İlahi əsma və nomon

İlahi əsma və nomon

Kərimə-Ğıroni mıfəssır iyən təfsırəvonon kali qıləyni mı tobə kəlmə bəyonədə jıqo votedə:tobə çı Xıdo de bandəon miyono qıləy mıştərəkə ləfze.qıləy zəmon ki,bandəon deəy tevsif bıən,çəy məfhum ıme ki,bə Xıdo səmt oqardən.zira har qıləy xətokor deştə məsiyət iyən qıno  həyğətədə ıştə pərvərdıqoriku fərolış kardə və qıləy zəmon ki,əv tobə kardedə,bə bəçəy səmt oqardedə.liza çı bandə tobə çı Xıdo tərəfiku bıə dıqlə tobə miyono ğərol qəteydə.bın mənoədə ki,bandə ıştə holonku hiç qıləyniyədə çı Xıdoku be ehtiyoc ni və ehanə bıpyişe çı qıno zulmıətonku nicot pəyduko,iminə mərhələdə  bəpe Xıdo bəy tovfiğ iyən ovandəti nəsibko və ıştə rəhməti bəy şomilko ta əv bo tobə karderqıləy ovandəti pəyduko.və qıləy vaxt ki,əv tobəko ijən bə Xıdo tərəfiku bıə coqlə tobəş ehtiyociş heste və əv həm ıme ki,ijən Xıdo deştə rəhmət iyən inoyəti bə bandə səmt rucu iyən ovar kardedə və çəy tobə ğəbul kardedə.

Xıdovənd çı bandə tobə bə zəmon ğəbul bəkarde ki,əv çı Xıdo tərəfiku bıə dıqlə tobə miyono ğərol bıqəto.çoko ki,Tobə mıborəkə surə 118-ə şərifə ayədə hamyedə:”və ələlləzinə....həmçinin ə se nəfər ki,(Təbuki canqədə iştirokiku)təxəlluf kardeşone(iştirok nıkardeşon və mısılmınon deəvon ıştə rabitə bırniyeşone) tosə ə həddi ki,zəmin deştə hevujəti boəvon tanq be iyən hətto ıştə vucudədə qıləy vırə pəydu kardey zıneydə nıbin və (bə zəmon) zıneşone ğərəz Xıdo çəvon co qıləy pənohqoşon ni .peşo Xıdo ıştə rəhməti bəçəvon holi şomil kardeşone(və bəvon tovfiğ doşe)ta tobəkon.Xıdovənd təvvab iyən Rəhime”.odəmi dığğəti cəlbəkə coqlə çi ki,bəy işorə kardey bəbe,Rəhimi ism və nome ki, çı Təvvabi bəpeştə bın ayədə zikr bıə....

Muminə bandə madam ki,bın dınyoədə,hejo çı şəytoni vəsvəsəon, nəfsoni keşməşeon,həmçinin ğəfləton,sıstətiyon və ehyanən çı məyusəti  mə`rəzədə ğərol bıqəto,bəçəy çı İlahi məsir iyn royku mandey iyən suğut kardey boysi beydə.qırd bın vıronədə Təvvabə Xıdovənd deştə rəhməti bəy təvəccuh iyən dığğət kardedə və deməkə ki,çandə kərə əv fırsiyə,əmmo ro ijən boçəy oqardemon iyən tobə kardey oje. De Xıdovəndi təvəssuti boştə qınokorə bandəon çandə kərə ro oj kardey,çı Xıdovəndi Təvvabə ismi əsəronkuye.....