İlahi əsma iyən nomon

İlahi əsma iyən nomon

Mumit bəyjiyon kıştə kəsi mənoədəy.ım ism movti rişəkuye ki,çı həyoti zidde və qıləy çiyku ğıvvə iyən ğudrəti şıey məfhumədəy.kıştey həmişə çı həyot iyən jimoni bəpeştəy.Xıdovənd Duxani mıborəkə surə 8-ə şərifə ayədə jıqo hamyedə:”la ilahə ....ğərəz Əv hiç qıləy məbud ni.Əve ki,bəyji kardedə və kışteydə”...

Maq həm bənə həyoti dıqlə cismoni iyən mənəvi jimonış heste.qıləy zəmon ki,çı insoni pokə fıtrət de qınoon təkror kardey və həmçinin bəştə iyən bə cokəson sıtəm kardey vositə,çı Xıdopərəstətiku bə kufri səmt,çı dindorətiku bə bedinəti tərəf və mıstəğim iyən rostə royku bə kəc və inhirofə roy səmt təmayul pəyduko,mənəvi maq və mardey hosil bəbe.liza həyğiyə muminon çı xılğət,maq iyən jimoni xılğətiku hədəfi Xıdovəndi tərəfiku bıə qıləy imtovon zıneydən və yəğınışon heste ki,çı dınyo jimon qıləy kırtə mıddətış hest və Mumitə Xıdovənd çı maqi təmi bə həmmə kəson bəçaştovne.bəçəy xoto səy kardedə de mənəvi həyoti kəsb kardey,hiçvaxti mənəvi maqi təcrubə nıko......

Har qıləy komilə inson bə Xıdovəndi zəmini dimisə bıə canişinəti məğami rəsey ləyoğətış bıbu,ıştəni de ın dıqlə şərifə nomi dərostey bəzıne.çoko ki,tıbğe Kərimə-Ğıroni ayəon de həzrət İbreymi(ə) nido və vanqi bandı-kuon piyo kak-kijon bəyji bıey həm çın ğəbilikuye.bə rəvoyəton əsos İbreym-Xəlil(ə) bə İlahi kali məğamon rəsə be,əmmo hənuz və hələ Muhyi ism bəvədə təcəlliş pəydu kardə nıbe.liza Bəğərə mıborəkə surə 60-ə şərifə ayədə Xıdovəndiku dəparseydə ki,çokonə bımyon bəyji bəkarde?Xıdovənde-Xalıığ həm ə həzrəti bə məğsədi rosneyro jıqo hamyedə:ım ko ıştən bə vırə bıroson.çoqlə pərəndə bıqət,əvoni bıkışt iyən çəvon qujd və pusti umujənkə.peşo çəvon bədəni əczon çı har qıləy bandı-ku piyo ğərol bıdə.çən,peşo əvoni vanq bıjən!bın holədə əvon de surəti bəştı səmt bomeyn.......

Həlbəttə bın miyono mumkine ki,bənə nəmrudi bıə yavə fərdon həm ıştəni bənə əkışti iyən bəyjiəkə təğdım iyən mıərrıfi kardedə.çoko ki,nəmrud de İbreymi(ə) de Xıdovəndi təvəssuti jimon iyən maqi əto kardey barədə mıcodilə iyən deşmınəti kardedəbe və voteşe:mı həm bəyji kardedəm iyən kışteydəm.əv boştə sıxanon isbot kardero  qıləy əsirış çı zindoniku xaric və ozodış karde və voteşe:ım şəxs bəpe kıştə bıəbe,əmmo ısət az bəy jimon əto kardedəm.peşo qıləy merd ki,bə hiç qıləy qıno mırtəkib bıənıbe, kışteşe və voteşe:ım şəxsi jimoni həxış hestebe,əmmo mı əvım kışte.çoko ki,mılohizə kardedon,nəmrud fəğət bə muhyi iyən mumiti ismi ləfzi təkyəş kardə be,nəyinki,bəçəy həyğiyə məno.əv çın mətləbiku ğafil be ki,bəyji kardey ibtidoyi surətədə və nuyə xılğət və həmçinin kıştey fəğət və fəğət çı Xıdovəndi ğudrəti inhisorədəy və bənə nəmrudi bıə fərdon bo hiçkəsi jimon iyən maq ofəye nibəzıne.....

....ım dəfə “Əhdi-dıvo”zumzumə kardedəmon ki,ğasbu Xıdovənd de aləmi Munci iyən Xiloskori fərəc və zuhuri çəmə həmmə dılon de ə həzrəti nuri bəyjiko və təyyibə iyən çokə jimoni bəmə nəsibko.... Allahummə .....Xıdolim ha! ıştıku tələb kardedəmon deştı Kərimi nomi...və ıştıku piyedəmone bəştı həxə nomi xoto,