Bə Nimeye-şəban məxsus bıə bərnomə

Bə Nimeye-şəban məxsus bıə bərnomə

Əzizə əməson səlom, şımə cımə ruj bə xəyr bıbu, ımuj qıləy məxsusə ruj, Həzrəte İmom Zəmon(əc)-i milad ruji sorəqardışe, ım yol və əzizə ruji bə şımə xıdmət təbrik ərz kardedəm və dıvo kardedəm ki har çəxtə rə ə Həzrəti zuhur nez bıbu ta həmmə mısılmonon çəş, dəy vindey vositə ruşin bıbu. bəle Əzizon, Hicri Ğəməri 14 minnə əsrədə bıə 1443 minnə sori Şəbanə manqi 15 minnə ruj ki de ımsornə oxonə cımə ruji bərobəre, Həzrəte Vəle Əsr(əc), bə dınyo omə.Həmçınin ım bərəkətinə mınosibəti de nəvuzə idi həmzəman, insonon şoəti və şovği çand bərobər kardə. Im bərnomə bə ım əziz və yolə imomi ixtisos doəmone, dəvət kardəm de ım bərnomə dəmə bə ico bımandən.

Əzizon, həmonə zəmon ki ozodi və ədoləti həşi oşko bıbu, ə Həzrət qıləy xoşə simo və ğəşənqə mırdi ğolibədə zuhur bəkay. Çəy olət və əndom təmize iyən xoşə bu dodə. Çəy dəvəşə simaədə insoniyət və ləyoğət vindey bıdə. Xıdo Rəsul(s) əy çı beheşti əhli tovus zıneydə. Çəy təvil oj və nurani heste və çəy çəşon siyon və çəy sinə vey hevuje. əxloğ və simaədə, odəmon miyonədə, bə Xıdo Rəsul(s) vey şəbih heste. Peyğəmbəri əhliku qıləy astovəy. Həzrəte Məhdi(əc)-i vucudədə, fəğət Həx peydo bəbe və ə Həzrəti nəzdədə nur heste. əv de Xıdovəndı Xalıği koməki, dışmenon və zılımon vədə səbarz bəbe.

İmom məhdi, ki çı aləmi monciye, noğafil zəmonədə aləmədə oşko bəbe. Həzrəte Muhəmməd(s)-i olət və əmmomə, de Həzrəte Məhdi(əc) bə icoe. əv həmmə çokətion soybe, əv 124 həzo peyğəmbəri ovəynəy ki Xıdo səmtiku və bəşəriyəti hidoyətiro vığandə bıən. Bə çəy xotoe ki çı peyğəmbəron əxloğ və rəftor Həzrəte Məhdi vucudədə vindey bıdə. Zuhuri zəmonədə həmmə bəştə tərəf vanq bəkarde ki " ənə bəğiyətulla" yəni "azim çı Xıdo ehtiyot iyən oqətə bıə munci".

Həzrəte Məhdi(əc)-i bə dınyo əmo vaxti, İmom Həsən Əsqəri(ə)-i kə bə ım mıborəkə hırdəni təvəlludi xoto, vey nurani be hiç kəs ın hadisəku oqoh nıbe. İmom Əskəri ki zıneydə be, deştə hırdəni vositə, dınyoədə ədolət bərpo bəbe, hamiyəşe: "Xıdo şık kardəm ki bəji mandəm ta çıme canışini bıvindom, əy ki sima və əxloğədə bə Xıdo Rəsul vey şəbih heste. Xıdo çəy ğıybətədə, əy muhafizə bəkarde və peşo əy oşko bəkarde, ta dınyoədə zılm və fəsodiku pur bey de ədolət pu bıbu.”

Həzrəte Məhdi ıştə jimoni əvvələ soronədə, ıştə dədə kənoədə be, əmmo vaxti çəy dədə şəhid be, qıləy 5 sornə hırdən be ki çəy imomət dıvrə bino bıə. bə həmonə dəlilon ki deşmənon və mıxolifonku Həzrəte Məhdi(əc)-i viloyət məxfi bıbu, milləti çəşonku həm məxfi mandeşe, ə Həzrət de 4 qılə xususi nımoyəndəon vositə de milləti rabitəş be və əvoni hidoyət əki. İmom Zəmon(əc)-i ım dıvrə bə "ğeybəte Soğra" məşhure, ki 69 sor mıddətış be və ım dıvrə bəpeşt, de Xıdo əmri vositə Həzrəte Məhdi, çəşonku ğayib iyən məxfi bıə ta qıləy rujədə ki vote bəbe cımə ruj və Məkkə səmtikue, zuhur bıkə.

