İlahi əsma iyən nomon

İlahi əsma iyən nomon

Muəxxərə Xıdovənde ki,çı qınokoron nopəsənd iyən yavə əməlon cəzo bə təxir eğandedə.Muəxxərə Xıdovənd həmonə Xıdoye ki,insonış ofəyə və boçəy hidoyəti həmmə zəminəonış hozzı kardə.əmmo qahi zəmon inson çı hidoyəti amilonku ğafil beydə və dığğət nıkardə holədə bə qıno iyən məsiyəti mırtəkib beydə.bın şərayitədə vey mumkine əzobi təxir əy tənbih kardedə və çı tobə roy boəy oj kardedə.....

Muəxxəri nomi bə muminə insoni coni dətıvey,bə İlahi hukmon əsos har qıləy nopəsənd iyən bə xoşnıomə sıxan iyən əməli bə kəno noydə və bə dumo pekıreydə və Həkimə Xıdovəndi hırd iyən xar hisob kardə harçi hırd zıneydə.bə Xıdovəndi Muəxxərə nomi imonış vardə muminə fərd  iminə çiy ki,xar kardedə,nəfse.zira əv bəsə həmməysə vey deşmıne.peşo şəyton ki,çı bəloon sərçeşməy və çəy bəpeştə kuffor iyən tugyongəri bə dumo pekırneydə,məğlub kardedə və əy çı təcavuz iyən tuğyoniku oqəteydə….

Xıdovənde-Aləm bın cəhəti xoto ki,vacibəl-vucude və boştə vucudiro bə cokəson qıləy ehtiyociş ni,bə həmmə məxloğati ki,mumkinul-vucude və boştə vucudiro bə cokəson ehtiyocişon heste,təğəddumış heste və bənave.əv bəsə həmmə məxloğatisə bənave.co tərəfiku çunki,həmmə mevcudot fanin iyən fəğət Xıdovənd bağiye.Əv çı mevcudotisə əvvəl iyən muəxxəre.əmmo qıləy dəğiğ iyən zərifə nuktə ıme ki,qıləy Xıdo ki, muğəddəm iyən muəxxəre,eyni holədə de mevcudoton həm bə icoye. çoko ki,Hədidi mıborəkə surə 4-ə şərifə ayədə omə:”və huvə məəkum eynə ma kuntum”…harco həm bıbon,əv deşməy.liza Xıdovənde-Xalığ bə həmmə çiyon qıləy vucudi əhotş heste və muhite iyən de harçi heste və hiççi ni ki,Xıdo deəy nıbu.yəni mumkine əmə de Xıdo nıbəmon,əmmo Xıdovənd hejo deəməy.bəçəy xotoye ki,arifon votedən:ısət Xıdo de insoni bıbu muhim ni.çıro ki,Xıdovənd de həmmə mevcudotiye.əmmo ın muhimme ki,əmə de Xıdo bıbəmon…..

Muğəddəm nav vığandə bıə kəs və navədə şıə kəse.muğəddəmi nom bənə Xıdovəndi ismi bın mənoədəy ki,Xıdovənd əşyoon çəvon ıştə məğam iyən vırədə ğərol doydə.çiçi bıpyişe mığəddəm və bənav bəqəte və çiçi bıpyişe bə təxir ebəğande.çoko ki,çı pı mevcudiyyəti bəsə zoə mevcudiyyəti mığəddəm iyən bənav zıneydə.Xıdovənd harçi ki,bənav eğandey lozıme,əy bənav dəbənoye.həmçinin Muğəddəmə Xıdovənd ənbiya iyən ovliya və hakəs ki,boştə Xıdo xolisonə şikilədə deştə bandəçəti bəy nez bıə kəson mığəddəm zıneydə və bənav dənoydə. İmom Sadığiku(ə) omə qıləy hədisədə nəğl bıə ki,hamyedə:”Xıdovənd bə həzrəte Mosə(ə) vəhy kardeşe:ha Mosə ha!aya zıneydəş ki,boçi tım bəsə cokəsonsə mığəddəmım karde və bənavım dənoe və bə nıbuvvəti məğami rosneme?Mosə(ə) ərzış karde:ne,çın mətləbi sırri zıneydənim. Xıdovəndi bəy hamyeşe:”ha Mosə ha! mı ıştə bandəonım vinde və (komilə surətədə təhğığım karde)çəvon miyono çımı mığobilədə bəsə tısə qıləy təvazukor iyən sodə insonım nıvinde.tı bəmə nisbətədə bənə qıləy hırdəniş ki,hətto ıştə moku rık kardə zəmonədə həm,ijən bəştə mo pənoh bardedə və fəğət əy ıştə hami zıneydə və deəmə mınocotədə votedəş:ha Xıdo ha! fəğət bətı pərəstış kardedəm iyən fəğət ıştıku komək tələb kardedəm.