İlahi rəhbəron-183

İlahi rəhbəron-183

Həzrəte İmom Cavad(ə) qıləy sıxani bə insoni rufi çanədə təsir kardey həxədə jıqo hamyedə:”hakəs bə qıləy sıxasn votəkəsi sıxani quş bıdo,əvış pərəstışış kardə.ehanə qəp jıəkəs Xıdoku sıxan bıvoto bəy quş doəkəson həm Xıdoşon pərəstış kardəşone və əgər iblisi zıvoniku sıxan bıvoto,bənə iblisi pərəstış kardə kəsiye”….

Imruj çı mediya iyən informasiyə vositəon zəmone.bəpe bəsə coqlə zəmonisə həm vey bın tale həlləkə royədə ciddiyə ğədəmon şodey bıbu.zira çın mediyaku umdə baxş ımruj çı şəytonə hukuməton mikrofononku xaric beydə.qıləy hədəf ki,İlahi siratəl mustəğim royku umum milləti bə inhirofi səmt bardeyku çımi co qıləy hədəfış ni və əvon deştə qırd zu və ğıvvə anti-dinə cərəyonon himoyə kardedən və çəvon iblisonə fikon umum miləti miyono pevolo kardedən.çəmə bəçəvon tor nıeqınero iyən bə inhirofə roon nıeqınero bəpe əmə bə İlahi iyən insonə erjon səmt dim bıqətəmon və Xıdovəndi bomə vığandə dini royədə hərəkətkəmon.həzrət bın barədə çokə rahnuma və hidoyətəkə sıxanon hamyəşone və hamyedə:”imoninə insoni bə seqlə xısləti ehtiyociş heste.Xıdovəndiku tovfiğ iyən ovandəti,çəy dıləku qıləy pandədə və bəy pand doəkəsi nəsyəti ğəbul kardey”…

Beşək qıləy zəmon ki,de şəytoni vəsvəson iyən nəfsoni həvəson və de duyə sıxanon dimbədim omimon, çəmə suğut iyən tənəzzuli vəy qətə muhimmə amil,bə İlahi tovfiğ iyən ovandəti soyb bıeye ki,əv nıbə holədə çəmə cəhdon qıləy səmər və təsirış ni.əmmo çımisə əlovə bəpe inson bəştə fitri iyən daxili nido cəvob bıdo və bəştə odəmi vıjdoni mızəmmət kardə nəfsi ciddi quş bıdo ta kardey bızıno çı İlahi tovfiğ iyən ıştə vijdoni oğoəkə şua jiyədə hərəkətko ta bə inhirofi səmt nışo.qahi zəmon bə insoni İlahi tovfiğ iyən ovandəti nəsib beydəni və bəçəy kardə kali qıno dəlili xoto,ıştə vijdoni məsey zıneydəni.bın zəmon ehanə qıləy dıləsut iyən xeyrxahə inson deştə zıvoni bəy pand və nəsyət bıdo,bəvədə ım boəy həmməysə çokə ro bəbe və inson deçəy moyizə vositə oğo bıey bəzıne…..

Bə Məsumə İmomon(ə) hədəfinə sıxanon qıləy nəzə kardeyədə vindedəmon ki,əvon qahi zəmon ıştə sıxanonışon bevositə və ıştə zıvoniku bəyonışon kardə.islomi rostəvıj iyən həxtələbə rəhbəron dayima çı islomi usul və məbno xəttədə hərəkətışon kardə və çəvon şıə şivə və royədə hiç qıləy ziddiyyət və tənağuz mevcud bıəni.min cumlə İmom Cəvod(ə) həzrət Əli(ə)-ku nəğl kardedə ki.hamyəşe:”hakəs bə Xıdo etımodko,Xıdovənd bəy şoyvonəti bəbaxşe və hakəs bəy təvəkkulko,Xıdovənd bəy çəy koonədə vəs bəkarde və bə Xıdo etımod qıləy ğaləy ki,ğərəz imoninə insoni hisçək əyo dəvitiye nibəzıne.”