Həzrəte İmom Mosə Kazım(ə)-i şəhodəti sorəqardışi mınosibəti məxsusə bərnomə

Həzrəte İmom Mosə Kazım(ə)-i şəhodəti sorəqardışi mınosibəti məxsusə bərnomə.

Əzizə əməson səlom, ımruj Rəcəbə manqi 25 minnə ruje və de Həzrəte İmom Musa Kazım(ə)-i şəhodətə ruji sorəqardışi bərobəre, ım matəmə mınosibəti bə şımə xıdmət təsliyət ərz kardəm və urzo kardəm ım əzizə İmomi lutf və inoyət bə şımə ğısmət bıbu, bə həminə mınosibəti xoto, qıləy məxsusə bərnomə de (Kazımeyni bə aləmi nur səğandə həşi) nomo bıə bərnomə bə şımə xıdmət təğdim bəkam. Dəvət kardəm de ım bərnomə bə ico bımandən və de İmom kazım(ə)-i jimon və xusiyəton barədə oşno bıbənən.

Im vırə Kazımeyne və ım rujon Rəcəbə mıborəkə manqi rujone.

Bə tı ey Musəbne Cəfər(ə) Səlom, bə tı ey Babəlhəvaec Səlom, bəle ə Həzrət bə Babəlhəvaec məşhure, boçiki çəy barzə roh icozə nıdoşe ki ıştə kə bəyku, hiç qılə ehtiyocinə şəxs nomid bışo.

Imruj ıştə pokə hərəmədə, vey kəson de eşğ və meyl və umid bəştı dərqah omeydən ta çəvon daston bıqəti və əvoni bə İlahiyə nuri mənbə dəçokni. əmə həm de ıştı aşiğon və əhle Beyt(ə)-i duston bə ico, çəmə dıli Kazımeyədə və bə ıştı pokə hərəmi mehmon kardedəmon və voteydəmon:

السلام علیک یا خازن علم النبیین ، السلام علیک یا نائب الاوصیاء السابقین ، السلام علیک یا مولی یا موسی بن جعفر "

Xəsə Rədio əməson, şiəyon 7 minnə İmom, İmom Musəbne Cəfər(ə)-i dovran vey saxtə dovran be. Ə Həzrəti 35 sori mıddətədə bıə imoməti dovranədə, Əbbosiyə hakimon Əhle Beyt(ə)-i tərəfdoron işkəncə və təziğon jintonədə ğəror doəşon be və ım zalımə hakimon vey əyyoşəti və əxloği fəsodədə ğarğ bin. Im hakimon xususi Ələviyonro vey fəğırə şəroyet icod kardəşon be ta ım royku, Ələviyon bə həxinə İmom yəni İmom Musa Kazım(ə)-i səmti cəzb bey vəy bıqəton, iyən de ım vositə Bəni Əbbasi hukumət məhv bıbu.

Harunurrəşidi dovran, de Bəni Əbbasi zumandəti pik dovrani həmzəman be. Harun vey yolə ziyofət və xoş qozəranə icloson bərpo əki və ım mərosimon xərcon vey ziyod be, co tərəfi həm səyo cəhd əki milləti miyonədə, ıştəni mısılmononro hakim və dindor nışo bıdə.

Əbbasi hakimon xususi Harun vey səyo cəhdış be ta de har surəti xalisə islomi mınhərif kon. Harunorrəşidi zəmonədə vey inhirof bıə firğəon icod bıən ki həmmə bə İslami zid bin, Əbbasi hakimon zıneydə bin ki Xıdo Rəsul(s)-i nəsliku İmomon, çı nur və hidoyəti mənbəin, və İlahi təğvo, elm, fəzlədə mislışon ni, və ə yolə şəxson həxışone ki çı mısılmonon viloyəti ohdədor bıbun və səadəti roy, çəvon dastədəy, əmmo hakimon dınyo tələbəti, ilahiyə təğva nıbey, ğudrət tələbəti və sərvət qırdə kardey xusiyəton, ım dəvəşə həşi nur və həxinə İmomon vədə, mane ğəror doə be.

Əzizə duston, İmom Musa Kazım(ə)-i 35 sori mıddətədə bıə İmoməti dovran de Əbasiyə hakimoni bənə Mənsur, Hadi, Mehdi və Harun həmzəman be. Bə İmom Musa Kazım(ə)-i zidd, Əbbasi hakimon ciddiyət vey be.

İmom Musa Kazım(ə) ki Hakimon tərəfo, sadati ğətliam və Əhle Beyt(ə)-i tərəfdoron məhv kardey, əvindi, ıştə tərəfdoron bə təğiyə dəvət əki, Ə Həzrət ıştən həm təğiyə əki, əmmo fırsəti peydo bey zəmonədə, Həzrəte Muhəmməd(s)-i xalisə İslami təbliğ kardeyro beko nımandi.

İmom Musa Kazım(ə)-i siyosiyə nəzə, Əbbasi hakimon vədə, be eteno bey və təhğirə nəzə be, Ə Həzrət de co muxtəlifə metodon vositə əcumlə mıbohisə iyən həmkari nıkardey, Əbbasi hakimon ğeyre ğanuniyə hukuməti ifşo əki, İmom səyo cəhdış be ta milləti etımo bə ım hakimon zəif bıbu.

