De həzrət Muhəmmədi(s) Məbəsi ruji mınosibəti
De həzrət Muhəmmədi(s) Məbəsi ruji mınosibəti
Əzizə əməson, səlom, şımə ğəşənqə ruj bə xəyr bıbu, əzizon ımruj de Rəcəbə manqi 27 minnə ruj və Xıdo Rəsul(s)-i besətə ruji bərobəre, ım ruj ki insoni çı şırk, be ədoləti, fəsod, nodonəti və nohəxətiku ozod bey ruji binovrəy, bə şımə tıbrik ərz kardəm.
Bə həminə mınosibəti xoto, ım bərnomə Xıdo Rəsul(s) və besətə ruji barədəy bə şımə təğdim bəkamon ki və şıməni dəvət kardəm de Tolışi Rədio bə ico bımandən.
Mehribonon, 13 sor Peyğəmbəri hicrəti bənav, Rəcəbə manqi 27 minnə ruj, Məkkə muğəddəsə şəhri, Həra mağaraədə bə İslami qıromiyə Rəsul(s)-i mıborəkə dıli, ilahiyə vəhy nozil bıə, ım yolə hodisə çı Həzrəte Muhımmd(s)-i 40 sorəti sinnədə vağe be.
Həzrəte Muhımmd(s) vaxti Xıdo tərəfiku bo xalği hidoyət kardey vijniyə bıə be ki dınyo, əxloği nəzəku vey suqut kardəş be və bə Ğıroni nəzə əsos, milləti oşko surəti mınhərif bıə bin. Ə Həzrət(s) bo həmmə dınyo bənə rəhmət və nicotəbaxş be və bəştə səbr və səyo cəhdi xoto, cohiliyəti dovrani bə oxo rosnişe və insoniyət əsr və dovrani çəy əvəzi icod kardeşe.
Besət, bəşəri torixədə, insoni çı nodonəti, nosəhihə roy və inhirofiku ozod kardey, vey əzəmətin və yolə hadisəonku qıləy mesaje. bə Həzrəte Fatiməye Zəhra(s) nəzə əsos: "yolə Xıdo tokionış de Muhəmməd(s)-i nuri ruşin kardeşe və kofri tokionku dılon xaric kardeşe, və çəşon vədə bıə pardəon bə kənoş jə."
Xıdo Rəsul(s), İslam dini icod kardəşe və Qıroni bənə vey çok iyən komilə təlimi bə inson elanış karde. Peyğəmbər(s)-i besətə ruj, insoni, çı şırk, beədoləti, nobərobərəti, cəhl və Fəsodiku xilos bey binovrəy ta bə tovhid, mənəviyət, ədolət və kəromət səmti hərəkət ko.
Həzrəte Muhımmd(s) dıştə dılənıştə sədo vostitə, bə odəmon hamiyəşe:” boənən ğərəz Xıdo pərəstış məkəmon, və bəy hiç çi şərik ğəror mədəmon ta bə səadət bırəsəmon”. Tovhid çı ilahiyə Peyğəmbəron besəti hədəfi iminnə çiyonkue. Həlbətə nə bə ım məeno ki inson ıştə fikədə etığadış bıbu ki Xıdo 1 qıləye. Tovhid ilahi hakımiyət və həmmə tağotonku diyəro mandeye. Tovhid yəni ğərəz ilahi ğudrət və zumadəti, bə hiç qılə ğudrəti təkyə nıkardey. Jəqo ki Xıdo hamiyəşe: de Xıdo Rəsul(s)-i nığıl və mənəvi dəvəti vositə, cəhl və xurafat , divoon vey rə xərob və millət dastə dastə bə islami tərəf cəzb bıən.
əzizə duston, Həzrəte Muhımmd(s) 23 sor, islam dini təbliğ kardey mıddətədə, ıştə məsuliyəti ləyoğətin əncom doşe, anədə ki Xıdovənd Əhzabi surə, 21 minnə ayədə Peyğəmbər(s)-i bənə ləyoğətinə ulqu zıneydə və çəy məğomi vırə barədə hamiyəşe:
“Həyğətən, boşımə Xıdo Rəsuli(rəftorədə) qıləy çokə ulqu və nımunə heste. bo əkəson ki, bə Xıdo iyən ğıyoməti ruji umuşon heste və Xıdovəndi ziyod zikr kardedən”.
