Xıyzoni məcəllə-26
Xıyzoni məcəllə-26
İronədə jıqo mod və dəbe ki,çı domod iyən zomo moə və hovə boştə zoə qıləy çokə kinə vıjniyedən.peşo deəy məşvərət və məsləhət kardedən ta əv rozi bıə holədə bə həmonə kə bışon. ım daynəti məclisədə adətən çandə qılə xanım çı zomo tərəfiku bə xanımə kinə kə şeydən. həmonə xanımə kinə xıyzoni əvoni ğəbul kardedən və bəçəvon sıvolon cəvob doydən.çay peşomey bədiqə ehanə zomo xıyzon həmonə xanımə kinə pəsəndko və xoşış booy,əsliyə mevzuku bəhs kardedən.əmmo pəsənd nıkon,həmonə mehmonəti tərk kardedən.ehanə har dıqlə tərəf iyande pəsəndkon,peşonə məclis de zomo iştiroki bərpo beydə.bın məclisədə kinə de zomo sühbət kardedə ta de iyande vey və çok-çoki oşno bıbon.məclisi oxoyədə əgər əvon iyande pəsəndkon və xoşışon booy,bə həmonə vəyuə kinə qıləy çokə hədiyə doey beydə və vəyə ğənd darıştey beydə.
Kinə de zoə çandə kərə sehbət kardey bədiqə,”bəle-burun” ya həmonə ha sıey mərosim bərpo beydə.bın mərosimədə aylə yolon bə ivrə cəm beydən və bo vəyə mərosimi bərpo kardeyro və izdivoi şərayiti barədə de iyande sehbət kardedə.zoə xıyzoni tərəfiku qıləy həlğə,çadrə porçə və məclisi olət və xələt,pəlu və şol de iadstə vıl iyən şini bə vəyuə kinə kə hədyə doey beydə. həmçinin ıştə təəhhudon və sehbəton bə qıləy koğəzi nıvışteydən və imzo kardedən.peşo xıyzonon bo nomizədəti və nışoni mərsoimiro tədaruk vindedən və ıştə behəddə şoyvonəti de cokəson şərik ğərol doydən.
Imruj de kali xıyzonon çı ənənəvi holətiku bə mıosirə formə dəşeymodern və mıosirə daynəti ısət çəvon miyono rəvocış pəydu kardə.bın holətədə çı kinə iyən zoə xıyzoni rol kam bıə və təşrifoti iyən formal surətədə həmonə daynəti məclisonədə iştirok kardedən.çıro ki,çın mərosimon bərpo bıey iyən dıqlə xıyzoni de iyande oşnoəti bənav,zoə de kinə de iyande və de iyande koy muhuti oşnoətiş bıə və əvon yəndeşon vində və de jıqo məclison bərpo kardey iyande şərayitiku xəbədon və de iyande qəpışon jıə.nəticədə xıyzoni çı fərzəndi vəomədə jimoni həmro vıjniye koyədə qıləy rolış mevcud ni.əmmo çun cıvonon bın muhimmə koyədə qıləy təcrubə nıbey xoto və həmçinin çun əvon bəştə emosiiyə iyən hisson quş doydən,qahi zəmon de mıəyyən beovandəti dimbədim omeydən.
