Həzrəte Xədicə(ə)

Həzrəte Xədicə(ə)

Əziz mehribonon səlom, dıvo kardəm Xıdo dərqohədə şımə nımoj-rujəon iyən ibodəton ğəbul bıbun, əzizon ımruj de Həzrəte Xədicə(s) rehlətə ruji sorəqardışi bərobəre, ım matəmə ruji bə şımə xıdmət təsliyət ərz kardəm. Dəvət kardəm bə ımrujnə bərnomə diğğət kənən ki ım qıromiyə Xanımi barədəy.

Xosə həmzıvonon, mıburəkə Rəməzanə manqi 10 minnə ruj, İslomi dınyo yolə xanım, Həzrəte Xədicə(s) deştə mehribonə həyot həmro, Xıdo Rəsul(s)-i vido, bə çəmə yod vardedə. Həmonə Xanım ki həğiğətən de Xıdo Rəsul(s)-i şo iyən ğəmi bə ico be və həmişə peyğəmbəri risoləti saxtə royədə, çəyku himoyə kardəş be. Peyğəmbər, ım əzizə Xanımi barədə hamiyəşe: “Xıdo Xədicə rəhmət ko, əy vaxti bəmə imon vardəşe ki co kəson kufir bin, əy mıni təsdığ kardeşe, qıləy holədə ki co kəson mıni bə kəno noə bin, ıştə pul və moli bə mı doşe, qıləy holədə ki co kəson, dınyo moliku mıni məhrum kardə bin”.

Xədicə(s) iminnə kəs be ki ıştə həyot həmro peyğəmbəri bovə kardəşe və jenon miyonədə iminnə kəs be ki ,bə İslom imon vardeşe. Xıdo Rəsul(s) həminə barədə hamiyəşe: “bə Xıdo və Muhəmməd imon vardə kəson iyən dınyo jenon miyonədə Xədicə, navəjən be.”

“mıborəkə” çı Həzrəte Xədicə(s) ləğəbonku qıləyni be ki “purbərəkətinə Xanımi” mənodəy. Mərhum Mohəddese Ğomi qıləy hədisədə rəvoyət kardedə ki Xıdo nəzdədə Həzrəte Xədicə(s) vırə və məğomi Xoto, Xıdo səmtiku bə Həzrəte Məsih(ə) qıləy mesaji ğolibədə omə ki, Xədicə mıborəkə iyən beheştədə Məryəmi həmro və munes ğeyd bıə. həmçınin Encilədə ozodi və ədoləti peyğəmbəri xusiyəton və nışonəon bəyon kardey zəmonədə omə ki: Peyğəmbəri oxonə nəsl, Mıborəkə ya de purbərəkətinə xanım heste. ə kəs ki Xıdo ğəşənq iyən tərovətinə beheştədə, deştə inə Məryəm(s) bə ico və dəy munes bəbe.

Əmmo səmimi həmzıvonon, coheliyət əyyomədə, və peyğəmbəri besəti bənav, jen nə fəğət ıştə huğuğiku məhrum be, bəlkəm vey bevəcə şəroyetədə jimon əki, və kali ğovmon, jenon bənə aybi zıneydə bin, iyən bəji-bəji kinəon dəkandedə bin. Həzrəte Xədicə həminə vəziyətədə de islami adəton koməki, sobot kardəşe ki qıləy jen nə fəğət jimoni həxışe, və bəpe ıştə təbii huğuği tələb ko, bəlkəm karde bəzne de səyo cəhd iyən loyiğə əməlon, bə ə mərhələ bırəsi ki Peyğəmbər əy, çı dınyo 4 qılə vıjniyə jenonku qıləyni zınəş be və Xıdovənd de Cebreili vositə, çand kərə bəy xususi və təkid bıə səlom bıvığando. Jəqo ki Xıdo Rəsul(s) hamiyəşe: “ həmonə şəv ki Meracədə bim, oqarde zəmonədə Cebreil bə çıme səmti omə və bəy votıme: ey Cebreil, aya mıku çi tələb kardəş? Cəvob doşe: çıme tələb ıme ki Xıdo iyən çıme səmtiku bə Xədicə səlom bıron, vaxti Peyğəmbər, Cebreili səlomi bə Xədicə rosnişe, Xədicə cəvob doşe: “həğiğətədə ın çı Xıdo səlom heste və səlom və səloməti Xıdokue və səlom bıbu bəy və bə Cebreil.”

