Şə`banə manqi bino bıeyro məxsusi bərnomə

Şə`banə manqi bino bıeyro məxsusi bərnomə

Əzizə əməson səlom, şımə cəmə ruj bə xəyr bıbu. Imruj Şəbanə manqi 1 minnə ruje, şəbanə manq Ğəməri 8 minnə manqonku və bə Xıdo Rəsul(s)-i manq məşhure. Həmonə manq ki sori manqon miyonədə vey erjin və bərəkətine. Bə çəy xoto ki Şəbanədə vey mınosibəton bənə, İmom Huseyn(ə), Həzrəte Əbulfəzl(ə), İmom Səccad(ə) və həmçınin Həzrəte Məhdi(əc)-i milad rujon ğəror qətəşe ım manq vey fəzilətin və bərəkətin bıə. Rədio Tolışi həm ım manqi və çəy vəoməy rujonədə bıə mınosibəton bə şımə təbrik ərz kardedə.

Dəvət kardəm de ım bərnomə bə ico bımandən.

Mehribonon, dəvardə 2 sorədə, korona virusi pandemik şəroyet bois bıə ki vey məçiton və cımə nımojon tətil, İmomon pokə hərəmon bəon bastə və vey məzhəbi bərnoməon ləğv bıbun, əmmo vey məzhəbi odəmon etığadışon heste ki ım virus qıləy tojə ımtıvone, həmonə imtıvon ki karde bəzne de bərnoməon əvəz bey vositə əcumlə Təvəssol, bə Xıdo diğğət kardey, çəyku bənə fırsət istifodə bıbu. Kərimə Ğıron hamiyəşe: “Iştə pərvərdıqori de tars-larzi iyən ıştə dılədə ahəstə və orom,ha sıbi faxti iyən şanqonəy, zikr bıkə iyən çı ğafilonku məbi”.

Rəvoyətonədə omə ki Xıdo Rəsol(s) bə ım manq vey meylış be. Çən ım manqədə Xıdoş, vey ibodət əki. İmom Sadığ(ə) hamiyəşe: vaxti Xıdo Rəsul(s) şəbanə manqi ovşumi əvindi, əmr əki ki vanqəkə vanq bıkə ki” ey yəsrebi əholi, az Xıdo səmtiku bə şımə tərəf vığandə bıəm, aqah bıbənən ki Şəban çıme manqe, çən Xıdo rəhmət bə əkəs ki ım manqədə mıni komək ko”

Komək və himoyə kardey yəni inson ıştəni bə Peyğəmbər(s) və çəy xandani nez ko ta qınohku diyəro bımando və bə Xıdo dəraqo nez bıbu. Xıdo Rəsol(s) ıştə umməti dəvət kardedə ki çəy manqədə dəy bə ico bımandən, ım bə ico mandey “komək və himoyə” təfsir bıə. əmmo çoknə karde bəznemon ım manqədə Xıdo Rəsul(s)-i himoyəkə və dust bıbəmon? Yolə arif, Mirza Cəvad Ağa Məleki Təbrizi votəşe:” har kəs ki ım yolə dəvətiku oqo bıbu, bəpe səyo cəhd bıkə ki, dəvət bıə kəsonku bıbu.

Şəbanə manqədə, bə Xıdo Rəsol(s)-i komək kardey roonku ıme ki çəmə əməlon de Xıdo Rəsol(s) və Ğıroni tələbon, mıntəbiğ bıbu. Rujə qətey ım koonku qıləynie. Bə Kərimə Ğıroni votəyon əsos, rujə insoni vıcudədə təğva stabiləti bois bəbe. Peşo peyğəmbər(s)-i ummət de rujə qətey vositə, karde bəznen vey poki və xalisəti kəsb kon və bəştə peyğəmbər(s) nez bıbun. Həzrəte Əli(ə), Xıdo Rəsol(s)-i ım dəvətəi barədə hamiyəşe: həmonə zəmon ki ım manqiro Xıdo Rəsol(s), vanq əki, az məsedə bim,  və əqə Xıdo pidəş bıbu, hiç vaxt ım manqədə rujə qətey dastiku nıdome, və ıştı umrədə əy dastiku ni bədom”.

