İlahi Rəhbəron-211

İlahi Rəhbəron-211

BİNOBƏRİN ehanə Xıdo-Rəsuli(s) hamyeedə:”çımı fərzənd Məhdi(əc) dınyo de zılmo-sıtəmi pur bıey bədiqə ğıyom bəkarde və dınyo de ədolət iyən dodi pur bəkarde və ım hiçvaxti bın mənoədə ni ki,har qıləy zəmon iyən əsrədə bıə zolımkorə hukuməton zılm iyən sıtəmon vədə orom və sakit bınışto,bəlkəm bəpe bəsə poysə bınışto və bo həzrəte İmom Məhdi(əc) zuhuriro mınosibə zəminə hozzıko.harçənd ijən mumkine çın işkol iyən irodiku bəhs kardey bəbe ki,ehanə əmə bəştə vəzifə hukmi əsos çı sıtəmkoron mığobilədə bımandəmon və çı məzlumon həx-huğuğon mıdofiyəkəmon və bo ədoləti icro kardeyro hərəkətkəmon,bın surətədə bo həzrəte İmom Məhdi(əc) zuhuri hədəfiro elon kardə bıə ideyalon bə həyğət bırəso və bın surətədə həni bə həzrəte İmom Məhdi(əc) zuhuri çı ehtiyociş hest?.çunki,həzrəte İmom Məhdi(əc) zuhur iyən ğıyom bəkarde ta ım mevzu royədə hərəkət bəkarde və ım məsələ real bəkarde və bə həyğət bərosne.yəni həm de zolımon mıborizə bəbarde və həmən ədoləti bərpo bəkarde......

Bə ın mevzu cəvonədə bəpe votey bıbu ki,harçənd çəmə həm vəzifəmon heste ki,çı zolımkorə hukuməton mığobilədə tam nıjənəmon və bə məzlumon fəryodi bırəsəmon,əmmo bəpe dığğət kardey bıbu ki,çəmə qırd etıroz,ğıyomon və mıborizəon qıləy məhdudə çərçivə ehtivo kardedə və qıləy məxsusə coğrafiyədə bə əməl omeydə və əmə komilə surətədə hiçvaxti zılm iyən sıtəmi çı miyoniku bardey nibəzınemon və həmmə məzlumon çı cinoyətkorə hakimiyyəton və zolımon sultəku peroxney və ozod kardey nibəzınemon və sulh iyən ədoləti bə ərməğon vardey nibəzınemon.binobərin çəmə təsiri ərazi və sahə məhdud iyən nisbiye,əmmo zuhuri zəmonədə dınyo qırd noxtəonədə çı zolım iyən sıtəmkoron rəğ-rişə bırniye və çı miyoniku barde bəbeyn və həmmə məzlumon Məhdəvi ədoləti şinə təmi bəçaşteyn və çı ədoləti pərçəm dınyo həmmə hissəonədə rost kardey bəbe.çoko ki,Kərimə-Ğıroni çəy mıjdəvoniş doə və hamyedə:”əv ikəse ki,ıştə peyğombərış de hidoyəti iyən həxə dini vığandeşe ta əy bəsə har qılə dinisə səbarzko,harçənd ım bə mışrikon xoş(həm) nıvo”.(Tobə-33)....

İslomi əziz-qramiyə  peyğombər(s) bo duyə məhdəviyyəti iddio kardə kəson və milləti bə inhirofi dıço bıey vəy qəteyro hamyeşe:”Ğayim çımı avlodikuye.çəy nom çımı nome və çəy zohiri sima çımı zohiri sima və çehrəy”.peşo ə həzrət ıştə sıxanon dəvomədə çı muhimmə nuktəonku bəhs kardedə və hamyedə: ”hakəs bəy tabe bıbu iyən pemando,jıqo bızın bəmı pemandə və hakəs çəy mığobilədə bımando və bəy itoət nıko,jıqıo bızın bəçımı ələyh beşə.və hakəs əy bə həşə bıjəno iyən inkorko,jıqo bızın çımı risolət və missiyəş inkor kardə”.....