İlahi əsma və nomon

İlahi əsma və nomon

İmom Sadığiku(ə) İbn Əbi Yəfur nomo qıləy şəxs Hədidi mıborəkə surə seminə ayəku ki,hamyedə:”Huvəl Əvvəlu və Axir”-iku dəparseşe və voteşe:iminə Əvvəli məno fameme iyən dərəsim.əmmo şımə bomı Axiri kəlmə məno bəyonkənən. İmom Sadıği(ə) hamyeşe:hiç qıləy çi ni ğərəz ımi ki,(nəhoyətən)  çı miyoniku bəşe və əvəz bəbe ya zəvol pəydu bəkarde ya qıləy ranq,sıfət iyən heyətiku bə coqlə heyəti dəşo və çı ziyodətiku bə noxsani iyən kamətiku bə əlovəti meyl pəydu bəkarde.illa aləmon pərvərdıqori.zira əve hejo bıə iyən bəbe.Əv Əvvəle çı harçi bənav iyən Axire bın mənoədə ki,zəvol ğəbul kardedəni və mıxtəlifə sıfət iyən nomon ğəbul kardedəni.çoko ki,ğərəz Əv cokəson nomon mıxtəlife.bənə insoni ki,çı xok iyən tuli mərtəbədəy və çı qujd iyən xuni və cismi mərtəbədə hırd bıə və astəş pıxə mərtəbədəy.ya bənə xımo ki,nırəs iyən kolə xımo mərtəbədə və qıləy norəsə xımo ki,çı naviku vey rəsə (təmr) və tojə rəsə xımo mərtəbədə(rutəb) və komilən hışkə xımo mərtəbədəy və çəy əsma iyən sıfəton əvəz beydə.əmmo Yolə Xıdo bəçımi əkse.

Im hədis bəyon kardedə ki,xılğətədə mevcud bıə harçi çı təğyir,əvəz bıey,zəvoli iyən ni bıey mərəzədəy. lakin Mutəalə-Xıdo həmişə komil,yekson iyən i formədəy.dəvardəyon iyən vəomədə bəvədə hiç qıləy əvəzon bə əməl nibome.....

Həzərət Əli(ə) palu yəhudi alimonku qıləyni ome və voteşe:ha Əmirəl-Muminin ha! ıştı pərvərdıqor kom zəmoniku mevcud be?İmom Əli(ə) hamyeşe:tı bıvot Xıdovənd kom zəmon bıəni ta votey bıbu kom zəmon bə vudu ome? həyğətədə zəmon çı Xıdovəndi ofəyə çiyonkuye və çı Xıdovəndi həxədə qıləy zəmoniku bəhs kardey mənoş ni.Xıdovənde Təbarəke-Təala Əvvəl ya Axiri zəmon iyən məkonədə vırəş ni.Xıdovənd çı zəmon iyən məkoniku mınəzzəh iyən pok bıə və bə təmom hestemoni aləmi muhite iyən əhotəş heste.Əvvələ iyən Axirə Xıdo çı həmmə hərəkəti məbdə bıə iyən həmməş bə bandəçəti iyən ıştə təsbihi roş səbəro kardə və bə hərəkətış dəğandə və oxoyədə həmmə bəçəy səmt obəqarde.de qıləy co iborəti həmmə mevcudoti oxo iyən nəhoyət və həmmə koon bə Axiri oqardedə ki,xılğət iyən fərmon bəy məxsuse.həmmə məxloğat fəno ğəbul kardedən iyən foni beydən,əmmo Axirə Xıdovənd baği,əbədi iyən dayimiye......

Həyğiyə mumin ıştə bandəçəti bo qıləy Xalııği əncom doydə ki,bəy maq iyən noxsan daxil beydəni. bəlkəm əbədi iyən dayimiye və zıneydə həmmə çiyon iyən həmmə kəson ki,zəmini dimisən,foni bəbeyn və əzəmətin iyən azizə pərvərdıqori zot fəğət baği bəmande və çı fəno bıeyku əmonədə bəmande.bə Axiri bıə ım etığod iyən bovə çəy bandəçəti bovə iyən rufi vey zumand və ğoym kardedə.jıqo qıləy inson çı Xıdovəndi itoət iyən bandəçəti boştə mığəddəm iyən bənav zıneydə ta iminə rutbə və dərəcə kəsbko və çəy itoət iyən əmron bə vırə nırosneyədə oxonə bıbu.....