İlahi əsma iyən nomon

İlahi əsma iyən nomon

Dəvardə bərnoməonədə bəyon kardemone ki,İlahi əsma və nomon bo Xıdovəndi çok-çoki zıneyro iyən bə həx-təala mərıfət pəydu kardero həmməysə çokə roonku bə hisob omeydən.Xıdovəndi ım əsma və nomonış bə həzrəte Odəmi(ə) təlimış doe,omuteşe və Bəğərə mıborəkə surə 31-ə şərifə ayədə jıqo hamyedə:”və əlləmə Adəməl əsmaə kulləha”.həmonə təlim insonış çı coqlə məxloğatonku co və bo firiştə iyən məlayikon səjdə kardero loyığış zıne.çı insoni bə sayir mevcudoti bıə imtiyoz de həxə ism iyən nomon omutey bə dast omeydə.zira əv çı Xıdovəndi sıfəton komilə məzhər iyən simvole və əvoni ayinevar və bənə ovəynə munəkis kardey zıneydə.Xıdovəndi sıfətonku qıləyni ki,Əy zıneyədə vey çokə məzhəronku qıləyniye,Subhani şərifə ism və nome......

İlahi əsma və nomonku coqıləyni Subhani nome.Subhan çı səbhi rəğ-rişəku və çı harcurnə ayb iyən noxsaniku pok və bə diyəro bıeye.Subhanə Xıdo çı harcurnə ayb,noxsan,mınəzzəh iyən bə məxloğati nisbət doey bıə çı har nev təsəvvır və sıfətonku bə diyəroye.Cıni mıborəkə surə 159-ə şərifə ayədə Xıdovənd jıqo hamyedə:”Subhanə....Xıdovənd çəvon kardə tevsifonku mınəzzəhe,poke”.həmçinin Saffati mıborəkə surə 160-ə şərifə ayədə jıqo hamyedə:”İlla ibadə..........

.Subhan çı sınov hardey mənoədə həm omə.Səbbəh rəyrə bə ov və həvo dılə dəşe mənoədə iyən Sabih rəyrə sınov hardey və dəneştey mənoədəy.joqo ki,Yasini mıborəkə surə 40-ə şərifə ayədə omə:”kullun fi fələkin yəsbəhun”...(Həşi iyən Ovşım)har qıləyni qıləy mıəyyənə mədor iyən orbitədə sınov hardedən”. həmçinin Naziati mıborəkə surə 3-ə şərifə ayədə jıao hamyedə:”vəssabihati səbha”...və ğəssəm bə məlayikon ki,aləmi həmmə vıronədə sınov hardedən”.binobərin Subhan ikəse ki,rəyrə bəçəy səmt şıey bəbe və əy rohət itoət kardey bəbe.yəni çoko ki,dıyo moy bə qıləy hədəfi tərəf sınov hardə zəmonədə rəyrə bənav şeydə,həmmə mevcudot iyən məxloğat həm de surəti və de rohətə formə bəştə ofəyə pərvərdıqori hevujə rəhməti dıyo səmt,hərəkət kardə və sınov hardə holədəy.bəçəy xoto votey beydə:de Xıdovəndi aşığonə irtibot iyən rabitə cilvəon həmməysə reçinə qıləyni,Xıdovəndi təsbih kardeye.təsbih ıştə pərvərdıqori ibodəti məsir iyən royədə rəyrə hərəkət kardey mənoədəy.bə iqlə mədor iyən orbitədə ritmik hərəkəti həm təsbih votedən.Kərimə-Ğıroni mıxtəlifə ayəonədə çı aləmi mevcudot iyən məxloğati həmd iyən təsbihiku ziyodə sıxan bə miyon omə.həmməysə oşkoə qıləyni İsra mıborəkə surə 44-ə şərifə ayədə omə ki,hiç qıləy istisno nıbə holədə çı hestemoni aləmi həmmə məxloğat,zəmin,osmon,astovəon iyən qalaktikəon,insonon,heyvonon iyən çı doon livon və hətto atomi hırdə zərron həm bın umumi həmd iyən təsbihi koyədə şərik zıneydə.joqo ki,Xıdovənde-Xalığ bın ayədə jıqo hamyedə:”tusəbbihu ləhu...... həmmə haft qılə osmonon iyən zəmin və çəvon miyon bıə mevcudot əvon həmmə əy mınəzzəh (pok) zıneydən və usulən hiç qıləy mevcudot ni ki,inev de həx-təala həmdı-səno iyən sıtoyişi koy məşğule. əmmo fəğət ə alimon ki,çəvon ğəlb iyən conon de nur iyən imoni bəyi iyən ruşine,ın sədo deştə coni quşi məseydən iyən dərk kardedən.