Əmmo hiç mənbə ni ki Həzrəti zuhuri zəmon çəyədə ğeyd bıbu, bə İslami peyğəmbəri votəyon əsos, fəğət Xıdovənde ki Əv (Məhdi) oşko bəkarde. Həmçınin İmom Muhəmməd Bağır(ə) çı Həzrəte Məhdi(ə) zuhuri barədə, bə Hədid Surə 17 minnə ayə işorəş kardə:

Aqah bıbon ki Xıdovənd zəmini çəy mardey bəpeşt, bəji bəkarde.

Həmçınin bə İmom Muhəmməd Bağır(ə)-i nəzə əsos, Xıdovənd de İmom Məhdi vositə zəmin bəji bəkarde, yəni dınyo ki de zılm və       be ədoləti vositə mardə və be roh bıə, de İmom Məhdi ədolət bərpo kardey vositə, tojədən roh peydo bəkarde və bəji bəbe.

Peşo ə Həzrəti 313 nəfər xususi əshabon Məkkə şəhrədə və ğərəz Həcci nıbıə zəmonədə, qırdə bəben. həminə i bey, Bəğərə surə 148 minnə ayə bə çəmə yod bəvarde, ki Xıdo hamiyəşe:

 "harco bıbun, ğıyoməti ruji şıməni həmmə hozzo bakay.  həyğətən ,xıdovənd bə har ko ğadire."

Kərimə Ğıronədə Həzrəte Məhdi(əc)-i zuhuriku bə nə qıləy ruji yod kardəşe ki Xıdo aləmi nuriku pur bəkarde, yəni qıləy ruj ki həmmə ğəşənqion, bə aləm hakim bəbe və həmmə çokəti xusiyəton ki Xıdoədə zıneydəmon, Ə Həzrəti zuhuri zəmonədə vağeə bəbe. Ə Həzrəti zuhuri zəmonədə dəvardəku vey, dinon noğisətion oşko bəbe və islam bənə vey çokə dini zıney bəbe. həmçınin ə zəmonədə həmmə roon və şivəon i bəbe, Həzrəte Məhdi(əc) Ğıroni ım dəvəti bə vırə bərosne, ki yeqanə Xıdo ibodət bıkənən və hiç çi dey şərik mədənən.

İroni yolə filasof, Mollasədra, voteydə: "İmom Zəmon(əc)-i zuhuri zəmonədə qıləy koon bə vırə bərəse, ki de Xıdo Rəsul(s)-i tələbon mıntəbığe, boçi ki ım 2 qılə yolə şəxsiyəti miyonədə, zoti surəti rabitə heste, bə çəy xotoe ki Zuhuri zəmonədə vəhy və nəbovvət hədəfon bə vırə bərəsen, və həğiğəti həşi nur həmmə dınyo pur bəkarde. Həmçınin zuhuri zəmoni co xusiyəton ıme ki dini fəğihon miyonədə ixtilofon məhv bəbe və qıləy mıvzoədə bıə muxtəlifə nəzəon i bəbe və bənə Xıdo Rəsul(s)-i zəmonədə, həmmə məzhəbon və dinon bə i qılə din və məzhəbi əvəz bəben."

Jəqo ki ərz kardedəmone, de zuhuri vositə islami ictimaədə, ictimaiyəti rabitəon muhiyətədə əsosiyə təhəvolaton icod bəbe, insoni rabitə deştə Xıdo əvəz bəbe, həmə dınyoədə Xıdo ibodət kardey xuşə ətro bu pevlo bəbe. İnsonon bə fiki ozavziye bərəsen. Çəvon əğl vey komil bəbe. Həmçınin insonon rabitəon de yande əsosi surəti əvəz bəbe. Həmonə zəmonədə hiç qılə inson bə co kəson həx-huğuği təcavuz nibəkarde, hiç kəs bə co kəsi zılm nibəkarde, beədoləti ,du, canq, fitnə, kin-kurorət və ğəddorəti məhv bəbe, və har kəs be hiç muşkil bəştə həx-huğuği dast peydo bəkarde.

Bəle həğiğət ıme ki bə Məhdəviyət bovə mand bey, dılonədə umid və xatıcəməti icod bəkarde. Dəvardə soronədə Feronon bin ki Xıdo bey iddioşon be və ımruj həm şoyd hestimon ki Yəmən, Fələstin və Əfğanıstonədə hırdənoni ki bəştə ailə tikə tikə bıə bədəni diyə karde holədə və qim bıə ədoləti dumoədən, əmmo de ım vucud bəşəriyəti umidışe ki torix jığonə bə oxo nırəso və be şək dınyo nur, aqahi və dustiyətiku pur bəbe, həmonə dınyo ki bə həğiğət və eşği tərəf bəşe iyən həmonə zəmon heste ki əv yəni İmom Zəmon(əc) zuhur bəkarde.

Əzizon bə ım bərnomə quş doe xoto şıməku təşəkkur kardedəm, şıməni dəvət kardəm de Tolışi Rədio co bərnoməon həm bəico bımandən.