Peşo har kəs pidəşe İslam dini çokə surəti bızno, və bə çəy bərnoməon əməl ko, bəpe bə İslami Peyğəmbər(s)-i votəyon və rəftoron əməlış bıbu.
Be şək ım ki Peğəmbər(s) millətiku vıjniyə bıə, Xıdo tərəfiku qıləy yolə neməte. Xıdo ə odəmi vıjniyəşe ki deştə kərimonə əxloğ və ali və nımunə təlimon, dınyo bə poki və qəşənqi səmti hidoyətış kardə. Cımə surə 2 minnə ayədə Xıdovənde Xaliğ hamiyəşe:
Əv (Xıdo) ə kəse ki, dərs nıhandə cəmiyəti miyono, qıləy, çəvon ıştəku Rəsulış vıjniyeşe, ki çəy ayəon bo əvon handedə, və əvoni təzkiyə(pok) kardedə, və bəvon kitob(Ğıron) iyən hikmət omuteydə.
Çən Kərimə Ğıron, Xıdo Rəsul(s)-i besətiku co qılə hədəfi milləti cəholət və bevəcətionku pok və əvoni prosniye və çəvon insoni aliyə estedadon və ğabeliyəton hevuj kardey, elan kardə.
Kali şəxson təsəvvor kardedən ki cəholət fəğət bə Xıdo Rəsul(s)-i dovrani məhdud bıə ki bə cohiliyət dovrə məşhure və dəvardə, əmmo həğiğət ıme ki har zəmon ki inson, insoniyəti marziku diyəro bıbu və bəştə nəfsi həvo səmti bışo, cəholətədə ğarğ bıə, Aya holi hozırədə dınyo behronon, insoni cəholət və ziyod tələbi və ğəddorəti nəticə ni?
Və aya bə Fələstini məzlumə millət və hırdənon zılm iyən sitəm varid bey, bəşəri elm və sivilizasiya nəticəy ya çəy zumand tələbi və cəholətiku?
Be şək insoniyət və məərifət hissədə, dınyo bə tojə rəstaxiz və islahati ehtiyocışe, həmonə ğiyomət ki Xıdo Rəsul(s) çəy binoəkə be və çəy hidoyətəkə mesaj həm karde bəzne ımrujnə niqəron və heyronə insoni bə ədolət və əxloğ səmti cəzb ko.
Səmimi əməson, Həğiğətədə İslami Peyğəmbər(s)-i besət, bəşər və insoni zoti ehtiyoci cəhətədə vey muhimmə hadisəonkue və İmon, məərifət, oqohəti, bıvəti və humanizmi şoləun ruşin kardəşe.
Beşək bəpe bıvotımon ki ımruj dınyoədə humanizm şuaron, həmonə besəti şuaron və mesajone. Məsələn ictimai ədolət, elm və zıney, bə inkişof rəsey şuaron.
Har kəs ki bə Xıdo Rəsul(s)-i ruşinəbaxşə mesajon quş bıdə, ıştə və ıştə dınyoku bə səhihə dərki bərəse. Xususi 21 minnə əsri inson, ki co zəmononku vey bə ım təlimon ehtiyocışe.
Imrujnə bəşər, deştə daxıli və xarıciyə bıton və tağuton, həğiğiyə səadət və inkişofiku diyəro bıə. İnson əqə bə həğiğiyə tovhid oqardo, hiç faxt hiç curnə be ədoləti və zılmi ğəbuləkə ni.
Muhimmə nuktə ıme ki Xıdo Rəsul(s)-i mesaj həmişə tojə və tərovətine və bə mısılmonə alimon nəzə əsos: “ jəqo ki qıləy do barədə, əvvəl şəxs qıləy donə kaştedə, ki bə havzə beməyon əvəz bıdə, və peşo livə doydə və peşo çəy vılon zizə kardə, və peşo bə mivə əvəz bəbe ki həmonə mivə həm çəyədə donə heste, jəqo həm Həzrəte Muhımmd(s)-i Mesaj dəvomışe və həmişə zizə doydə və bə nəticə rəseydə”.
Xosə əməson bə ım bərnomə quş doe xoto şıməku təşəkkur kardəm, dəvət kardəm de tolışi Rədio bə ico bımandən və bə ımrujnə bərnoməon idomə quş bıdənən ki koy həmroon bə şımə xıdmət təğdim bəkan.
