Mərhum Ayətullah Ələvi Qorqani

Mərhum Ayətullah Ələvi Qorqani

Həşi 1400-ə sori oxonə rujonədə  Şiyə mərəciyyət və fəğohəti mərkəz bıə Ğomi mığəddəsə şəhr,bə qıləy alim,fəğih iyən mıştəhid bıə aliğədrə ayətullah seyd Muhəmməd Əli Ələvi Qorqani firği xoto doğdor be.qıləy yolə mərcəye-təğlid ki,çəy konomə və dosye pure de bə şiyə məzhəbi xıdmət,dini maarif iyən hovzəvi dərson təhsil iyən tədrisi.ın aliğədrə mıştəhid Həşi 1400-ə sori oxonə rujonədə  yəni İsfənd manqi 26-ə pencşanbə ruji de şiyə alim iyən milləti iştiroki bə ico həzrəte Məsumə(ə) hərəmi covar və kənoyədə dəkandey be.

Mərcəiyyət və çəy torıxi fuksiyə iyən məğami təbyin kardey və bənə  çı İslomə din iyən Təşəyyu məzhəbi nığo doey bıə muhimm iyən əsosə məsələonku bə hisob omeydə.Şiyə mərəciyyət har qıləy zəmon bənə din,məzhəb iyən milləti himoyə əkə həmməysə dıjdə unvoni qıləy rolış ifoş kardə və çok-çoki ıştə ehədədə bıə vəzifəşon bə vırə rosnə.Şiyə mərəciyyət de bə dini barzə maarifi təkyə kardə holədə və ya İslom iyən Ğıroni risoləti təblıği və bəşəriyyəti hidoyəti koy məşğul bıən.yolə fəğihon dayima de elm iyən imoni və de təvazu,şucoət,sodə jimon,din iyən milləti mıdofiyə kardey bın məsir iyən royədə qəmışon peqətə və cokəson həm bəçəy əsos çəvon dumo şıən.mərcəye-təğlidon torıxi dırozi kardeyışon zınə ozodonə formədə ğərolon bekardəşone və ozodə şikilədə deştə risolət və missiyə məşğul beydən və eyni holədə ıştə həyğiyə istiğloli yəni çı devlət iyən hukuməton maddi iyən mənəvi cəhəto bəşıkrətiku ıştəni oqıəteydən və qıləy mıstəğilə fikışon heste.