Pars Today

Nəhcul-Bəlağə pand iyən hikməton

Və ğalə(ə)”İnnəlumurə iza iştəbəhət i`tubirə axiruha biəvvəliha”.qıləy zəmon ki,mubhəmə ko mande,çəy oxo deçəy sıftə mığoyosə bıənine”.

Əmirəl-Muminin Həzrət Əli(ə) Nəhcul-Bəlağə hafto şəşminə hikmətədə bə həxı rəhbəron həmmə qıləy muhimmə dərs doydə iyən hamyedə:”İnnəlumurə iza iştəbəhət i`tubirə axiruha biəvvəliha”.qıləy zəmon ki,mubhəmə ko mande,çəy oxo deçəy sıftə mığoyosə bıənine”.  

 Bəşəri jimoni koon har qıləyni ıştən qıləy məxsusə ulqu bə şikilış heste.çın koonku veyni koy oxoyədə bə zəmoni dəvardey iyən bəvədə bıə əvəzon rəğmən,deçəy əvvəl və sıftənə mevcudoton mığoyosə bıənine.Nəhcul-Bəlağə hafto şəşminə hikmətədə İmom(ə) bə ın nuktə işorə kardedə ki,bəzi koonədə ki,çəvon ayəndə və vəomə məlum ni iyən əy mıəyyən kardey saxte,bənə əy bıə koonku koməq sıey mumkine və ayəndə zıney bəbe.zira dəvardəyon iyən ayəndə iqlə metod və şivədəy.joqo ki,ehyanə dəvardə çokə vəzyyət ruşin bıbu,ayəndə və vəomə vəzyət həm ruşin bəbe.

Fərzkənən ki,qıləy şəxs həşto sor jimon bıko,qıləy vaxt ki,bə cıl sorəti rəseydə,ıştə umri i niməku dəvardeydə.dıminə çıl sor həm bənə sıftənə çıl soriye.sıftənə çıl sori çe insoni təlim iyən təcrubəon barz iyən ziyod beydə.har ruj iqlə tojə vindey ufuğış heste və ziyodə kəmolaton bə dast vardeydə.

Isət dıminə çıl sorədə bənə qıləy kəsiye ki,çe bandı-kuyku bəpe şıə iyən ısət saru omey zəmon omə rəsə.ın dıqlə bənə iyandeyin.əmmo ehyanə çıl sori dırozi qıləy çiş cəm kardəşni iyən qıləy çiş omutəni və bo dıminə çıl sori həm qıləy səmər və foydəş  ni.iyoe ki,həzrət İmom Əli(ə) hameyedə:”çəy oxo deçəy əvvəli zıney bəbe”.

Havaxti koon byənde qınin(çəvon çokə kon de bədə koon məlum kardey nıbe)əvoni əncom doey deçəvon sıftə mığoyisə kardey beydə.həzrət Əli(ə) ın sıxan çəmə dığğəti bə ın həyğəti səmt cəlb kardedə ki,çe koon sıftə deçəvon oxo de iyande qıləy penıssiyə rabitəşon heste və həyğətədə bənə illət iyən məluli və ya bənə səbəb iyən nəticən.binobərin ehyanə əmə çı koon oxoy çokonə bıey həxədə qıləy şəkkəmon,bəpe bıvindəmon ki,çəy sıftə və əvvəlış çokonə bıə.əgər məsir iyən ro səhih bıəbu,çəy ağıbət iyən oxo həm jəqo sərost bəbe.əmmo ehyanə çəy əvvəl nodırıst bıəbu,bəpe bızınəmon ki,çəy ağıbət həm jəqo nodırıst və nosəhih iyən de xətəri pur bəbe.çoko ki,farsi qıləy zərbul-misolədə jıqo omə:”memor sıftənə kərpic ehyanə şat bıno,divo tosə Surəyya həm bışo şat bəbe”.

Həlbəttə bə Nəhcul-Bəlağə bəzi şərhəkəyon votey əsos,çın sıxani co qıləy mesaj və peyğomış heste və əv həm ıme ki, əgər çəmə dılımon heste ıştə kardə koonku çokə nəticə bıqətəmon,bəpe hejo çe sıftəku ıştə niyyət və motivonku mığət bıbəmon.çe Ğuba məçiti de Zirari məçiti bina miyono farğ həm ıme.har dıqlə ki,çe Xıdo peyğombəri(s) zəmonədə zohirədə məçit bin və bo nımoj iyən ibodətiro soxtə bıəbin,sıftənə qıləyni çəy fundament bə xeyrxahə niyyəti əsos be, əve əyo peyğombər(s) iyən co qılə mısılmınon nımoj votedəbin iyən ibodət kardedəbin,əmmo Zirari məçit ki,və məşum iyən mınofiğonə hədəfon əsos soxtə bıəbe,de pəyğombəri dəstur iyən əmri bəy otəş jıey be.

Xıdovənde-Aləm Tobə mıborəkə surə 108-ə şərifə ayədə oşkoə formədə bə peyğombəre-əkrəmi(s)fərmon doydə ki, hiçvaxti Zirari məçitədə ki,hejo çe sıftənə rujiku bə kıfr,nifoğ,bedinəti iyən təfrığə əsos soxtə bıə,nımoj nıhando.bəlkəm çın məçiti əvəzi vey loyığin ıme ki,Ğuba məçitədə ibodətkə ki,hejo çe iminə rujiku bə təğvo iyən pərhizkorəti əsos bina kardey və soxtey bıə.