Ўзбекистон Бош прокуратураси делегацияси Қозоғистонда бўлди

Қозоғистон, Қирғизистон, Тожикистон ва Покистон давлатларининг ҳуқуқни муҳофаза қилувчи органлари ходимлари ҳам беш кунлик тренинг тингловчилари бўлишди

Қозоғистон Республикаси Бош прокуратурасининг таклифига биноан Ўзбекистон Республикаси Бош прокуратураси ходимларидан иборат Ўзбекистон делегацияси хизмат ташрифи билан Остона шаҳрида (Қозоғистон) бўлди. 

Ташриф давомида, Ўзбекистон Республикаси Бош прокуратураси ходимлари ЕХҲТнинг Остонадаги дастурлари Офиси кўмагида ўтказилган “Халқаро алоқалар билан боғлиқ бўлган молиявий жиноятларни тергов қилиш” мавзусидаги халқаро семинар-тренингда иштирок этдилар.

Семинар-тренингнинг мақсади трансмиллий молиявий жиноятларни тергов қилиш ва ноқонуний активларни қайтариш, минтақа давлатларида тўпланган тажрибани ўзаро алмашиш, юқори даражадаги зарур билим ва кўникмаларга эга бўлган кадрларни тайёрлаш соҳасида мутахассисларнинг малакасини ошириш бўлди.

Қозоғистон, Қирғизистон, Тожикистон ва Покистон давлатларининг ҳуқуқни муҳофаза қилувчи органлари ходимлари ҳам беш кунлик тренинг тингловчилари бўлишди.

Ташриф дастурига мувофиқ, Ўзбекистон Республикаси Бош прокуратурасининг Олий ўқув курслари ва Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар Академияси ўртасида меморандумни имзолаш маросими бўлиб ўтди.

Меморандумда таълим, илмий-тадқиқот ва инновацион соҳалардаги ҳамкорликни амалга ошириш кўзда тутилган.

Бундан ташқари, Ўзбекистон делегацияси Қозоғистон Республикаси прокуратураси органлари тизимидаги ислоҳотларнинг бориши ва натижалари билан танишдилар.