Həzrəte Xədicə(s) beheşti 4 qılə vey çokə jenonku qıləyni bə hisob omeydə ki Peyğəmbər əvoni nom bardəşe. Çəy şəxsiyət anədə şərif və əziz be ki çəy hırdəni milad ruji zəmonədə, və vaxti Ğoreyşi jenon əy coyli noşone Xıdo, pokə jenoni bənə Asiyə,iyən Məryəmi bə çəy koməki vığandışe və nışoş do ki, ə kəs ki bə Xıdo komək bıbu, Xıdo həm bəy vey çokə koməkəkə bəbe.

Xıdo Rəsul(s), 25 sor ıştə jimoni ıştə nımunə və bəfodorə həyot həmro yəni Xədicə(s) kənoədə dəvardoneşe, ım 2 qılə bozorqvar, deşmənon mıhosirədə və Şebe Əbitalebədə, 3 sor ıştə mıştərikə jimoni sə kardeşone. 3 sor hicrətiku bənav və qıləy holədə ki vey zəmon nıbe ki peyğəmbər və çəy əshobi Şebe Əbitalebi mıhosirəku xarıc bıə bin, Həzrəte Xədicə(s) noxəş bıə. Xıdo Rəsul(s) bəştə bəfodorə həyot həmro hamiyəşe: “ey Xədicə,aya zıneydəş ki Xıdovənd beheştədə həm, tıni bənə çıme həyot həmro ğəror doəşe?” peşo bə Xədicə mehribonəti və məhəbbət kardışe.

Bəy beheşti vəədəş do və bə çəy xıdmətonku ğədrdonəti karde xoto, bəy behşti aliyə rotbəon bəyon kardeşe.vey zəmon dənıvarde ki Xədicə hol-əhvol və noxəşi şiddətin bıə, bə çəy xoto, Xıdo Rəsul(s) nəzdədə, ıştə vəsiyəti jıqo bəyon kardeşe: “ ya Rəsuləllah, çand qılə vəsiyyətım heste, az ıştı həxədə kıvoləti kardəm, mıni bıbaxş” peyğəmbər hamiyəşe: “hiç vaxt, tıku kıvoləti nıvindeme, tı ıştı həmmə səyo cəhdi kardəş, tı çıme kədə vey oqınyə bıəy, və ıştı molon Xıdo royədə istifodə kardəş”.

Xədicə ərz kardeşe: “ya Rəsulləllah, çıme 2 minnə vəsiyət ıme ki ım kinə yəni Fatimə oqət,boçiki əv mıku bəpeşt, yətim və ğərib bəbe, çən, nıbobənıbo Ğoreyşi jenonku ikəs bəy ozo və əzyət bırosnon. Xıdo nıkardə qıləy kəs bəy silli bıjəno,nıbobənıbo i kəs bə çəy sə fəryod bıjəno, xıdo nıkardə i kəs dəy ğəyre mehrəboni və bədə rəftor bıko.

Əmmo nəhayətədə, islami ım himoyə əkə və fidokorə Xanım, Xədicə(s), Besəti 10 minnə sori, Rəməzanə manqədə və 65 sorəti sinnədə, bə rəhmət şə. Im hadisə Peyğəmbəriro anədə ğəmqin be ki Xədicə(s) rehlət sori ki de Həzrəte Əbutaleb(ə)-i rehləti bə ico be, ğəm iyən dardə sor nom noəş be. Peyğəmbər həmişə hamiyəşe: “ har vaxt ki həmmə mıni tərk əkardin, Xədicə be ki çıme komək be.”

Səmimi həmzıvonon bə ım bərnomə quş doe xoto, şıməku təşəkkur kardəm, şımə nımoj-rujəon ğəbul bıbun.