Ўзбекистон Олий Мажлиси Сенати раиси МДҲ Парламентлараро Ассамблеяси кенгашининг мажлисида

Танзила Нарбаева бошчилигидаги парламент делегацияси Санкт-Петербург шаҳрида Парламентлараро Ассамблея кенгашининг мажлисида иштирок этди

Ўзбекистон Сенати матбуо хизматига таяниб, Спутник сайтининг хабар қилишича, Мустақил Давлатлар Ҳамдўстлигига аъзо давлатлар Парламентлараро Ассамблеяси кенгаши раиси, Россия Федерал Мажлиси Федерал кенгаши раиси Валентина Матвиенко Парламентлараро иттифоқнинг Тошкент шаҳрида ўтказилган 150-юбилей ассамблеяси ва унинг натижаларига тўхталди.

У мазкур анжуманнинг юқори савияда ташкил этилгани, қабул қилувчи томоннинг меҳмонларни қабул қилиш ва тадбир ўтказишдаги юксак маҳорати ҳамда масъулиятини эътироф этди. Матвиенко Нарбаевани ва унинг жамоасини ушбу тадбирни юксак даражада ўтказгани билан табриклади.

Нарбаева мазкур Ассамблея МДҲ давлатлари парламент делегацияларининг фаол иштироки, уларнинг қабул қилинган ҳужжатларга қўшган ҳиссаси ҳамда илгари сурган таклифлари муҳим аҳамиятга эга эканини таъкидлади. Шунингдек, келгусида ҳам бундай йирик халқаро анжуманларни ўтказишда ҳамкорлик қилишга тайёр эканини таъкидлади.

Шундан сўнг кун тартибидаги масалалар кўриб чиқилди. Иштирокчилар МДҲ ПA халқаро кузатувчиларининг Беларусь президенти сайлови ва Тожикистон парламент сайлови мониторинги натижаларига эътибор қаратди.