İlahi əsma və nomon

İlahi əsma və nomon

İlahi əsma və nomonku coqıləyni Həyy iyən Ğəyyumi nomonin.Həyy çı həyot iyən jimoni mənoədəy.de rəvoc pəydu kardə təbiri bə qıləy mevcudi bəyji votedən ki,,ozavziye,hardemon,hırdən bə dınyo vardey,cazibə iyən dafiyə ğıvvə və həmçinin tosə qıləy həddi hiss və hərəkəti soyb bıbu.bə həmonə dəlili xoto beməyon həm bəyji nom noey beydən.

Xıdovənd Həyye,əmmo çəy həyot və jimon bənə hiçkəsi jimoni ni.zira hiççi bənə əy oyən çəy mislədə ni və Əv bo bəyji mandero bə hiççi iyən hiçkəsi ehtiyociş ni və mehtoc ni.həmmə məxloğat çəy vucudiku bə şıkrəy və bəy mehtoce.ğərəz Xıdo har qıləy bəyjiyə məxloğ,həyğətədə  deştə zoti bəyji ni,bəlkəm çəy həyot iyən jimon çı Həyyə Xıdovəndiku bə şıkrəy.....

Ğəyyum çı Ğamə rəğ-rişəku və kontrol  iyən nəzorəti malik bıey mənoədəy.həmçinin Ğəyyum luğətədə həmmə holonədə bə xəlğəi koon iyən aləmi tədbiri Ğıyoməkə mənoədəy.Ğıyomi kəlmə həm poysə mandey mənoədəy iyən addiyə formədə çı poysə mandey iyən bə ko mısəllət bıey miyono qıləy rabitəş heste.əhlı luğətiku kali qıləyni “Ğıyomi” bə feliyyət rəsey məno kardedən.bo ın məno çok-çoki dərk kardero bə ın misoli təvəccuh iyən dığğət kardedəmon:qıləy zəmon ki,inson zəmini dimisə dıroz kəşeydə, olxartedə,bo qıləy qonə çi peqəteyro çəy ğudrət vey kam beydə.qıləy zəmon ki,nışteydə çəy zu və ğudrət ziyod beydə.əmmo  çoko ki,əv bəsə poysə əyştedə,çəy təmom ğudrət iyən çəy vucudədə bıə potensiyal istedod aktual beydə.ərəbi ədəbiyyotədə bə ın holət ki,çı insoni ğıvvə komilə formədə fəol iyən akitv beydə,Ğıyom votedən.bə məhşəri rujə həm ğıyomət votedən.boçi ki,həmonə ruji çı bəşəri istedodon  həmmə ki,aktual bıə,çı aləmon pərvərdıqori mığobilədə bəsə poysə bəmandeyn.əmmo Xıdovəndi barədə Ğıyom bın mənoədəy ki,bə cokəson təkyə kardedəni iyən qıləy çi və ikəsiku bə şıkrə ni və han.ğəflət iyən çı viro bekardey əy dəqəteydəni…..

Ğəyyum ,həmmə ləzonədə hiç qıləy bırniye nıbə holədə Ğıyomi dəvom doey mənoədəy.bəçəy xoto votey beydə ki,dıqlə Həyy iyən Ğəyyumi ismi de iyande həmnişinəti çı jimoni mənobaxşəkə ovc və pik hədde.Həyy jimon vaşx kardedə və Ğəyyum həm bəy dəvom doydə.çoko ki,Bəğərə mıborəkə surə 255-ə şərifə ayədə de ğəşənqə bəyoni bə ın həyğəti işorə kardedə.joqo ki,hamyedə:Allahu la ilahə ...................

“Allah ki,ğərəz Əv (co)qıləy mə`bud ni.Bəyjhi və Bərpoəkəy.nə qıləy sıvıkə han əy qəteydə və nə qıləy sanqinə han. Osmonon iyən zəminədə bıə çiyon(həmmə)bəy məxsuse”.

Bəle Ğəyyumə Xıdovənd qıləy Xıdoye ki,harçi bə vucud vardedə və əy sabit iyən bərpo kardedə.Əve ki,hiç qıləy zəmon nımandə və iləzə ğəflət nıkardə holədə bə jimoni dəvom doydə ki,ehanə ım ğəyumiyyət nıbu,həyot iyən jimon bərpo iyən bəsə poysə nibəbe....