İlahi rəhbəron-180

İlahi rəhbəron-180

Haftminə İmomi(ə) məzlumonə formədə bə şəhodət rəsey bəpeştə idastə de vağivifiyyə nomi bə əməl ome ki,əvon bo çə həzrəti zəmoniku baği mandə vucuhat və pulon təsərruf kardey iyən boştə peqəteyro cəhdışon karde və kulliyə surətədə əvon çı həzrəte İmom Rıza(ə) imomətışon inkor karde və deştə səhvə təsəvvıri çı İmoməti silsilə bə oxo rəsey nışon doey piyedəşonbe.ım qrup de ım inhirofə nəzə çoko ki, vindeşone  de Həştminə İmomi(ə) şərifə umriku çılı çandə sor dəvardey bə ico,çə ə həzrəti qıləy fərzəndış ni,ijən əvon bə səhnə omin və de dılışon hestebe iştimoyi fiki bəştə səmt dəkırnon və cəlbkon.ım mevzu bo ə şiəyone ki,əksəriyyət təşkil doydəbin,qıləy norohətkə mevzu be.boçi ki,bə peyğombəriku(s) iyən məsuumə imomonku(ə)rəsə xəbon əsos ım qıləy ğətiyə məsələ be ki,Xıdovənd hukmən bə ə həzrəti qıləy zoə fərzənd əto bəkarde ta həmonə imoməti məsir iyən roy dəvom bıdo.hətto qahi zəmon əvon bə İmom Rıza(ə) xıdmət rəseydəbin və çə həzrətiku tələb kardedəbin ki,dıvoko ta Xıdovənd bəy qıləy zoə fərzənd ətoko.ə həzrət həm bəvon dılvandi doə holədə hamyeşe:”beşəkk Xıdovənd bəmı qıləy fərznd bədoe ki,çımı bəpeştə varis iyən imom bəbe”.(Biharul-Ənvar,50-ə cild,səyfə-15)…..  

İmom Rıza(ə) ım tevsif çı nəzə soybon kali qıləyni jıqo təhlil kardedən ki,çın mevludi mıborək bıey dəlil  ıme ki, de mıxolifon vositə bə əməl omə şubhəon bə oxo rəse və bə navnə devrəon əks ki,bənə Zeydiyyə, İsmaliyyə iyən Vağğivifiyyə bıə  fırğəon bə vucud omin,de tosə Haftminə İmomi(ə) zəmoni Əhli-Beyti(s) deşmınon səy kardedəbin qıləy fırğə icodkon,əmmo çə həzrəti zəmonədə qıləy fırğə təşkil nıbe və çı imoməti devrə de tobə həzrət Məhdi(əc) qıləy bəsə coqləyni bəpeştə bə İlahi məşiyyəti əsos dəvomış pəydu karde.de kərimə-Ğıroni təbiri Xıdo deşmınon dayima səy kardedəbin ta Xıdo nuri hamuşkon, əmmo əv ıştən jıqoş piyə ki,çəy nur komil iyən əbədi bımando.harçənd ım bə kofiron xoş nıvo(Səfi mıborəkə surə)….

İmom Cəvodi(ə) nəğl bıə ki,hamyəşe:”çımı bəpeştə omə İmom çımı fərzənd Əliye.çəy fərmon və sıxan çımı sıxane və bəy itoət kardey bəmı pemandey mənoədəy”.peşo İmom Həsən Əskəri(ə) barədə həm həmonə bəyonatış hamye və təkrorış karde.çə həzrətiku dəparseşone:ha Xıdo-Rəsuli(s) fərzənd ha! Həsəni bəpeştə imom kiye bəs?ə həzrət de  şiddəti bəme və peşo hamyeşe:”Həsəni bıəpeştə çəy fərzənd çəmə Ğayime(əc).sıvol be ki,çıro çəy nom Ğayime? ə həzrəti cəvobış doe ki,zira millət əy çı viro bekardey iyən əvon bə inhirofi səmt hərəkət kardey bəpeştə ə həzrət ğıyom bəkarde”.votey be ki,bə kom dəlili əsos bəy Muntəziri nomışon noə?yəni millət çəy intizori çəş kardedən? İmomi(ə) hamyeşe:”zira çəy ğeybət vey dıroz bəbe və çəy xolis iyən həyğiyə piyəkəson çəy zuhuri intizorədə bəmandeyn və şəkk kardə kəson çəy vucudi inkor bəkardeyn və bəy istehzo bəkardeyn”.peşo ə həzrət bə qıləy muhimmə mevzu işorəş karde və hamyeşone:”əvon ki,çı ğeybəti zəmopnədə boçəy zuhuri vaxt iyən zəmon təyin bəkardeyn,duə sıxan votedən və əkəson ki,çəy omeyədə(bə İlahi məşiyyəti əks)əcələ kardedən həlok bəbeyn.əmmo əvon ki,bə Xıdo əmri təslimin,nicot pəydu bəkardeyn”….(kifayətul-əsər)……

 İmom Rıza(ə) şəhodəti bəpeştə həşt sinnədə bə imoməti barzə məğami rəsə İmom Cavad(ə) çanədə həm  ğoymə istidlolon vardedəbe,əmmo ijən çəvon mıxolif iyən bəhonə dumo nəvə kəson bə ə həzrəti ələyh psixoloji muharibə bardedəbin və votedəbin ki,ım çokonə koye ki,həşt sinnədə bıə qıləy hırdən çı zəmonə imomət və rəhbərəti koş bəştə ehdəş peqətə.çəy nə elm və zıneyış heste və nə qıləy təcrubəş heste ki,ğadir bıbu çın təhlukənin iyən sanqinə koy ehdəku booy.