Qıləy ruj ki Harun qıləy iclosi icod kardəş be ta İmom(ə)-i təhğir ko, İmom Musa Kazım(ə) de Kərimə Ğıron və Həzrəte Fatiməye Zəhra(s) vositə, ıştə mənsobiyəti bə peyğəmbər(s)-i, sobit kardəşe, və Xıdo Rəsul(s)-i xandani əzəməti bə yod vardəşe.

İmom Musa Kazım(ə) vey səyo cəhdəkə iyən əktivə odəm be, ə Həzrət(ə) bə islami umməti muxtəlifə məntəğəon səfər və həmonə vırəonədə çand qılə şəxsi bənə ıştə nımoyəndə intixob kardəş be, həğiğətədə ım nımoyəndəon millət və İmom(ə)-i miyono vositə bin, Əhle Beyt(ə)-i tərəfdoron de məxfi surəti və de ım vəkilon vositə, ıştə şəri və dini sovalon bə ə Həzrət(ə)-i rosnedə bin, ijən cəvob həm əqətin, şəri pulon bə ım vəkilon ədin və əvon həm ım pulon, xususi roonku bə İmom Musa Kazım(ə)-i ərosnin.

İmom Musa Kazım(ə), mehribon bey, bə millət komək kardey və ğeyzi kontrol kardey, ıştə rəftoron metodi ğəror doəş be. Ə Həzrət(ə) be ədəbon və əsəboniyə şəxson vədə ıştə ğeyzi kontrol əki və çəy vədə bə əvon mıhəbbət mokafat ədi. Vey kəson bin ki de İmom Musa Kazım(ə)-i ım ğəşənqə rəftori vindey vositə, hidoyət və bə İslam dini səmti cəzb bıə bin. Ə Həzzrəti ım xusiyət jəqo oşko be ki əy Kazım yəni ğeyzi kam bey ləğəb noəşone. Voteydən ki İmom Musa Kazım(ə)-i vədə, Umərebne Xəttabi nəvəonku qıləy mırd, bə İmomi cəd yəni Həzrəte Əli(ə) tovhin kardəş be. İmom Musa Kazım(ə)-i bə ico bıə kəson, pidə bin bə ə mırd həmlə kon, əmmo İmom(ə) mane be və bə ə mırd mehriboni kardəşe, anədə ki ə mırd bə İmomi əzəmət etırofış kardə.

Əzizon, Şiə və sınni mənbəonədə, , İmom Musa Kazım(ə)-i əbaxşəti və səbri barədə muxtəlifə fakton mıvcudin. Şeyx Mofid həmonə zəmoni milləton miyonədə,  ə Həzrəti vey əbaxşəti soyb bıə şəxsiyəti zıneydə be ki şəvonədə bo Mədinə fəğır və ehtiyocinə şəxsonro xorək əbardi və fəğırə şəxson ehtiyoci təmin əki. İmom Musa Kazım(ə) de ə kəson ki bə Həzrət(ə)-i zərəl-ziyon varid kardedə bin həm mehribon be və hətto bo əvon mokafat ədi.

İmom Musa Kazım(ə) vey ibodət əki, jəqo ki bə ə Həzrət(ə)-i salehə bandə ləğəbi doəşone. Ə Həzrət(ə) anədə ibodət əki və dırozə səcdəonədə, Xıdo yod əki, ki həbs zəmonədə zindonbonon həm çəy təsiri jintonədə bin.

İmom Musa Kazım(ə) de vey muşkilaton dim bə dim bey zəmonədə həm, Xıdoku şıkr əki, hətto zəmoni ki bə Haruni əmri xoto, əy bə zindon bardışone, Xıdoku təşəkkurış be ki ibodət kardeyro qıləy fırsət icod kardəş be, və hemiyəşe: "ey Xıyo, həmişə tıku qıləy fırsəti tələb əkim ki tıni ibodət kəm, və tı ım fırstəti bomo icod kardəş, çen tıni şıkır kardedəm".

Nəhayətədə, İmom Musa Kazım(ə) Hicri Ğəməri 183 minnə sorədə, Harunorrəşidi dəhşətinə zindonədə, və de "Senədi Bin Şahək" nomo bıə zalımə şəxsi vositə, zəhrin və şəhid bıə.

Zindonədə, İmom Musa Kazım(ə)-i ğəhrəmonəti jimon, tovhidi həğiğət və ə Həzrəti xalisə rabitə deştə yolə Xıdo be. Ə Həzrət(ə) de səbr və de zılmi vədə muğavimət kardey vositə, bə həmmə şəxson umuteşe be zindon və zancirədə həm, təğva, ozodi və fəziləti çeraği ruşin karde bəbe.

Səmimi həmzıvonon bə ım bərnomə quş doe xoto, şıməku təşəkkur kardəm, dəvət kardəm dəmə bə ico bımandən və bə Rədio co bərnoməon həm quş bıdənən.