Ayətullah Safi Qulpayeqani

Ayətullah Safi Qulpayeqani

Həşi 1400-ə sori bəhmənə manqi 12-ə ruji şiyə yolə alim iyən de şeyxul-mərace nomi məşhur bıə mərcəyi-təğlid Ayətullah Safi Qulpeyqani de ın fani dınyo vidoş karde.əv ıştə bərəkətinə umri dırozi de ğələm iyən bəyoni çı İslomə dini xıdmtədə be və qıləytəğvaninə arifi zumrədə be ki, deəvon vindemon kardey insoni bə Xıdo zikri və yodi eğandedə və deəvon mıoşirət kardey bə qıləy fərdi elm iyən təğvo ziyodəti boyis beydə.

Həşi 1297-ə sori Xıdovəndi bə mərhum ayətullah molla Məhəmmədcəvad Qulpayeqani qıləy lutfış əto karde.ğasbu bə həmonə dəlili xoto be ki,çı elm iyən iştihodi əhl bıə pı ıştə fərzəndi nomış Lutfullahış noe.çəy bədiqə çəy fəzilətinə inə Fatmə xanım de Kərimə-Ğıroni ayəon zikri iyən de bə peyğombəri(s) əhli-beyti(ə) eşği və mənəvi şeron zumzumə əvış perosneşe.çəy dədə əvış penc sinni sıftədə çı elmi təlim iyən imoni məsir iyən royədə ğərolış doe və məktəbxonədə da sornə təhsili bədiqə çəy dədə çəy çı fiğh iyən usuli iminə mellim iyən ustod be.....

Əv mıtoliyə,elmi mıbohisə iyən şeer handeyış bənə qıləy sənqəri bo həx iyən həyğəton mıdofiyə kardero vıjniyeşe.həmməysə vey çın nevcıvonə tələbə dıl bo ğayibə İmomi(əc) və Munciye-Movudi vey jeydəbe və əv bo bə Məhdəviyyəti mevzu ətrofədə bıə şubhəon cəvob doeyro elmi iyən dini mərkəzonış təşkil doe.co tərəfiku həm Qulpeyqanədə bənə bəhaiyyəti bıə fırğə zuhur iyən fəoliyyət ki,bə Kərimə-Ğıron iyən dini məfhumonku nodırıstə dərk və kəcfaməti xoto bə əməl oməbe.mərhum ayətullah Safi Qulpeyqani boştəş vəzifə zıneşe ki,deştə ruşinəti kardey əslə İslomi əğedəvi hədd və marzon çı daxili iyən xarici deşmınon bo milləti bə dast dənoey iyən bə zəlolət eğandero və çı İslomi camiyə imon iyən etığodon sıst kardero bıə mıdoxiləku vəy bıqəto və İslomi marzonku muhafizəko.

Əv peşo çı Qulpeyqaniku bə Ğomi şəhr şe və ço sor ki,əyo jimonış karde,de tədrisi ko məşğul be və çı yolə alimon məhzəriku bəhrəş barde.Həşi 1322-ə sori çı Nəcəfi elmi iyıən mənəviyə mərkəzi əvış bəştə səmt cəzbış karde.qıləy elmi mərkəz ki,dayima elmi əhli iyən çı tərığəti aşığon bəştə səmt cəzb kardedə.çəy təzazukorəti,husni-xulğ iyən çokə rəftor vey rə çəy məhəbbətış bə həmməkəson dılon nıştovnoşe.ayıtullah seyd Cəmaluddin Haşımi Qulpeyqani boəy çı iştihodi icozəş sadir karde və ım kəğəbonış boəy vəsfış karde: əlalimu, ələləmu, ələllam, ələlim, əlfazil,əlkamil,əlhumam,elmul-ə`lam......

Ayətullahul-Uzma Safi Qulpeyqani de mərcəiyyəti qırd şərayiton vucudi,de təvazurkorəti çəyku dəvarde tayinki,Hicri-Şəmsi 1372-ə sori azərə manqədə de ayətullahul-uzma Qulpeyqani irtiholi bə dini alimon iyən milləti çandə kərə isrori əsos nəhoyətən mərcəiyyəti məğamış ğəbul karde.

Ayətullahul-Uzma Qulpeyqani ıştə vəsiyyətnomədə -ıştə fərzəndon bo umumi mıəssiəon və coqlə koon bə vırə rosnero sıfarışış karde.və peşo nıvıştəşe:har qıləy vırədə ki,lozım bıbu,de ali cənob ayətullah hoci şeyx Lufullah Safi ki,az əy qıləy adil iyən məlumə mıştəhid zıneydəm-və çəy bəpeştə de Ğomi elmiyyə hovzə adil iyən məlumə mıştəhidonku qıləyni bəy əməl kardey bıbu.....