İlahi əsma və nomon

İlahi əsma və nomon

Birrə Xıdovəndi ğıyoməti ruji vəhıştədə bıə Birrəti və Çokə ko soybəti vəhışti əhli bəsə har qıləy zəmonisə vey əy hiss bəkardeyn və  əvon bəvoteyn:”inna kunna min ...Əmə naviku Xıdo vanq jeydəbimon iyən pərəstış kardedəbimon ki,Əv çokə ko soyb və Rəhime.”Ayətullah Məkarim Şirozi Nımunə təfsir kitobədə çın ayə şərhədə jıqo nıvışteydə ki,ğıyoməti səhnə və vəhışti səhnəon çı Xıdovəndi əsma iyən sıfəton təcəlli pəydu kardə vırəy və muminon de ın səhnəon mışohidə kardey de əsma iyən sıfəton həyğəton har qıləy zəmoniku vey oşno bəbeyn”

Birrə Xıdovənd de bənə ağli bıə benəhoyətə neməton əto kardey iyən boçəvon hidoyətiro peyğombəron vığandey və bəvon şəfğət iyən mərhəmət kardey,çəvon qınoon əfv iyən bəvon məğfırət və coqlə ziyodə neməton kki,əvoni vəsf iyən bəyon kardey ğeyri-mumkine və çı Birrə Xıdovəndi çəvon həxədə bıə çokətiyon bəştə kəmoli həddi rəsə.Birrə Xıdovənd çı əzəmət,hikmət,izzət,zumandəti,barzə məğami soybəti,rəfət iyən mehribonətiku hikoyət kardedə.Əv çokə ko soybe və çokə ko soybonış həm piyedə. bəçəyro çı mısılmınon ziyodə  iştimoyi rabitəon iyən əxloğiyyoti məbno və əsos bə çokə ko soybəti iyən husni rəftori əsose ki,çəy sədr iyən sədə bə valideyni çokətiye.Xıdovənde-Aləm Məryəmi mıborəkə surə 14-ə şərifə ayədə  həzrəte Yəhya(ə) vəsfədə jıqo hamyedə:”və birrən bivalideyhi”-və Əv bəştə pı iyən mo nisbətədə çokə rəftor iyən çokə ko soyb be”........

Xıdovənde-Xalığ ıştəni de Birri ismi dərostə kəson tevsifədə Bəğərə mıborəkə surə 177-ə şərifə ayədə jıqo hamyedə:”Leysəl-birrə......çokəti(fəğət)ım ni ki,(nımoji zəmonədə) ıştə surəti bə məşrığ iyən məğrıbi səmt bıqəto.bəlkəm çokəti(vəçokə ko soybəti)ə kəsonin ki,bə Xıdo iyən bə ğıyoməti ruji iyən bə məlayikon iyən bə osmoniyə kitobi və bə peyğombəron imon vardəşone və ıştə moli deştə dıli xoşi bəştə nezə odəmon və yətimon və miskinon və royədə mandə kəson və sayilon və bandəon infoğ kardedən, nımoji bərpo kardedən iyən zəkoti pərdaxt kardedən və əhd bastə zəmonədə bəştə əhdi bəfo kardedən, çı məhrumiyyəton  və çı noxəşətiyon iyən canqi meydoni mığobilədə istiğomət nışon doydən.əvon əkəsonin ki,rost votedən”.binobərin bə çokə ko soybəti məğami rəsey jəqo həm hostonə ko ni.çoko ki, Xıdovənd Ali-İmrani mıborəkə surə 92-ə şərifə ayədə infoğədə çokəti barədə jıqo hamyedə:”hiçvaxti bə çokə ko soybəti(həyğəti)nibərəsiyon illah ki,ıştə piyə çiyonku(Xıdo royədə) infoğkon...”bə həmonə dəlili xoto Xıdovənde-Xalığ Mayidə mıborəkə surə dıminə şərifə ayədə muminon vey çokə şikilədə bo həmkoəti iyən bə iyande komək kardey səmt tevsiyə kardedə.......

İmom Mosəbni Cəfəri(ə) nəğl bıə qıləy hədisədə omə rəsəki,Bəni-İsrayilədə qıləy salehə merd hestebe və çəy jimoni həmro və jen həm çokə ko soyb be.həmonə merd işəv hanədə vindeşe ki,qıləy şəxs bəy votedə:Xıdovənd fulon mığdor botıə umrış mığəddərış kardə ki,çəy nimə tı çı rifoh iyən asayişi dılədə bəbeyş və çəy coqlə nimə həm məziğə,tanqədastəti iyən fəğrətiyədə..tı çımonku har dıqlə nimə əvvəlı piyedə,bıvıjın.həmonə merdi cəvobış doe.çımı qıləy çokə jenım heste ki,çımı jimoni şərike,bəpe deəy məşvərət iyən məsləhətkom.tı peşo çımı palu bomeyş ta az bətı xəbə bədom kom qılə nimə sıftədə ixtiyor iyən səçınım kardə.sıbi zəmonədə ə merdi ıştə hani cərəyonış boştə jeni sehbət kardeşe və çəyku qıləy məsləhətış piye.