İlahi əsma və nomon

İlahi əsma və nomon

Muminon bəştə vəzifəon əməl kardə holədə de bə Xıdo təvəkkul kardey səy kardedə bəsə kuffor iyən mışrikonsə bənav dəşo.əvon yəğın bıkon ki,əgər Xıdo bıpyişe əvon bənav dəşon,hiç qıləy ğudrət bəvon mane bıey və çəvon inkişof iyən bənav şıey vəy qətey əzıni.bəçəy xoto çı mıttəğiyon mevla və rəhbər həzrət İmom Əli(ə) Nəhcul-Bəloğə 37-ə xutbədə  ıştə xısusiyyəton bəyonədə jıqo hamyedə:”bə zəmon ki,həmməkəson çı tarsiku sısıt bıəbin,bə kəno mandəbin,az bənav dəşim iyən ğıyomım karde və bə zəmon ki,həmmə kəs ıştənış punhon kardəşoneb və bə dumo pekırin,mı oşko bə meydon omim və ə zəmon ki,həmmə kəsi tamış jıəbe,az sıxanım vote və bə zəmon ki,həmmə kəson mandəbin,mı de Xıdo nuri ro nışon doey bəro dəqınim.sıxan iyən şuori məğamədə çımı sədon bəsə həmmə kəsi sədosə ahəstə be,əmmo əmələdə barz iyən az navjən bim....

İlahi əsma və nomonku Muəxxəri ism və nome.Muəxxər çı təxiri məsdərikuye ki,çı sıftənə mənoədə və çı iminə mığobilədəy.Muəxxəri ism bənə İlahi əsma iyən nomonku qıləyni bə təxir eğandə iyən bə dumo pekırnə kəsi mənoədəy.Muəxxərə Xıdovənd kali çiyon deştə irodə iyən bəştə hikmət,rəhmət iyən tədbiri əsos bə təxir eğandedə və hakəsi ki,bıpyişe şərəf,rutbə,ğurb,məhəbbət,təğva,itoət,elm iyən hidoyəti cəhəto və sayirə bıbu bə dumo pekırneydə,tojneydə.Muəxxər həmçinin əkəson ki,çı kufr,şırk,sıtəmkorəti iyən zu tətbiğ kardedən,əvoni bə dumo eğandedə və əvoni dınyoədə çı nopokon zumrədə və axırətədə həm çı cəhəndımi əhli miyono ğərol doydə.kulliyə formədə har qıləy inhirof ki,çı bandəçəti royku səbəb beydə ki,Muəxxərə Xıdovənd çı insoni məğam iyən mənziləti dınyo iyən axırətədə bə təxır eğando və çəy məğam iyən vırə tənəzzul kardedə.bəçəy xoto mumin dayima dınyo iyən axırətədə səy kardedə ki,xeyrat iyən həsənatədə çı navəjənonku bıbu və ıştəni çı inhirof iyən tənəzzuli ofotonku bə diyəro nıhaşto iyən çı bandəçəti ğullə iyən izzətiku suğut nıko,enıqno.....

Muəxxərə Xıdovənde ki,çı qınokoron nopəsənd iyən yavə əməlon cəzo bə təxir eğandedə.Muəxxərə Xıdovənd həmonə Xıdoye ki,insonış ofəyə və boçəy hidoyəti həmmə zəminəonış hozzı kardə.əmmo qahi zəmon inson çı hidoyəti amilonku ğafil beydə və dığğət nıkardə holədə bə qıno iyən məsiyəti mırtəkib beydə.bın şərayitədə vey mumkine əzobi təxir əy tənbih kardedə və çı tobə roy boəy oj kardedə.....

Muəxxəri nomi bə muminə insoni coni dətıvey,bə İlahi hukmon əsos har qıləy nopəsənd iyən bə xoşnıomə sıxan iyən əməli bə kəno noydə və bə dumo pekıreydə və Həkimə Xıdovəndi hırd iyən xar hisob kardə harçi hırd zıneydə.bə Xıdovəndi Muəxxərə nomi imonış vardə muminə fərd  iminə çiy ki,xar kardedə,nəfse.zira əv bəsə həmməysə vey deşmıne.peşo şəyton ki,çı bəloon sərçeşməy və çəy bəpeştə kuffor iyən tugyongəri bə dumo pekırneydə,məğlub kardedə və əy çı təcavuz iyən tuğyoniku oqəteydə….