzrət milləti de hikmət iyən çokə nəsyəton bə İslomi ğəbuli iyən bə tohidi bovəon səmt dəvət kardedəbe....

İslomi dınyo coqlə nəzə soybonku qıləyni “Mətalibus-Suul fi Mənağibir-Rəsul” kitobi mıəllif Muhəmməd ibn Təlhə Şafeyi İmom Sadıği(ə) barzə xısləton həxədə jıqo votedə:Cəfər ibn Muhəmməd Əhli-Beytiku(ə) qıləy yolə alim ziyodə elmon soyb be və çəy ibodət dayimuz-zikr  be və çə həzrəti qıləy fevğəladə zuhdış hestebe.ə həzrət Kərimə-Ğıroni ziyodə tilovət kardedəbe və çəy məfhum iyən mənonədə nığılə təfəkkur kardedəbe və İlahi kitobi nığılə dıyoku boho ğeymətinə ğevhəron istixrac kardedəbe.çəy mecuzəon ruşin kardedəbe və ıştə vaxton bə ibodəti çandə nevi təğsım kardedəbe və deçəy vositə ıştə nəfsiku qıləy hisob kəşeydəbe.çəy nuroniyə çehrə axırəti bə odəmi yod dənoydəbe və bəçəy kəlomi quş doey insoni çı dınyo iyən çəy maddiyatiku co kardedə.bəy tabe bıey iyən pemandey insoni bə vəhışt bəbarde və çəy dəvəşə sima nışon doydəbe ki,əv həyğətən çı Xıdo fərzəndonkuye.çəy mənağib iyən fəziləton mığdori oxoş ni.çə həzrətiku ziyodə rəvoyəton və hədison nəğl bıə ki,İslomi umməti yolə şəxsiyyətonku veyə alimon çə həzrəti elmi dıyokuş bəhrəş bardə.....