Xıdo Rəsol(s) ım manqədə, ıştən həm rujə əqəti və peşo Rəməzanə manqədə həm jəqo iyən hamiyəşe: “Şəban çıme manqe, har kəs i ruj çıme manqədə rujə bıqəti, beheşt bəy vacib bəbe”

Bə Xıdo Rəsul(s) drud və sələvot vığandey, Şəbanə manqədə sıforış bıə əməlonku co qıləynie. Şiə mədəniyətədə, sələvot xususi vırə soybe.jəqo ki Xıdo Rəsol(s) Pəxıl şəxsi elan karde barədə hamiyəşe:” həğiğiyə pəxıl ə şəxse ki çıme nom çəy nəzədə vardə bıbu əmmo bə mı durud vığandeyku imtinoş bıbu” ijən sələvoti keyfiyəti barədə hamiyəşe: “sələvot vığandey zəmonədə ıştə sədo bə barz kənən, boçiki dılonku nifoğon məhv kardedə”

İroni islamiyə inğilobi təsisəkə, İmom Xomeyni(r), (Əsrarossəlot) nomo bıə kitobədə de rəvəyəti bəyon kardey vositə, bə peyğəmbər(s)-i Sələvot vığande fəziləton barədə hamiyəşe:”har kəs ki bə Peyğəmbər(s) səlom voteydə, bəpe mıqət bıbu ki çəy əməl de ım sələvot və səlomi zidd məbu, boçiki Sələvoti roh, təhiyyət və ehtırome, və sələvoti roh de əzobi bə ico mandey muxalife, ə Həzrət idomədə əlovəş kardə:” peşo har vaxt ki bə peyğəmbər(s) və çəy xandani sələvot vığandəş və deştə zıvoni bəy sələvot vığandəş, peşo mıqət bıbi ki deştə əməli vositə əy əzob mədə ki əqə jıqo bıbu ıştı sıxən və əməl bərobər nibəbe, boçiki Xıdo Rəsul(s) və Əeme Əthor(ə), ıştı əməlonku aqahin”.

Şəbonə manqədə, mehribonə Xıdo mınocot kardey, dini yolə şəxson co qılə koonin. Im mınocotonku əcumlə Şəbanə manqi məxsus və ğəşənqə mınocote ki Əmirəl mumenin Əli(ə) və çəy hırdənonkue ki əy ım manqədə handeydə bin.

Şəbaniyə mınocoti qıləy baxşədə handedəmon: pərvərdıqoro,bə qılə diyə ki bə tı nəzə ko, çəmə dıl və coni çəşon ruşin və oşko ko,  ta ım ki ım çəşon və dılon, nuri pardəon poə ko, və bə tı məğomi yol və əzəmətinə mənbə dəçokno, və çəmə roh və pisixi bə de tı rabitə xoto, əziz bıbu və bə çəmə həvo həvəson səbarz bıbumon.

Bə Xıdo səmti nez bey bəhsonədə, Xıdo Rəsol(s) və Əeme məsomin(ə) əmronku itoət kardeye və ın vey muhimmə məsələonku qıləynie, həmçınin  Şəbanə manqədə Xıdo oxonə huccəti milad ruj və çəyku itoət kardey, Xıdo Rəsol(s)-iku himoyə kardey mənodəy.

Xıdo Ğıroədə hamiyəşe: vey çokə oləton, təğva olətonin. Təğva yəni dınyo nopokionku diyəro mandey ki de çəy vositə bə Xıdo rəsəy roy vey rohət bəbe. Rəcəb, Şəban və Rəmezanə mıborəkə manqon qıləy fırsət hestin ki inson ıştəni bə Xıdo nez ko.

Həmçınin rəvoyətədə omə ki Xıdo Şəbanə manqi iminnə rujədə bə beheşti bəon əmr kardedə ki oj bıbən və bə Tuba do toğə əmr kardedə bə ım dınyo nez bıbun, har kəs ki ım rujədə rujə bıqəti, har kəs ki jen və çəy həyot həmro ya dədə və çəy hırdən ya xışavəndon ya çəy hamsuyə mırdo jen ya xarıciyə jen və mırdi miyonədə aşti və sulh icod ko, har kəs co kəsiku tələbış bıbu əy kam bıkə, har kəs ki ıştə ğarzi bıdə, har kəs ki yətimi kəfoləti ohdədor bıbu, har kəs ki Ğıron bıhando, har kəs ki Xıdoş yod bıkə və bə çəy neməton yod bıbu və Xıdoku təşəkkur bıko,  har kəs ki bə noxəşon osə ğando,har kəs ki bəştə dədə və inə çoki bıkə, har kəs ki qıləy cənozə təşyiədə bıbu, har kəs ki çokə ko əncom bıdə, beşək bə Tuba do toğəonku qıləyni ehşte bəbe.

Xosə əməson bə ım bərnomə quş doe xoto şıməku təşəkkur kardəm, dəvət kardəm de tolışi Rədio bə ico bımandən və bə ımrujnə bərnoməon idomə quş bıdənən ki koy həmroon bə şımə xıdmət təğdim bəkan.